নিউজ ডেস্কঃ
প্ৰশাসক হিচাপে ২৫ বছৰত প্ৰধানমন্ত্ৰী নৰেন্দ্ৰ মোদীৰ নতুন শ্লোগান। বুধবাৰে তেওঁ বাৰে বাৰে কয়, “উই ৱিল ডু ইট।” অৰ্থাৎ আমি এইটো কৰিমেই । দিল্লীৰ ইন্দিৰা গান্ধী ইনড’ৰ ষ্টেডিয়ামত আয়োজিত ‘উন্নত ভাৰত সংকল্প সভা’ত প্ৰধানমন্ত্ৰীয়ে প্ৰশাসক হিচাপে নিজৰ লক্ষ্যৰ ওপৰতো আলোকপাত কৰে। চৰকাৰৰ মুৰব্বী হিচাপে থকা ২৫ বছৰত বিভিন্ন অভিজ্ঞতাৰ পৰা কেনেদৰে অহৰহ শিক্ষা গ্ৰহণ কৰিছে সেই বিষয়েও তেওঁ শ্বেয়াৰ কৰে।
দীঘলীয়া ভাষণত মোদীয়ে কয় যে তেওঁলোকে ২০৪৭ চনৰ ভিতৰত ভাৰতক এখন উন্নত দেশ (উন্নত ভাৰত) কৰি তুলিব। নিজৰ সংকল্প প্ৰকাশ কৰি মোদীয়ে কয় যে অনাগত দিনত দেশখন তৃতীয় বিশ্বৰ অৰ্থনীতি হিচাপেও আত্মপ্ৰকাশ কৰিব। ইয়াৰ লগতে তেওঁ আত্মবিশ্বাসী সুৰত কয় যে ভাৰতে অলিম্পিক আয়োজন কৰিব, ভাৰতীয় মহাকাশচাৰীসকল মহাকাশলৈ যাব। মোদীয়ে এই লক্ষ্যসমূহৰ কথা কওঁতে সন্মুখত বহি থকা দৰ্শকে ‘উই ৱিল ডু ইট’ শ্লোগান দিবলৈ ধৰে।
২০০১ চনৰ ৭ অক্টোবৰত গুজৰাটৰ মুখ্যমন্ত্ৰী হিচাপে শপত গ্ৰহণ কৰা মোদীয়ে ১৩ বছৰ গুজৰাটৰ মুখ্যমন্ত্ৰী হিচাপে কাৰ্যনিৰ্বাহ কৰাৰ পিছত ২০১৪ চনত দেশৰ প্ৰধানমন্ত্ৰী হয়। সেই উপলক্ষে বুধবাৰে বিজেপিয়ে ‘সেৱা জ্যোতি যাত্ৰা’ কাৰ্যসূচী আৰম্ভ কৰে। ভাষণত মোদীয়ে তেওঁৰ জীৱনৰ অভিজ্ঞতাৰ পৰা কেনেদৰে শিকিছে তাৰ ওপৰত আলোকপাত কৰে। ৰাজনৈতিক বিৰোধীৰ পৰা কি শিকিছে সেই বিষয়েও ব্যাখ্যা কৰি মোদীয়ে কয়, “মোৰ বিৰোধিতা কৰাসকলে মোক গণতন্ত্ৰৰ শক্তি দেখুৱাইছে। মোৰ সমালোচকসকলে মোক নিজকে চাবলৈ শিকাইছে।”
দীৰ্ঘদিনীয়া ৰাজনৈতিক জীৱনৰ কথা স্মৰণ কৰি মোদীয়ে কয়, “মই প্ৰথমবাৰৰ বাবে ২০০১ চনৰ ৭ অক্টোবৰত গুজৰাটৰ মুখ্যমন্ত্ৰী হিচাপে শপত গ্ৰহণ কৰিছিলোঁ। সেইদিনা মই এই মাইলৰ খুঁটিত উপনীত হ’ম বুলি ভবা নাছিলোঁ। আজি শীৰ্ষ প্ৰশাসক হিচাপে একেৰাহে ২৫ বছৰ জনসাধাৰণৰ সেৱা কৰাৰ যি সুযোগ পাইছোঁ সেয়া দেশবাসীৰ অন্তহীন আশীৰ্বাদৰ ফল।” এই ভিত্তিতে প্ৰধানমন্ত্ৰীয়ে বিজেপি, কেন্দ্ৰৰ শাসকীয় মিত্ৰজোঁট এনডিএ আৰু দেশৰ গণতান্ত্ৰিক গাঁথনিৰ প্ৰতি বিশ্বাস থকা সকলো লোকক শ্ৰদ্ধাঞ্জলি জ্ঞাপন কৰে।
