পিতৃ-মাতৃয়ে কেতিয়াও নিজৰ প্ৰাপ্তবয়স্ক কন্যাক (Adult daughter) তেওঁৰ ইচ্ছাৰ বিৰুদ্ধে তেওঁলোকৰ লগত থাকিবলৈ বাধ্য কৰিব নোৱাৰে। ‘হেবিয়াছ কৰ্পাছ’ গোচৰ খাৰিজ কৰি এই কথা জনালে এলাহাবাদ উচ্চ ন্যায়ালয়ে। কালাৱতী দেৱী নামৰ এগৰাকী মহিলাই আদালতত ‘হেবিয়াছ কৰ্পাছ’ গোচৰ ৰুজু কৰিছিল। তেওঁৰ ২৫ বছৰীয়া কন্যা পূজাই আদালতত হাজিৰ হোৱাটো বিচাৰিছিল। সেই আবেদনৰ ভিত্তিত ১৭ আগষ্টত আদালতে পূজাক আদালতত হাজিৰ হ’বলৈ নিৰ্দেশ দিছিল। আদালতে সেই দায়িত্ব ৰাজ্য চৰকাৰক দিয়ে। সেই নিৰ্দেশ অনুসৰি পূজাকো আদালতত হাজিৰ কৰা হয়।
পূজাই আদালতত কয় যে তেওঁ নিজৰ ইচ্ছামতে দিল্লীত মুক্তভাৱে বাস কৰি আছে। এইটো কোনো অবৈধ কথা নহয়। পূজাৰ বক্তব্য শুনাৰ পাছত এলাহাবাদ উচ্চ ন্যায়ালয়ৰ ন্যায়াধীশ সন্দীপ জৈনে কালাৱতীয়ে দাখিল কৰা গোচৰ খাৰিজ কৰে। ৰায়দানত তেওঁ কয় যে কোনো প্ৰাপ্তবয়স্কক নিজৰ ইচ্ছাৰ বিৰুদ্ধে পিতৃ-মাতৃৰ সৈতে থাকিবলৈ বাধ্য কৰিব নোৱাৰিব। ন্যায়াধীশগৰাকীয়ে লগতে কয় যে আবেদনকাৰীৰ কন্যা এগৰাকী প্ৰাপ্তবয়স্ক আৰু সক্ষম। তেওঁ নিজৰ পছন্দৰ ঠাই বা ব্যক্তিৰ লগত থাকিব পাৰে। প্ৰাপ্তবয়স্কসকলৰ সেই স্বাধীনতা আছে।
