অৱশেষত আত্মসমৰ্পণ কৰিলে তৰুণ তেজপালে। সোমবাৰে পুৱা গোৱাৰ মাপুছা আদালতত আত্মসমৰ্পণ কৰে ‘তেহেলকা’ৰ প্ৰতিষ্ঠাপক তথা প্ৰাক্তন সম্পাদকগৰাকীয়ে। শেহতীয়াকৈ ২০১৩ চনত ধৰ্ষণৰ গোচৰত দোষী সাব্যস্ত হৈছিল তেওঁক। ইতিমধ্যে উচ্চতম ন্যায়ালয়ে তেওঁক আত্মসমৰ্পণৰ নিৰ্দেশ দিছিল। সোমবাৰে পুৱা আদালতলৈ গৈ তেওঁ আত্মসমৰ্পণ কৰে। তেজপালৰ বিৰুদ্ধে ২০১৩ চনত গোৱাৰ এখন ফাইভ ষ্টাৰ হোটেলৰ লিফটত সহকৰ্মীক ধৰ্ষণ কৰাৰ অভিযোগ।
প্ৰথমে এই গোচৰটো গোৱাৰ আদালতত চলি আছিল। ২০২১ চনত নিম্ন আদালতে তেওঁক দোষমুক্ত কৰে। পিছত এই গোচৰটো বোম্বাই উচ্চ ন্যায়ালয়লৈ যায়। যোৱা আগষ্ট মাহত উচ্চ ন্যায়ালয়ৰ খণ্ড বিচাৰপীঠে তৰুণ তেজপালক ধৰ্ষণ গোচৰত দোষী সাব্যস্ত কৰাৰ লগতে তেওঁক ১০ বছৰৰ কঠোৰ কাৰাদণ্ডৰ নিৰ্দেশ দিয়া হয়। উচ্চ ন্যায়ালয়ৰ নিৰ্দেশক প্ৰত্যাহ্বান জনাই উচ্চতম ন্যায়ালয়লৈ গৈছিল ‘তেহেলকা’ৰ প্ৰতিষ্ঠাপকগৰাকী।
উচ্চতম ন্যায়ালয়ে ২৫ আগষ্টত নিৰ্দেশ দিছিল যে তেজপালে তিনি সপ্তাহৰ ভিতৰত আত্মসমৰ্পণ কৰিব লাগিব। যদিহে ২১ ছেপ্টেম্বৰৰ ভিতৰত সংশ্লিষ্ট নথি-পত্ৰ দাখিল কৰা হয় তেন্তে ২২ ছেপ্টেম্বৰত আদালতে তেওঁৰ আবেদনৰ শুনানি গ্ৰহণ কৰিব। তেজপালে ১৩ বছৰ পূৰ্বে গোৱাৰ হোটেলখনৰ লিফটত সেই সময়ত ‘তেহেলকা’ত কৰ্মৰত এগৰাকী যুৱতীক যৌন নিৰ্যাতন চলোৱাৰ অভিযোগ উত্থাপন হৈছে। সেই ঘটনাৰ পৰিপ্ৰেক্ষিতত তেওঁৰ বিৰুদ্ধে ধৰ্ষণৰ গোচৰ ৰুজু হৈছিল।
২০১৪ চনত গোৱা অপৰাধ দমন শাখাই প্ৰায় ৩০০০ পৃষ্ঠাৰ অভিযোগনামা দাখিল কৰিছিল। সেই বছৰৰ জুলাই মাহত তেজপালে উচ্চতম ন্যায়ালয়ত আবেদন কৰি জামিন লাভ কৰে। পিছত ২০১৭ চনত তেওঁৰ বিৰুদ্ধে ধৰ্ষণ, যৌন নিৰ্যাতন আৰু অনৈতিক কাৰ্যকলাপৰ অভিযোগত সত্ৰ আদালতত অভিযোগ উত্থাপন কৰা হয়। ২০১৯ চনত উচ্চতম ন্যায়ালয়ে তেজপালৰ বিৰুদ্ধে থকা ধৰ্ষণ আৰু যৌন নিৰ্যাতনৰ অভিযোগ বাতিল কৰাৰ আবেদন নাকচ কৰি বিচাৰ অব্যাহত ৰখাৰ নিৰ্দেশ দিয়ে। ২০২১ চনত গোৱা সত্ৰ আদালতে তেজপালক সকলো অভিযোগৰ পৰা মুক্ত কৰে। যোৱা মাহত বম্বে উচ্চ ন্যায়ালয়ে সেই ৰায় বাতিল কৰি তেজপালক দোষী সাব্যস্ত কৰে।
