আন্তৰাষ্ট্ৰীয় ক্ৰীড়াৰ ক্ষেত্ৰত অসম তথা গুৱাহাটীৰ আন এক বিশেষ সংযোজন। এইবাৰ গুৱাহাটীত অনুষ্ঠিত হ’ব আন্তৰাষ্ট্ৰীয় মাৰাথন। এই মাৰাথন আয়োজনত বিশেষভাৱে নেতৃত্ব লৈছে ভাৰতৰ কিংবদন্তি ক্ৰিকেটাৰ সুনীল গাভাস্কাৰে। অহা বছৰ ৭ ফেব্ৰুৱাৰীত অনুষ্ঠিত হ’ব এই মেগা ক্ৰীড়া অনুষ্ঠান। বৃহপতিবাৰে মুখ্যমন্ত্ৰী ডঃ হিমন্ত বিশ্ব শৰ্মাই এই কথা ঘোষণা কৰে। লগতে এই মাৰাথনৰ বাবে ডিজাইন কৰা শুভংকৰ উন্মোচন কৰা হয়।
সামাজিক মাধ্যমযোগে এই সন্দৰ্ভত মুখ্যমন্ত্ৰীয়ে কয়, “আমাৰ শৈশৱ আৰু যৌৱনত সুনীল গাভাস্কাৰ আছিল সকলোৰে মন ৰোমাঞ্চিত কৰা নাম। অনন্য ক্রিকেট শৈলীৰে অর্জন কৰা জনপ্রিয়তাই চুইছিল আকাশলংঘী উচ্চতা। মহান ভাৰতীয় ক্রীড়াবিদগৰাকীৰ সৈতে অলপতে হোৱা সাক্ষাতত তেখেতে গুৱাহাটীত এখন আন্তঃৰাষ্ট্ৰীয় মাৰাথন আয়োজনৰ এক বিশেষ প্ৰস্তাৱ আগবঢ়াইছিল। আজি সঁচাকৈয়ে আনন্দিত আৰু গৌৰৱান্বিত যে সেই প্ৰস্তাৱ বাস্তৱায়নৰ দিশত আমি আৰু এখোজ আগবাঢ়িলোঁ।”
এই আন্তৰাষ্ট্ৰীয় মাৰাথনৰ তাৰিখ সন্দৰ্ভত মুখ্যমন্ত্ৰীয়ে কয়, “আজি গুৱাহাটী আন্তঃৰাষ্ট্ৰীয় মাৰাথনৰ শুভংকৰ উন্মোচন কৰাৰ লগতে ৭ ফেব্ৰুৱাৰী, ২০২৭ত এই আন্তঃৰাষ্ট্ৰীয় ক্ৰীড়া অনুষ্ঠানটো আয়োজনৰ দিন ঘোষণা কৰিবলৈ পাই নথৈ সুখী হ’লোঁ।”
তেওঁ লগতে কয়, “গুৱাহাটীক বিশ্বৰ ক্ৰীড়াপ্ৰেমীৰ সন্মুখত এক নতুন পৰিচয়েৰে প্ৰতিষ্ঠা কৰাৰ এয়া এক বৃহৎ সুযোগ। শাৰীৰিক সুস্থতা, ক্ৰীড়াসুলভ মনোভাব আৰু গুৱাহাটীৰ উদ্যমক উদযাপন কৰিবলৈ অসমৰ ৰাইজক বৃহৎ সংখ্যাৰে এই মাৰাথনত অংশগ্ৰহণ কৰিবলৈ বিনম্রতাৰে আহ্বান জনাইছোঁ।”
আনহাতে, এই সুযোগ প্ৰদানৰ বাবে গাভাস্কাৰক ধন্যবাদ জনাই মুখ্যমন্ত্ৰীয়ে কয়, “এই গৌৰৱময় যাত্ৰাৰ প্ৰথম পঞ্জীয়নভুক্ত অংশগ্ৰহণকাৰী হিচাপে মই আনন্দিত। এই সন্মানীয় ক্ৰীড়া অনুষ্ঠানটো গুৱাহাটীলৈ লৈ অহাৰ বাবে গাভাস্কাৰ ডাঙৰীয়াৰ লগতে আয়োজক সংস্থা পি এম জিৰ প্ৰতি আন্তৰিক কৃতজ্ঞতা জ্ঞাপন কৰিছোঁ।”
