সংযুক্ত আৰব আমিৰশ্বাহীৰ (ইউএই) পৰা আৰম্ভ কৰি সমাপ্ত হ’ব ইটালীত। প্ৰধানমন্ত্ৰী নৰেন্দ্ৰ মোদীয়ে (PM Modi) শুকুৰবাৰে যুদ্ধবিধ্বস্ত পশ্চিম এছিয়াৰ দেশ ইউএই ভ্ৰমণ কৰি ৬ দিনীয়া বিদেশ ভ্ৰমণ আৰম্ভ কৰে।
ইয়াৰ পিছত তেওঁ ইউৰোপৰ চাৰিখন দেশ নেদাৰলেণ্ড, নৰৱে, ছুইডেন আৰু ইটালী ভ্ৰমণ কৰিব। বৈদেশিক পৰিক্ৰমা মন্ত্ৰালয়ৰ এক সূত্ৰই পূৰ্বে প্ৰকাশ কৰিছিল যে হৰমুজ প্ৰণালীত হোৱা অৱৰোধ আৰু ইৰাণ যুদ্ধৰ বাবে শক্তি সংকট আৰু ভাঙি পৰা যোগান শৃংখলৰ ওপৰত মোদীয়ে পাঁচখন দেশৰ নেতাৰ সৈতে আলোচনা কৰিব।
শুকুৰবাৰে তেওঁ ইউএই ভ্ৰমণ কৰি সেই কাম আৰম্ভ কৰিছে। পেট্ৰ’লিয়াম সামগ্ৰী আৰু ৰন্ধন গেছ লাভৰ বাবে ইউএইৰ সৈতে ভাৰতে চুক্তি স্বাক্ষৰ কৰিছে। ইয়াৰ উপৰি ভাৰতত প্ৰতিৰক্ষা খণ্ডত বিনিয়োগৰ বাবে ‘ বুজাবুজি চুক্তি’ ঘোষণা কৰা হৈছে।
আবুধাবিত স্বাক্ষৰিত ‘ভাৰত-সংযুক্ত আৰব আমিৰশ্বাহীৰ কৌশলগত প্ৰতিৰক্ষা অংশীদাৰিত্ব’ চুক্তি অনুসৰি এতিয়াৰে পৰা দুয়োখন দেশৰ মাজত সামৰিক সহযোগিতা কেৱল যৌথ অনুশীলনত সীমাবদ্ধ নাথাকিব। প্ৰতিৰক্ষা প্ৰযুক্তিৰ ক্ষেত্ৰত যৌথভাৱে অস্ত্ৰ-শস্ত্ৰ আৰু সামৰিক সঁজুলি উৎপাদন কৰা হ’ব। তদুপৰি সন্ত্ৰাসবাদৰ বিৰুদ্ধে যুঁজিবলৈ দুয়োখন দেশৰ মাজত চোৰাংচোৱা তথ্যৰ আদান-প্ৰদান কৰা হ’ব।
গুজৰাটত ‘জাহাজ মেৰামতি ক্লাষ্টাৰ’ বা জাহাজ মেৰামতি কেন্দ্ৰ স্থাপনৰ বাবেও দুয়োখন দেশৰ চুক্তি স্বাক্ষৰিত হৈছে। ইয়াৰ দ্বাৰা ভাৰতৰ সামুদ্ৰিক আন্তঃগাঁথনি শক্তিশালী হোৱাই নহয়, জাহাজ ৰক্ষণাবেক্ষণৰ ক্ষেত্ৰতো ভাৰতক আঞ্চলিক কেন্দ্ৰ হিচাপে গঢ়ি তোলা হ’ব।
