বিহাৰৰ প্ৰাক্তন মুখ্যমন্ত্ৰী নীতিশ কুমাৰৰ (Nitish Kumar) পুত্ৰ নিশান্ত কুমাৰে বৃহস্পতিবাৰে ৰাজ্যত মন্ত্ৰী হিচাপে শপত গ্ৰহণ কৰে। তেওঁৰ লগতে আন ৩১জন মন্ত্ৰীয়ে বিজেপি-জেডিইউৰ মিত্ৰজোঁটৰ মন্ত্ৰী হিচাপে শপত গ্ৰহণ কৰে। মুখ্যমন্ত্রী সম্ৰাট চৌধুৰীৰ কেবিনেটত তেওঁক স্বাস্থ্যমন্ত্রীৰ দায়িত্ব দিয়া হৈছে৷
মন্ত্ৰী হিচাপে শপত গ্ৰহণ কৰাৰ পিছত নিশান্তই কয়, “মই মোৰ পিতৃৰ নিৰ্দেশ অনুসৰি মাননীয় মুখ্যমন্ত্ৰী সম্ৰাট চৌধুৰী ডাঙৰীয়াৰ নেতৃত্বত কাম কৰিম। জেডিইউৰ শীৰ্ষ নেতাসকলে মোৰ ওপৰত যি আস্থা ৰাখিছে, সেই আস্থাক মই বজাই ৰাখিবলৈ চেষ্টা কৰিম। মই সম্পূৰ্ণ সততাৰে কাম কৰাৰ চেষ্টা কৰিম আৰু মোৰ পিতৃয়ে বিহাৰক যি উন্নয়নৰ পথ দেখুৱাইছে, সেই পথত আগবাঢ়ি যাম।”
যোৱা ৮ মাৰ্চত নিশান্তই আনুষ্ঠানিকভাৱে পিতৃ নীতিশৰ ৰাজনৈতিক দল জেডিইউত যোগদান কৰে।ৰাজ্যসভাৰ সাংসদ হিচাপে নিৰ্বাচিত হোৱাৰ পিছত ১৫ এপ্ৰিলত বিহাৰৰ মুখ্যমন্ত্ৰী পদৰ পৰা পদত্যাগ কৰে নীতিশে। তেতিয়াৰ পৰাই তেওঁ নিজৰ পুত্ৰ নিশান্তক দলৰ হৈ মন্ত্ৰিত্ব দিব পাৰে বুলি জল্পনা-কল্পনাৰ সৃষ্টি হৈছে। উল্লেখ্য যে নিশান্তই পাটনা কেন্দ্ৰীয় বিদ্যালয়ত অধ্যয়ন কৰিছিল। স্কুলীয়া শিক্ষা সমাপ্ত কৰাৰ পিছত তেওঁ বহুজাতিক কোম্পানীতো কাম কৰিছিল। কিন্তু মাৰ্চ মাহৰ আগলৈকে তেওঁ কেতিয়াও সক্ৰিয় ৰাজনীতিত যোগদান কৰিবলৈ কোনো উৎসাহ প্ৰকাশ কৰা নাছিল।
২৪৩ জনীয়া বিহাৰ বিধানসভাত ৮৯ জন বিধায়কৰে একক বৃহত্তম দলৰ মৰ্যাদা থকা বিজেপিৰ ১৫ গৰাকী মন্ত্ৰীয়ে বৃহস্পতিবাৰে শপত গ্ৰহণ কৰে।
সম্ৰাট মন্ত্ৰীসভাত আছে নীতিশৰ পুত্ৰ নিশান্তকে ধৰি জেডিইউৰ মুঠ ১৫জন মন্ত্ৰী। ইয়াৰে ১৩ জনে বৃহস্পতিবাৰে গান্ধী ময়দানত শপত গ্ৰহণ কৰে। যোৱা ১৫ এপ্ৰিলত সম্ৰাটৰ সৈতে বিজয় কুমাৰ চৌধুৰী আৰু বিজেন্দ্ৰ প্ৰসাদ যাদৱে উপ-মুখ্যমন্ত্ৰী হিচাপে শপত গ্ৰহণ কৰে।
ইয়াৰ উপৰি বৃহস্পতিবাৰে কেন্দ্ৰীয় মন্ত্ৰী চিৰাগ পাছৱানৰ নেতৃত্বত লোক জনশক্তি পাৰ্টীৰ সঞ্জয় কুমাৰ সিং আৰু সঞ্জয় কুমাৰ পাছৱানক পুনৰ মন্ত্ৰী হিচাপে নিৰ্বাচিত কৰা হয়। আন এজন কেন্দ্ৰীয় মন্ত্ৰী জিতন ৰাম মাঝি আৰু ৰাষ্ট্ৰীয় লোক মৰ্চাৰ মুৰব্বী উপেন্দ্ৰ কুশৱাহাৰ পুত্ৰ দীপক প্ৰকাশৰ নেতৃত্বত হিন্দুস্তানী আৱাম মৰ্চাৰ সন্তোষ কুমাৰ সুমনকো পুনৰ মন্ত্ৰী হিচাপে নিৰ্বাচিত কৰা হয়।
