দেশৰ কেইবাখনো ৰাজ্যত তাপ প্ৰবাহে গুৰুতৰ ৰূপ ধাৰণ কৰিছে। ইয়াৰে এখন হৈছে ওড়িশা। এইবাৰ স্থানীয় সূত্ৰ অনুসৰি, দুদিনত ‘হিটষ্ট্ৰ’ক’ৰ (Odisha Heat Wave) ফলত দুজন লোকৰ মৃত্যু হৈছে। প্ৰশাসনেও দুজন লোকৰ মৃত্যুৰ খবৰ দিছে। কিন্তু মৃত্যুৰ কাৰণ ‘হিটষ্ট্ৰ’ক’ আছিল নে নাই সেই সন্দৰ্ভত কোনো স্পষ্ট তথ্য পোৱা নাই।
প্ৰশাসনৰ সূত্ৰ অনুসৰি, সোমবাৰে সংঘটিত দুটা পৃথক ঘটনাত দুজন শিক্ষকৰ মৃত্যু হয়। দুয়োজনেই লোকপিয়লৰ কামত নিয়োজিত আছিল।
ময়ুৰভঞ্জ জিলাত এজন লোকৰ মৃত্যু হয়। আনগৰাকীৰ মৃত্যু হয় সুন্দৰগড়ত। এই জিলা দুখনৰ তাপমাত্ৰা ৩৭ ডিগ্ৰী চেলছিয়াছ। নিহত দুজন হৈছে ৰাজকাপুৰ হেম্ব্ৰাম আৰু অনুৰাগ এক্কা। দুয়োজনেই চৰকাৰী বিদ্যালয়ৰ শিক্ষক। উল্লেখ্য যে উত্তৰ ভাৰত আৰু পূব ভাৰতৰ বৃহৎ অঞ্চলত গ্ৰীষ্ম প্ৰবাহ চলি আছে।
কোনো কোনো ঠাইত তাপমাত্ৰা ৪৫ ডিগ্ৰী চেলছিয়াছ পৰ্যন্ত হৈছে। ওড়িশাৰ বহু জিলাত গৰমৰ প্ৰকোপ বৃদ্ধি পাইছে। লগতে তাপ প্ৰবাহৰ সতৰ্কবাণী জাৰি কৰা হৈছে। এনে পৰিস্থিতিত কেইবাঠাইতো তাপজনিত ৰোগৰ খবৰ পোৱা গৈছে।
