প্ৰধানমন্ত্ৰী নৰেন্দ্ৰ মোদীয়ে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ওপৰত কৰা আক্ৰমণক (Donald Trump Attack Case) গৰিহণা দিয়ে। ট্ৰাম্প, তেওঁৰ পত্নী মেলানিয়া আৰু আমেৰিকাৰ উপ-ৰাষ্ট্ৰপতি জে ডি ভেন্স কোনো ক্ষতি নোহোৱাকৈ ৰক্ষা পৰাৰ বাবেও তেওঁ স্বস্তি প্ৰকাশ কৰে।
দেওবাৰে ছ’চিয়েল মিডিয়াত মোদীয়ে লিখিছে, “ৱাশ্বিংটন ডি চিৰ এখন হোটেলত সংঘটিত নিৰাপত্তাজনিত কাণ্ডৰ পিছত ৰাষ্ট্ৰপতি ট্ৰাম্প, ফাৰ্ষ্ট লেডী আৰু উপ-ৰাষ্ট্ৰপতি নিৰাপদ আৰু সুস্থ বুলি জানি মই স্বস্তি লাভ কৰিছোঁ। তেওঁলোকৰ সুৰক্ষা আৰু মংগলৰ বাবে মোৰ আন্তৰিক কামনা। গণতন্ত্ৰত হিংসাৰ কোনো স্থান নাই আৰু ইয়াক নিঃসন্দেহে গৰিহণা দিয়া উচিত।”
উল্লেখ্য যে শনিবাৰে নিশা (ৱাশ্বিংটনৰ সময় অনুসৰি) হোৱাইট হাউছৰ ওচৰৰ ৱাশ্বিংটন হিল্টন হোটেলত নিশাৰ আহাৰ গ্ৰহণৰ কাৰ্যসূচীত অংশগ্ৰহণ কৰিছিল ট্ৰাম্পে।
হোৱাইট হাউছৰ বাতৰি পৰিবেশন কৰা সাংবাদিকসকলৰ বাবে পৰম্পৰা অনুসৰি তেওঁৰ কাৰ্যালয়ে আয়োজন কৰিছিল এক বাৰ্ষিক নৈশভোজৰ কাৰ্য্যসূচী। ট্ৰাম্পৰ সৈতে আছিল তেওঁৰ পত্নী ফাৰ্ষ্ট লেডী মেলানিয়া ট্ৰাম্প। তদুপৰি নিশাৰ আহাৰত আমেৰিকাৰ উপ-ৰাষ্ট্ৰপতি জে ডি ভেন্সকে ধৰি কেইবাজনো আমেৰিকান জ্যেষ্ঠ বিষয়া আৰু নেতা উপস্থিত থাকে।
তাতেই হঠাতে গুলীচালনাৰ ঘটনা সংঘটিত হয়। ঘটনাৰ পিছতে ট্ৰাম্পে নিজৰ ছ’চিয়েল মিডিয়াত অভিযুক্তৰ ফটো পোষ্ট কৰে। তাতে এজন যুৱকৰ হাত-ভৰি বান্ধি পেলাই থোৱা আছে। একে সময়তে ট্ৰাম্পে কয় যে তেওঁ, মেলানিয়া আৰু অন্যান্য প্ৰশাসনৰ বিষয়াসকল সুৰক্ষিত।
