ৰাজ্যসভাৰ সাংসদ তথা প্ৰাক্তন ভাৰতীয় ক্ৰিকেটাৰ হৰভজন সিঙে (Harbhajan Singh) আম আদমী পাৰ্টী ত্যাগ কৰি বিজেপিত যোগদান কৰাৰ পিছত সমৰ্থকৰ প্ৰতিবাদৰ সন্মুখীন হয়। শনিবাৰে পঞ্জাবৰ জলন্ধৰত তেওঁৰ ঘৰৰ সন্মুখত আপ সমৰ্থকে প্ৰতিবাদ সাব্যস্ত কৰে।
অভিযোগ অনুসৰি, তেওঁৰ ঘৰৰ বাহিৰৰ বেৰত চিয়াঁহীৰে লিখা আছিল ‘গাদ্দাৰ’ শব্দটো। যাৰ অৰ্থ হৈছে ‘দেশদ্ৰোহী’। ইয়াৰ পিছতে দেওবাৰে হৰভজন সিঙক কেন্দ্ৰীয় নিৰাপত্তা প্ৰদান কৰা হয়। জলন্ধৰত তেওঁৰ ঘৰৰ সন্মুখত কেন্দ্ৰীয় সংৰক্ষিত বাহিনীৰ জোৱান মোতায়েন কৰা হয়।
সংবাদ সংস্থা পি টি আয়ে সূত্ৰৰ উদ্ধৃতি দি শনিবাৰে প্ৰকাশ কৰিছিল যে পঞ্জাৱ আৰক্ষীয়ে আপৰ সাংসদসকলক প্ৰদান কৰা নিৰাপত্তা প্ৰত্যাহাৰ কৰা হৈছে। হৰভজনৰ লগত সকলো সময়তে পঞ্জাৱ আৰক্ষীৰ ৯ৰ পৰা ১০জন বিষয়া আছিল। দেওবাৰৰ পৰা চি আৰ পি এফৰ জোৱান তেওঁৰ ঘৰৰ সন্মুখত মোতায়েন কৰা হয়।
খবৰ অনুসৰি, আপ এৰি বিজেপিত যোগদান কৰা আটাইকেইজন নেতাৰ বাবে কেন্দ্ৰীয় গৃহ মন্ত্ৰালয়ে সুকীয়াকৈ নিৰাপত্তাৰ ব্যৱস্থা কৰিছে। ৰাঘৱ চাদ্দায়ো একেই নিৰাপত্তা লাভ কৰিছে। জানিব পৰা মতে, পঞ্জাৱ আৰক্ষীৰ নিৰাপত্তা প্ৰত্যাহাৰ কৰাৰ পিছত আৰু হৰভজনৰ ঘৰৰ সন্মুখত প্ৰতিবাদ সাব্যস্ত কৰাৰ পিছত কেন্দ্ৰই পৃথক নিৰাপত্তাৰ আদেশ দিয়ে।
উল্লেখ্য যে শুকুৰবাৰে আপ ত্যাগ কৰি বিজেপিত যোগদান কৰিছিল হৰভজনে। সংবাদমেলত তেওঁলোকৰ দল ত্যাগ কৰাৰ সিদ্ধান্ত ৰাঘৱ চাদ্দাই নিজেই ঘোষণা কৰে। তেওঁৰ লগত আন দুজন সাংসদ অশোক মিট্টাল আৰু সন্দীপ পাঠকো উপস্থিত থাকে।
স্বাতী মালিৱাল, ৰাজিন্দৰ গুপ্তা, বিক্ৰমজিৎ সাহানিয়েও একেলগে আপ এৰে। ৰাজ্যসভাত আপৰ ১০ জন সাংসদৰ ভিতৰত এতিয়া ৭ জনেই দল সলনি হৈছে। পঞ্জাৱৰ মুখ্যমন্ত্ৰী ভগৱন্ত মানে শুকুৰবাৰে তেওঁলোকক ‘গদ্দাৰ’ বুলি অভিহিত কৰে।
