৪ মাৰ্চত বিধানসভা নিৰ্বাচনৰ ভোটগণনাৰ পিছত পুনৰ পশ্চিমবংগলৈ আহিব বুলি আশাবাদী প্ৰধানমন্ত্ৰী নৰেন্দ্ৰ মোদী (PM Modi)। ৰাজ্যখনৰ প্ৰথমখন বিজেপি চৰকাৰৰ শপত গ্ৰহণ অনুষ্ঠানত তেওঁ অংশগ্ৰহণ কৰিব।
সোমবাৰে প্ৰধানমন্ত্ৰী নৰেন্দ্ৰ মোদীয়ে প্ৰচাৰৰ অন্তিম পৰ্যায়ত এই কথা ঘোষণা কৰে। ইয়াৰ পাছতে এ আইৰ সহায়ত দিয়া এক অডিঅ’ বাৰ্তাত তেওঁ পশ্চিমবংগৰ ৰাইজক কয়, “গণতন্ত্ৰৰ মন্দিৰত বিজয় ধ্বজা উত্তোলন কৰাৰ এক আচৰিত সুযোগ আপোনালোকৰ সন্মুখত আহিছে।”
ছ’চিয়েল মিডিয়াত প্ৰকাশ পোৱা অডিঅ’ বাৰ্তাটোত মোদীয়ে আৰম্ভণিতে লিখিছে, “পশ্চিমবংগৰ মোৰ মৰমৰ পৰিয়াল, গণতন্ত্ৰৰ এই উৎসৱে আপোনালোকৰ বাবে বিজেপিৰ বিজয়ৰ পতাকা উত্তোলনৰ এক সোণালী সুযোগ কঢ়িয়াই আনিছে। মই নিশ্চিত যে ২৯ এপ্ৰিলত আপোনালোকে ভোটদানৰ এক নতুন অভিলেখ গঢ়িব। এই ঐতিহাসিক মুহূৰ্তত মই এটা অডিঅ’ বাৰ্তাৰ জৰিয়তে মোৰ অনুভৱ প্ৰকাশ কৰিছোঁ…।”
ইয়াৰ পিছতে ৭ মিনিট ৩৮ ছেকেণ্ডৰ অডিঅ’ৰ আৰম্ভণিতে পশ্চিমবংগৰ যুৱক-যুৱতীসকলৰ ‘উন্নয়ন ৰোডমেপ’ দাঙি ধৰে মোদীয়ে। লগতে বংগৰ নিৰ্বাচনী প্ৰচাৰত এক বেলেগ ধৰণৰ শক্তি অনুভৱ কৰা বুলিও কয়।
তেওঁ কয়, “মোৰ বংগৰ এই নিৰ্বাচনী প্ৰচাৰত মই একেবাৰেই ভাগৰুৱা অনুভৱ কৰা নাছিলোঁ। মই অনুভৱ কৰিছিলোঁ যে মই তীৰ্থযাত্ৰাত আছোঁ। যেতিয়া মই মা কালীৰ ভক্তসকলৰ মাজলৈ গৈছিলোঁ, তেতিয়া হয়তো মা কালীয়ে নিজেই মোক নতুন শক্তিৰে ভৰাই তুলিছিল।”
মোদীয়ে দাবী কৰে যে অযোধ্যাৰ ৰামলালা মন্দিৰত প্ৰতিমা প্ৰতিষ্ঠা কৰাৰ পূৰ্বে ব্ৰত পালন কৰাৰ সময়ত ‘ভগৱান ৰামচন্দ্ৰ’ই তেওঁক অপৰিসীম শক্তি প্ৰদান কৰিছিল। এইবাৰ বংগৰ জনসাধাৰণৰ মুখামুখি হৈ তেওঁ একে শক্তি লাভ কৰিলে।
উন্নত আৰু বিকশিত পশ্চিমবংগ গঢ়ি তোলাৰ প্ৰতিশ্ৰুতি দি তেওঁ কয়, “বংগৰ যুৱক-যুৱতীসকলে আগবাঢ়ি যাবলৈ মুকলি ঠাই বিচাৰে। বংগৰ নাগৰিকে নিৰাপত্তা বিচাৰে। এতিয়া আমি ইয়াক সলনি কৰিহে এৰিব লাগিব।” ইয়াৰ লগতে অডিঅ’ ভাষণত তেওঁ তৃণমূল কংগ্ৰেছৰ নাম নলোৱাকৈ দোষাৰোপ কৰি কয়, ”তেওঁলোকে বহুত ভয় দেখুৱাইছে, এতিয়া মই বিশ্বাস বিচাৰোঁ, ভয় নহয়। বাংলাক সুৰক্ষিত কৰি ৰখাটো মোৰ পৰম দায়িত্ব।”
প্ৰথম পৰ্যায়ৰ ভোটগ্ৰহণে ইতিহাস ৰচনা কৰি আছে বুলি দাবী কৰি মোদীয়ে দ্বিতীয় পৰ্যায়ৰ ভোটাৰসকলক আহ্বান জনায়, ”২৯ এপ্ৰিলত আপোনালোকে গণতন্ত্ৰৰ মন্দিৰত বিজয়ৰ পতাকা উত্তোলন কৰাৰ এক আচৰিত সুযোগ আপোনালোকৰ সন্মুখত আহিছে।”
