বিহাৰৰ মুখ্যমন্ত্ৰী সম্ৰাট চৌধৰী (Samrat Chaudhary)লৈ মৃত্যুৰ ভাবুকি। অভিযোগ অনুসৰি, তেওঁক ফোনযোগে ভাবুকি (Threat over the phone) দিয়া হৈছে। ইয়াৰ পিছত মুংগেৰ আৰক্ষীয়ে ফোন ট্ৰেক কৰি গুজৰাটৰ সানন্দাত অভিযুক্তৰ অৱস্থান ধৰা পেলায়। তাৰ পৰাই আৰক্ষীয়ে অভিযুক্ত যুৱকজনক গ্ৰেপ্তাৰ কৰে।
তদন্তকাৰী সূত্ৰৰ মতে, অভিযুক্তৰ নাম শেখৰ যাদৱ (Shekhar Yadav)। তেওঁ বিহাৰৰ বাংকা জিলাৰ বাসিন্দা। ট্ৰেনজিট ৰিমাণ্ডত শেখৰক বিহাৰলৈ লৈ যায় আৰক্ষীয়ে। উল্লেখ্য যে ইয়াৰ পূৰ্বেও সম্ৰাট চৌধৰীয়ে মৃত্যুৰ ভাবুকি পাইছিল। সেই সময়ত তেওঁ বিহাৰৰ উপ-মুখ্যমন্ত্ৰী আছিল। যোৱা বছৰৰ জুলাই মাহত তেওঁক হত্যাৰ ভাবুকি দি মেছেজ প্ৰেৰণ কৰা হৈছিল। তাত লিখা আছিল, “২৪ ঘণ্টাৰ ভিতৰত মই সম্ৰাট চৌধৰীক গুলীয়াই মাৰিম।” মুখ্যমন্ত্ৰী হোৱাৰ পিছত পুনৰ মৃত্যুৰ ভাবুকি দিয়া হয়।
উল্লেখ্য যে ১৫ এপ্ৰিলত সম্ৰাটে বিহাৰৰ নতুন মুখ্যমন্ত্ৰীৰ দায়িত্ব লয়। দীৰ্ঘদিনীয়া শাসকীয় মিত্ৰজোঁটৰ সদস্য হোৱাৰ পিছতো কোনো বিজেপি নেতা বিহাৰৰ মুখ্যমন্ত্ৰী হোৱা নাছিল। সেই দৃষ্টিকোণৰ পৰা সম্ৰাট বিহাৰৰ মুখ্যমন্ত্ৰী হোৱা প্ৰথমজন বিজেপি নেতা। ৰাজনীতি আৰু মন্ত্ৰণালয় সম্ৰাটৰ বাবে নতুন কথা নহয়। সম্ৰাটৰ পিতৃ শকুনি চৌধৰী এসময়ত সমতা পাৰ্টীৰ সাংসদ আছিল আৰু তেওঁৰ মাতৃ পাৰ্বতী দেৱী আছিল একেটা দলৰ বিধায়িকা। পিছলৈ অৱশ্যে লালুপ্ৰসাদ যাদৱৰ দল আৰজেডিত যোগদান কৰে। পিতৃ-মাতৃৰ ৰাজনৈতিক পথ অনুসৰণ কৰি সম্ৰাটে লালুৰ দলত যোগ দিয়ে। লালু আৰু তেওঁৰ পত্নী ৰাবৰি দেৱী বিহাৰৰ মুখ্যমন্ত্ৰী থকাৰ সময়ত ১৯৯৯ চনত তেওঁ কৃষি মন্ত্ৰী হৈছিল।
২০০০ চনত পুনৰ আৰজেডিৰ পৰা জয়ী হোৱাৰ পিছত পুনৰ মন্ত্ৰী হয়। সেইবাৰ অৱশ্যে তেওঁ সমগ্ৰ পাঁচ বছৰীয়া কাৰ্যকাল সম্পূৰ্ণ কৰিবলৈ সক্ষম হয়। ২০০৫ আৰু ২০১০ চনৰ বিধানসভা নিৰ্বাচনত আৰজেডিৰ পৰাজয়ৰ পিছতো দলীয় আনুগত্য সলনি কৰা নাছিল সম্ৰাটে। ২০১৪ চনত দলৰ শীৰ্ষ নেতৃত্বৰ সৈতে হোৱা মতানৈক্যৰ বাবে তেওঁ নীতিশ কুমাৰৰ জেডিইউত যোগদান কৰে।
