চলিত সপ্তাহত প্ৰধানমন্ত্ৰী নৰেন্দ্ৰ মোদীৰ চৰকাৰে লোকসভা পুনৰ্গঠন আৰু মহিলা সংৰক্ষণ সংশোধনী বিধেয়ক (Lok Sabha) সংসদত উত্থাপন কৰাত সক্ৰিয় হৈ পৰিছে।
২০২৯ চনৰ লোকসভা নিৰ্বাচনতেই মহিলা সংৰক্ষণ আইন কাৰ্যকৰী কৰাৰ লক্ষ্যৰে অনা এই বিধেয়কখনৰ আনুষ্ঠানিক নাম হৈছে ‘নাৰী শক্তি বন্দন অধিনিয়ম’। এই বিধেয়কৰ সমান্তৰালকৈ আগন্তুক অধিৱেশনত ১৩১ সংখ্যক সংবিধান সংশোধনী বিধেয়ক উত্থাপন কৰা হ’ব।
সংসদৰ দুয়োটা সদনত গৃহীত হোৱাৰ পিছত ৰাষ্ট্ৰপতিৰ সন্মতি লাভ কৰিলে লোকসভাৰ আসনৰ সংখ্যা ৫৪৩ৰ পৰা ৮৫০লৈ বৃদ্ধি কৰিব পাৰিব। খচৰা বিধেয়কত এনে এটা প্ৰস্তাৱো আছে। মঙলবাৰে এই খচৰা লাভ কৰে সাংসদসকলে। কেন্দ্ৰৰ এক সূত্ৰই জনোৱা মতে, মহিলা সংৰক্ষণ কাৰ্যকৰী কৰাৰ স্বাৰ্থত সকলো ৰাজ্যৰ লোকসভাৰ আসন কমেও ৫০ শতাংশ বৃদ্ধি কৰা হ’ব।
মহিলা সংৰক্ষণ সংশোধনী বিধেয়ক গৃহীত কৰাৰ স্বাৰ্থত সংসদৰ বাজেট অধিৱেশনৰ সময়সীমা বৃদ্ধি কৰি ১৬ এপ্ৰিলৰ পৰা ১৮ এপ্ৰিললৈ তিনিদিনীয়া বিশেষ অধিৱেশন আহ্বান কৰা হৈছে। উক্ত অধিৱেশনত মোদী চৰকাৰে বিধেয়কখন গৃহীত কৰিব। সংবিধানৰ ৮২ নং অনুচ্ছেদ সংশোধন কৰি সংৰক্ষণ কাৰ্যকৰী কৰাৰ প্ৰস্তাৱ আছে বিধেয়কখনত।
৮২ নং অনুচ্ছেদ অনুসৰি, লোকপিয়ল সম্পূৰ্ণ হোৱাৰ পিছত সংসদীয় সমষ্টিসমূহৰ সীমা নিৰ্ধাৰণৰ প্ৰক্ৰিয়া আৰম্ভ কৰিব পাৰি। কিন্তু লোকপিয়লৰ প্ৰতিবেদন প্ৰকাশৰ পূৰ্বে মোদী চৰকাৰে লোকসভাৰ আসন বৃদ্ধি কৰি মহিলা সংৰক্ষণৰ আইন প্ৰৱৰ্তন কৰিব বিচাৰিছে। ২০২৩ চনত লোকসভা আৰু ৰাজ্যসভাত ‘নাৰী শক্তি বন্দন অধিনিয়ম’ বিধেয়ক গৃহীত হয়।
৩৩ শতাংশ আসন মহিলাৰ বাবে সংৰক্ষিত কৰা বিধেয়কখনত লোকপিয়লৰ পিছত আসনসমূহৰ সীমা নিৰ্ধাৰণ কৰা হ’ব বুলি উল্লেখ কৰা হৈছে। ইয়াৰ পিছত সেই আসনৰ ৩৩ শতাংশ আসন মহিলাৰ বাবে সংৰক্ষিত হ’ব। কিন্তু এতিয়া কংগ্ৰেছ, তৃণমূলৰ লগতে বিভিন্ন বিৰোধী দলে লোকপিয়লৰ বাবে অপেক্ষা নকৰাকৈ দুটা পৃথক বিষয় একত্ৰিত কৰাৰ ওপৰত প্ৰশ্ন উত্থাপন কৰিছে।
১৫ এপ্ৰিলত দিল্লীত এই বিষয়ত বিৰোধী দলসমূহে আলোচনাত মিলিত হ’ব। সংবিধান সংশোধনী বিধেয়কখন গৃহীত কৰিবলৈ সংসদৰ দুয়োটা সদনৰ দুই তৃতীয়াংশ সংখ্যাগৰিষ্ঠতাৰ প্ৰয়োজন। কিন্তু মোদী চৰকাৰৰ হাতত সেই সংখ্যা নাই। এনে পৰিস্থিতিত বিৰোধীৰ এটা অংশই বিধেয়কখনক বাধা দিব বিচাৰিছে।
তেওঁলোকৰ যুক্তি হ’ল, ২০২৩ চনৰ আইনখন পালন কৰা হ’লে ২০৩৪ চনৰ লোকসভা নিৰ্বাচনত মহিলা সংৰক্ষণ কাৰ্যকৰী হ’লহেঁতেন। কিন্তু নতুন সংশোধনী বিধেয়ক অনুসৰি ২০২৭ চনৰ লোকপিয়ললৈ অপেক্ষা নকৰাকৈ লোকসভাৰ আসনৰ সংখ্যা বৃদ্ধি আৰু পুনৰ গঠন কৰা হ’ব। ২০২৯ চনৰ লোকসভা নিৰ্বাচনত ৰাজনৈতিক সুবিধা লাভৰ বাবে মোদী চৰকাৰৰ এই কৌশল।
