সোমবাৰে শ্ৰমিকৰ প্ৰতিবাদত উত্তাল হয় নয়ডা (Noida Protes)। ফলত উত্তৰ প্ৰদেশ চৰকাৰৰ প্ৰতিনিধিয়ে শ্ৰমিকসকলৰ দাবী আৰু ক্ষোভৰ কথা জানিবলৈ সোমবাৰে মাজনিশা নয়ডাত এখন বৈঠক অনুষ্ঠিত কৰে।
বৈঠকত উত্তৰ প্ৰদেশৰ মুখ্যমন্ত্ৰী যোগী আদিত্যনাথে গঠন কৰি দিয়া সমিতিৰ সদস্য আৰু শ্ৰমিক প্ৰতিনিধিয়ে অংশগ্ৰহণ কৰে। বৈঠকত সংশ্লিষ্ট সকলো পক্ষই অংশগ্ৰহণ কৰে। বৈঠকত শ্ৰমিক প্ৰতিনিধিয়ে একাধিক দাবী উত্থাপন কৰে। ইয়াৰ ভিতৰত উল্লেখযোগ্য হ’ল মাহিলি দৰমহা ১০-১৫,০০০ টকাৰ পৰা ১৮,০০০-২০,০০০ টকালৈ বৃদ্ধি, সপ্তাহত এদিন ছুটী আৰু অতিৰিক্ত সময় কাম কৰাৰ বাবে মজুৰি বৃদ্ধি।
ইয়াৰ সমান্তৰালকৈ শ্রমিকসকলে সু-শ্রম পৰিৱেশ আৰু কামৰ প্রতি সন্মানৰ দাবী জনায়৷ উত্তৰ প্ৰদেশ চৰকাৰে অৱগত কৰিছে যে শ্ৰমিকৰ ক্ষোভ আৰু প্ৰতিবাদৰ কথা শুনি এই বৈঠক আয়োজন কৰা হৈছে। ইয়াত বিভিন্ন কাৰখানাৰ শ্ৰমিক প্ৰতিনিধিয়ে অংশগ্ৰহণ কৰে। কোনো নিৰ্দিষ্ট শ্ৰমিক সংগঠনে আলোচনাৰ নেতৃত্ব দিয়া নাই বুলিও চৰকাৰে অৱগত কৰিছে।
বৈঠক সন্দৰ্ভত জিলা দণ্ডাধীশ মেধা ৰূপমে কয়, “আমি আলোচনাৰ জৰিয়তে সমস্যাৰ সমাধান বিচাৰো। আলোচনাৰ অন্তত আমি অগ্ৰাধিকাৰ ভিত্তিত চৰকাৰলৈ আমাৰ প্ৰস্তাৱ প্ৰেৰণ কৰিম। উদ্যোগ খণ্ডত শান্তি আৰু স্থিতিশীলতাৰ সমান্তৰালভাৱে শ্ৰমিকসকলৰ স্বাৰ্থও সুৰক্ষিত কৰা হ’ব।”
উল্লেখ্য যে সোমবাৰে বিয়লি উত্তৰ প্ৰদেশৰ মুখ্যমন্ত্ৰী আদিত্যনাথৰ কাৰ্যালয়ে এক বিবৃতি জাৰি কৰি উচ্চ পৰ্যায়ৰ সমিতি গঠনৰ কথা ঘোষণা কৰে। তাত কোৱা হয় যে আদিত্যনাথৰ নিৰ্দেশত শ্ৰম বিভাগে এই সমিতি গঠন কৰিছে। এই সমিতিৰ নেতৃত্বত আছে উত্তৰ প্ৰদেশৰ ঔদ্যোগিক উন্নয়ন আয়ুক্ত।
ৰাজ্যৰ ক্ষুদ্ৰ, মজলীয়া আৰু কুটীৰ উদ্যোগ বিভাগৰ অতিৰিক্ত মুখ্য সচিব আৰু শ্ৰম আৰু নিয়োগ বিভাগৰ প্ৰধান সচিবকো এই সমিতিত অন্তৰ্ভুক্ত কৰা হৈছে। আদিত্যনাথৰ কাৰ্যালয়ে জনোৱা মতে, কমিটীত শ্ৰমিক সংগঠনৰ পাঁচজন প্ৰতিনিধি আৰু মালিক সংগঠনৰ তিনিজন প্ৰতিনিধি থাকিব।
