নিৰ্বাচন আয়োগে (Election Commission) প্ৰকাশ কৰিলে উত্তৰ প্ৰদেশ (UP)ৰ এছ আই আৰৰ (SIR) চূড়ান্ত ভোটাৰ তালিকা। ইয়াত খচৰা তালিকাৰ তুলনাত ৮৪ লাখ ভোটাৰ বৃদ্ধি (Increase of 8.4 million voters) পাইছে। বৰ্তমান মুঠ ভোটাৰৰ সংখ্যা ১৩ কোটি ৩৯ লাখ ৮৪ হাজাৰ ৭৯২ গৰাকী। কিন্তু এছ আই আৰ প্ৰক্ৰিয়া আৰম্ভ হোৱাৰ পূৰ্বে প্ৰকাশ পোৱা তালিকাৰ তুলনাত মুঠ ভোটাৰৰ সংখ্যা প্ৰায় ২ কোটি হ্ৰাস পাইছে।
অহা বছৰ উত্তৰ প্ৰদেশত বিধানসভা নিৰ্বাচন অনুষ্ঠিত হ’ব। শুকুৰবাৰে ৰাজ্যখনৰ মুখ্য নিৰ্বাচনী বিষয়া নৱদীপ ৰিনৱাই (Nabadeep Rinwa) সংবাদমেল অনুষ্ঠিত কৰি চূড়ান্ত তালিকা প্ৰকাশ কৰে। তেওঁ কয় যে আইন অনুসৰি সম্পূর্ণ স্বচ্ছ পদ্ধতিৰে ৰাজ্যত এছ আই আৰ প্রক্রিয়া সম্পূর্ণ কৰা হৈছে৷ নিৰ্দিষ্ট আইনী পদ্ধতি পালন নকৰাকৈ কোনো ভোটাৰৰ নাম তালিকাৰ পৰা বাদ দিয়া হোৱা নাই।
৬ জানুৱাৰীত আয়োগে উত্তৰ প্ৰদেশৰ ভোটাৰ তালিকাৰ খচৰা প্ৰকাশ কৰে। এই তালিকাত আছিল ১২৫,৫৬,২৫০ গৰাকী লোকৰ নাম। তালিকাখনৰ বিৰুদ্ধে আপত্তি, অভিযোগ বা আপীল দাখিল কৰিবলৈ আৰু সেইবোৰ নিষ্পত্তি কৰিবলৈ দুমাহৰ সময় দিয়া হৈছিল। শুকুৰবাৰে আয়োগে প্ৰকাশ কৰা চূড়ান্ত তালিকাত মুঠ ভোটাৰৰ সংখ্যা ১৩ কোটিৰো অধিক হৈছে। খচৰা তালিকাত থকা সংখ্যাতকৈ বৃদ্ধি পাইছে মুঠ ৮৪,২৮,৭৬৭ গৰাকী ভোটাৰ। নিৰ্বাচন আয়োগৰ তথ্য অনুসৰি, এই পৰিসংখ্যাৰ কাৰণ হৈছে নিৰ্বাচন সন্দৰ্ভত সজাগতা আৰু এছ আই আৰৰ প্ৰচাৰ কাৰ্যসূচীৰ সফলতা।
আয়োগৰ পৰিসংখ্যা অনুসৰি, এছ আই আৰ প্ৰক্ৰিয়া আৰম্ভ হোৱাৰ পূৰ্বে উত্তৰ প্ৰদেশত মুঠ ভোটাৰৰ সংখ্যা আছিল ১৫৪,৪৩০,০৯২ গৰাকী। এছ আই আৰৰ পিছত চূড়ান্ত তালিকাত সেই সংখ্যা ২৪,৪৪৫,৩০০লৈ হ্ৰাস পায়।
জিলাভিত্তিক পৰিসংখ্যা অনুসৰি, উত্তৰ প্ৰদেশত প্ৰয়াগৰাজ, লক্ষ্ণৌ, বেৰেলী, গাজিয়াবাদ আৰু জৌনপুৰত খচৰা তালিকাৰ পিছত সৰ্বাধিক ভোটাৰ বৃদ্ধি হৈছে। মুখ্য কাৰ্যবাহী বিষয়া নৱদীপ ৰিনৱাই কয় যে ইয়াৰ পিছত যদি কোনো ‘যোগ্য’ ভোটাৰৰ নাম তালিকাৰ বাহিৰত ৰৈ যায়, তেন্তে তেওঁ প্ৰ-পত্ৰ ৬ পূৰণ কৰি আবেদন কৰিব পাৰে। যদি কাৰোবাৰ চূড়ান্ত ভোটাৰ তালিকাত আপত্তি আছে তেন্তে আগন্তুক ১৫ দিনৰ ভিতৰত সংশ্লিষ্ট জিলা দণ্ডাধীশৰ কাৰ্যালয়ক অৱগত কৰিব লাগে। আয়োগৰ চৰকাৰী ৱেবছাইটত গৈ উত্তৰ প্ৰদেশৰ জনসাধাৰণক নিজৰ নাম পৰীক্ষা কৰিবলৈ আহ্বান জনাইছে।
