যুদ্ধৰ অন্ত পেলাবলৈ আমেৰিকা আৰু ইৰাণৰ মাজত পাৰস্পৰিক আলোচনা অব্যাহত (Iran War) আছে। পশ্চিম এছিয়াৰ কেইবাখনো দেশৰ মধ্যস্থতাকাৰীয়েও এই আলোচনাত যোগদান কৰিছে। আমেৰিকাৰ সংবাদ মাধ্যম ‘এক্সিয়ছ’-এ আমেৰিকা, ইজৰাইল আৰু স্থানীয় পৰ্যায়ৰ কেইবাটাও সূত্ৰৰ উদ্ধৃতি দি এই কথা প্ৰকাশ কৰিছে।
সংবাদ সংস্থা ৰয়টাৰে ‘এক্সিয়ছ’ৰ প্ৰতিবেদনৰ উদ্ধৃতি দি কয় যে এই বিষয়ত হোৱাইট হাউছ বা আমেৰিকাৰ বিদেশ মন্ত্ৰালয়েও আনুষ্ঠানিকভাৱে কোনো মন্তব্য দিব নিবিচাৰে। ‘এক্সিয়ছ’ৰ প্ৰতিবেদন অনুসৰি, যুদ্ধত লিপ্ত পক্ষ দুটাই দুটা পৰ্যায়ত যুদ্ধৰ ওপৰত নিয়ন্ত্ৰণ ৰাখিবলৈ চেষ্টা চলাইছে। প্ৰথম পৰ্যায়ত এই সংঘাত ৪৫ দিনৰ বাবে স্থগিত ৰাখিব পাৰি নেকি সেই সন্দৰ্ভত আলোচনা চলি আছে।
যদি ৪৫ দিনীয়া যুদ্ধবিৰতি সফল হয় তেন্তে দ্বিতীয় পৰ্যায়ত যুদ্ধৰ অন্ত পেলোৱাৰ আলোচনা আৰম্ভ হ’ব বুলি প্ৰতিবেদনত উল্লেখ কৰা হৈছে। প্ৰতিবেদন অনুসৰি, যুদ্ধৰ অন্ত পেলোৱাৰ আলোচনা অব্যাহত থাকিলে যুদ্ধবিৰতিৰ সময়সীমা বৃদ্ধি হ’ব পাৰে। দেওবাৰে ইৰাণক বুজাবুজিত উপনীত হ’বলৈ ৪৮ ঘণ্টাৰ সময় দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে।
আমেৰিকাৰ সংবাদ মাধ্যম ‘ফক্স নিউজ’ৰ সৈতে হোৱা এক সাক্ষাৎকাৰত তেওঁ ইৰাণক কয় যে যদিহে তেওঁলোকৰ মাজত সোনকালে কোনো বুজাবুজি নহয়, তেন্তে সকলো উৰুৱাই দিব আৰু তেলৰ দখল ল’ব। ট্ৰাম্পে ইৰাণক হৰমুজ প্ৰণালীৰ অৱৰোধ উঠাই ল’বলৈ মঙলবাৰে নিশা ৮ বজালৈ (আমেৰিকাৰ সময় অনুসৰি) সময় দিয়ে। অৱৰোধ উঠাই নিদিলে ইৰাণক নৰকলৈ পঠিয়াব বুলিও হুংকাৰ দিয়ে। ইৰাণে অৱশ্যে ট্ৰাম্পৰ এই ভাবুকিক গুৰুত্বসহকাৰে ল’বলৈ অনিচ্ছুক।
দেশখনৰ কেন্দ্ৰীয় সামৰিক আদেশৰ জেনেৰেল আলিয়াবাদীয়ে আমেৰিকাৰ ৰাষ্ট্ৰপতিগৰাকীক কটু সমালোচনা কৰি কয় যে এই ভাবুকিৰ পৰা স্পষ্ট যে তেওঁ অসহায়, ভীত, ভাৰসাম্যহীন আৰু মূৰ্খ। এই পৰিস্থিতিত দুয়োপক্ষৰ মাজত আলোচনাৰ দুৱাৰ কিমান মুকলি হ’ব তাক লৈ বহুতে সন্দেহ প্ৰকাশ কৰিছে।
