ৰাজ্যত চলি আছে নিৰ্বাচনী বতাহ। ৰাজনৈতিক দলসমূহে নিজৰ নিজৰ প্ৰাৰ্থীৰ নিৰ্বাচনী প্ৰচাৰ জোৰদাৰ কৰি তুলিছে। তাৰ সমান্তৰালভাৱে আৰক্ষী প্ৰশাসন তথা দুৰ্নীতি নিবাৰক শাখাই ৰাজ্যত অপৰাধমূলক কামৰ বিৰুদ্ধে চোকা দৃষ্টি ৰাখিছে। ইয়াৰ মাজতে বুধবাৰে দুপৰীয়া কাৰ্বি আংলং (Karbi Anglong) জিলাৰ ডিলাই থানাৰ অন্তৰ্গত পুৰণি লাহৰিজান ছয় মাইল (Old Lahorijan six miles)ত এখন বাছৰ পৰা বুজন পৰিমাণৰ ড্ৰাগছ জব্দ (Drugs seized) কৰা হয়। লগতে এই ড্ৰাগছখিনি সৰবৰাহৰ অভিযোগত দুগৰাকী মহিলাক আটক (Two women arrested) কৰা হয়।
নিয়মীয়া নাকা তালাচীৰ সময়ত আৰক্ষীয়ে ডিমাপুৰৰ পৰা নগাঁও অভিমুখী AS-09AC-3903 নম্বৰৰ এখন যাত্ৰীবাহী বাছত তালাচী (Search on the passenger bus) চলোৱাৰ সময়ত দুগৰাকী মহিলাক আৰক্ষীয়ে সন্দেহজনক অৱস্থাত প্ৰত্যক্ষ কৰে। সন্দেহৰ ভিত্তিত মহিলা আৰক্ষীয়ে তেওঁলোকৰ শৰীৰত তালাচী চলোৱাত লুকুৱাই অনা ১৮টা চাবোনৰ বাকচত প্ৰায় ২১১.২৮ গ্ৰাম (211.28 gm) সন্দেহযুক্ত হেৰ’ইন উদ্ধাৰ কৰে। আৰক্ষী সূত্ৰে জানিব পৰা মতে, আটক কৰা মহিলা দুগৰাকী নগাঁও চামগুৰিৰ কাৱাইমাৰীৰ জাইদুল হকৰ কন্যা শোমোলা খাতুন আৰু নগাঁও কচুৱাৰ জুৰিৰপাৰৰ আব্দুল জলিল আলীৰ কন্যা শাবিকুম নেহাৰ। পৰৱৰ্তী সময়ত উদ্ধাৰ কৰা সন্দেহজনক হেৰ’ইনখিনি জব্দ কৰি আৰক্ষীয়ে দুয়োকে আটক কৰে। এই ঘটনাৰ সৈতে আন কোনোবা জড়িত আছে নেকি তাৰ তদন্ত আৰক্ষীয়ে অব্যাহত ৰাখিছে।
