ইৰাণ (Iran)ৰ ওপৰত আমেৰিকা-ইজৰাইলৰ আক্ৰমণৰ পিছত অশান্তিৰ আশংকা কৰি কেন্দ্ৰীয় চৰকাৰে (Central Govt.) ৰাজ্যসমূহলৈ সতৰ্কবাণী প্ৰেৰণ (Sending warnings to the states) কৰিছে। কেন্দ্রীয় গৃহ মন্ত্ৰালয়ৰ এখন পত্ৰ প্রতিখন ৰাজ্য আৰু কেন্দ্রীয়শাসিত অঞ্চললৈ প্ৰেৰণ কৰা হৈছে৷ পত্ৰখনত কোৱা হৈছে যে যদি কোনোবাই ইৰাণৰ সমৰ্থনত উচটনিমূলক মন্তব্য কৰে তেন্তে তেওঁলোকক চিনাক্ত কৰি তেওঁলোকৰ বিৰুদ্ধে ব্যৱস্থা গ্ৰহণ কৰা উচিত। কোনো প্ৰকাৰে অশান্তিকৰ পৰিস্থিতিৰ পৰা হাত সাৰিবলৈ কেন্দ্ৰই এক বাৰ্তা দিছে।
যোৱা শনিবাৰে আমেৰিকা আৰু ইজৰাইলৰ যুটীয়া বাহিনীয়ে ইৰাণৰ ওপৰত আক্ৰমণ (Iran Attack) কৰে। সংবাদ সংস্থা এ এন আয়ে চৰকাৰী বিষয়াৰ উদ্ধৃতিৰে প্ৰকাশ কৰা অনুসৰি, সেইদিনা গৃহ মন্ত্ৰালয়ে ৰাজ্যসমূহক সকীয়াই দি এখন পত্ৰ প্ৰেৰণ কৰে। সংবাদ সংস্থাৰ হাতত পৰিছে এই পত্ৰ। ইৰাণৰ ওপৰত আমেৰিকা-ইজৰাইলৰ আক্ৰমণৰ পিছত ভাৰততো অশান্তিৰ সৃষ্টি হ’ব পাৰে বুলি কেন্দ্ৰই অনুমান কৰে। পত্ৰখনত কোৱা হৈছে যে প্ৰৰোচনামূলক ভাষণ দিয়া ইৰাণ সমৰ্থক উগ্ৰপন্থী প্ৰচাৰকসকলক চিনাক্ত কৰা উচিত। পৰিস্থিতি যাতে হাতৰ পৰা ওলাই নাযায় তাৰ বাবে ৰাজ্যসমূহ সজাগ হ’ব লাগে। যিকোনো ধৰণৰ ধৰ্মীয় হিংসাৰ বাবে সাজু থাকিব লাগিব।
উল্লেখ্য যে ইৰাণৰ ওপৰত আমেৰিকা-ইজৰাইলৰ আক্ৰমণ আৰু দেশখনৰ সৰ্বোচ্চ ধৰ্মগুৰু আয়াতুল্লা আলী খামেইনীৰ মৃত্যুৰ সন্দৰ্ভত ভাৰতে এতিয়াও কোনো আনুষ্ঠানিক বক্তব্য দিয়া নাই। পশ্চিম এছিয়াৰ পৰিস্থিতিক লৈ উদ্বেগ প্ৰকাশ কৰি নতুন দিল্লীয়ে শান্তি ৰক্ষাৰ বাবে আবেদন জনাইছে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ সৈতে কথা পাতিছে প্ৰধানমন্ত্ৰী নৰেন্দ্ৰ মোদীয়ে। কিন্তু দেওবাৰে খামেইনীৰ মৃত্যুৰ খবৰ ৰাজহুৱা হোৱাৰ পাছত ভাৰতৰ বিভিন্ন প্ৰান্তত বিক্ষিপ্তভাৱে অশান্তিৰ সৃষ্টি হয়। জম্মু-কাশ্মীৰৰ কেইবাটাও স্থানত আমেৰিকা-ইজৰাইলৰ আগ্ৰাসনৰ প্ৰতিবাদত ৰাজপথলৈ ওলাই আহে জনসাধাৰণ। উত্তৰ প্ৰদেশৰ লক্ষ্ণৌতো প্ৰতিবাদ সাব্যস্ত কৰা হয়। কোনো ধৰণৰ অপ্ৰীতিকৰ ঘটনাৰ পৰা হাত সাৰিবলৈ সষ্টম হৈ আছে দিল্লী।
আনহাতে, খামেইনীৰ মৃত্যুৰ পিছতে পাকিস্তানত সৃষ্টি হোৱা অশান্তিৰ ফলত ১২ জন লোকৰ মৃত্যু হৈছে। দেওবাৰে কৰাচীত থকা আমেৰিকাৰ কনছুলেটত প্ৰৱেশ কৰে একাংশ প্ৰতিবাদকাৰী। তাত নিৰাপত্তাৰক্ষীয়ে গুলীচালনা কৰাত ১০ জন লোক নিহত হোৱাৰ লগতে ইছলামাবাদত সংঘটিত পৃথক পৃথক ঘটনাত আৰু দুজন লোক নিহত হয়। পাকিস্তানৰ প্ৰধানমন্ত্ৰী শ্বাহবাজ শ্বৰীফেও ইৰাণৰ ওপৰত কৰা আক্ৰমণক গৰিহণা দিছে।
