শনিবাৰে মুকলি হ’ল ব্ৰহ্মপুত্ৰ (Brahmaputra)ৰ ওপৰত গুৱাহাটী-উত্তৰ গুৱাহাটী সংযোগী (Guwahati-North Guwahati Connector) কুমাৰ ভাস্কৰ বৰ্মা সেতু (Kumar Bhaskar Varma Bridge)। এই দলংখন মুকলি হোৱাৰ পিছত গুৱাহাটী-গৌৰীপুৰৰ মাজত যাতায়াতৰ সময় মাত্ৰ ৭ মিনিট লাগিব। শনিবাৰে প্ৰধানমন্ত্ৰী নৰেন্দ্ৰ মোদীয়ে মুকলি কৰে দেশৰ প্ৰথমখন ৬ লেনযুক্ত এক্সট্ৰাড’জড (6-lane extradosed) নদী দলং। নিশ্চিতভাৱে এই দলংখনে অসমৰ প্ৰগতি আৰু যাতায়াত উন্নয়নৰ ক্ষেত্ৰত এক নতুন মাইলৰ খুঁটি স্থাপন কৰিব।
ইফালে এই দলংখন মুকলি হোৱাৰ পিছত বহুত আশাবাদী হৈছে মুখ্যমন্ত্ৰী ডঃ হিমন্ত বিশ্ব শৰ্মা। কুমাৰ ভাস্কৰ বৰ্মা সেতু মুকলি হোৱাৰ পিছত মুখ্যমন্ত্ৰীয়ে সামাজিক মাধ্যমত লিখিছে, “আজি মাননীয় প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়াই কামৰূপৰ বিখ্যাত নৃপতি কুমাৰ ভাস্কৰ বৰ্মাৰ নামেৰে নামাংকিত লুইতৰ ওপৰৰ ‘ভাস্কৰ বৰ্মা সেতু’ দেশবাসীৰ উদ্দেশ্যে উৎসৰ্গা কৰা ক্ষণে আমাক ধন্য কৰিলে৷”
মুখ্যমন্ত্ৰীয়ে লগতে লিখিছে, “আপোনালোক ইতিমধ্যে জ্ঞাত যে এই সেতুৱে গুৱাহাটী আৰু উত্তৰ গুৱাহাটীৰ মাজৰ যাত্ৰাৰ সময় ৪০ মিনিটৰ পৰা মাত্ৰ ৭ মিনিটলৈ হ্ৰাস কৰিব৷ প্ৰায় ৩,০০০ কোটি টকাৰ ব্যয়েৰে বহু অত্যাধুনিক সুবিধাৰে সজ্জিত এই সেতুৱে দক্ষিণ-পূব এছিয়াৰ প্ৰৱেশদ্বাৰ হিচাপে পৰিচিত অসমৰ অৰ্থনৈতিক বিকাশত এক নতুন গতি সংযোজন কৰিব।” দলংখনৰ সুবিধাৰ কথা উল্লেখ কৰি মুখ্যমন্ত্ৰীয়ে লিখিছে, “ৰাজধানী চহৰ আৰু উত্তৰ পাৰৰ গুৰুত্বপূৰ্ণ প্ৰতিষ্ঠানসমূহ, যেনে এইমছলৈ যাতায়াত কৰা লোকসকলৰ বাবে সহজ আৰু সুসংহত যোগাযোগ সুনিশ্চিত কৰিব। উল্লেখযোগ্য যে এই বৃহৎ প্ৰকল্পটো অসমৰ লোক নিৰ্মাণ বিভাগৰ দ্বাৰা ৰূপায়ণ কৰা আটাইতকৈ ডাঙৰ প্ৰকল্প।”
মুখ্যমন্ত্ৰীয়ে লগতে অসমৰ উন্নয়নৰ কথা উল্লেখ কৰি লিখিছে, “২০১৪ চনলৈকে ব্ৰহ্মপুত্ৰৰ ওপৰত কেৱল ৩খন সেতু আছিল। যোৱা ১২ বছৰত আন ৪ খন সেতু অসমবাসীৰ বাবে উছৰ্গা কৰা হৈছে৷ জনাবলৈ পাই সুখী হৈছোঁ যে আহিবলগীয়া সময়তো আৰু অধিক সেতু নিৰ্মাণৰ কাম আমি আৰম্ভ কৰিম৷ এয়া আমাৰ ডাবল ইঞ্জিন চৰকাৰৰ দৃঢ় সংকল্প আৰু উন্নয়নৰ স্পষ্ট প্ৰতিফলন।”
