ভাৰতৰ প্ৰধানমন্ত্ৰী নৰেন্দ্ৰ মোদী (Narendra Modi)ক বাংলাদেশৰ নৱনিৰ্বাচি (Bangladesh’s newly elected)ত প্ৰধানমন্ত্ৰী তাৰিক ৰহমান (Prime Minister Tarique Rahman)ৰ শপত গ্ৰহণ (Taking an Oath) অনুষ্ঠানলৈ আমন্ত্ৰণ জনোৱা হ’ব (will be invited)। এই কথা বি এন পিৰ শীৰ্ষ নেতা তথা তাৰিক ৰহমানৰ বৈদেশিক উপদেষ্টা হুমায়ুন কবীৰে সংবাদ মাধ্যম উইনৰ সৈতে হোৱা এক সাক্ষাৎকাৰত উল্লেখ কৰে। অৱশ্যে এই আমন্ত্ৰণ সন্দৰ্ভত কোনো পক্ষৰ পৰা আনুষ্ঠানিক সঁহাৰি পোৱা নাই।
বাংলাদেশৰ ৰাষ্ট্ৰীয় সংসদৰ নিৰ্বাচনৰ ফলাফল স্পষ্ট হোৱাৰ লগে লগে মোদীয়ে ছ’চিয়েল মিডিয়াত বি এন পিৰ মুৰব্বী তাৰিক ৰহমানক অভিনন্দন জনায়। পিছত তেওঁৰ লগত ফোনতো কথা পাতে। সেই কথা উল্লেখ কৰি মোদীয়ে ছ’চিয়েল মিডিয়াত লিখিছে, “তাৰিক ৰহমানৰ সৈতে কথা পাতিবলৈ পাই আমি উৎফুল্লিত হৈছোঁ।” ভাৰত আৰু বাংলাদেশৰ মাজত সম্পৰ্ক আৰু অধিক সুদৃঢ় কৰাৰ ইংগিত দিয়ে মোদীয়ে। সেই সম্পৰ্ক আৰু অধিক সম্প্ৰসাৰণৰ বাবে মোদীক আমন্ত্ৰণ জনোৱা হ’ব বুলিও হুমায়ুনে কয়।
মহম্মদ ইউনুছৰ যুগত ভাৰত আৰু বাংলাদেশৰ মাজত উত্তেজনাৰ সৃষ্টি হয়। অৱশ্যে বি এন পিৰ মতে, “ভাৰত-বাংলাদেশৰ সম্পৰ্ক সংশ্লিষ্ট অঞ্চলটোৰ বাবে অতি গুৰুত্বপূৰ্ণ। এই অঞ্চলটোক প্ৰভাৱশালী কৰি তোলাটোও তাৰিকৰ বৈদেশিক নীতিৰ এক গুৰুত্বপূৰ্ণ অংশ। এই আমন্ত্ৰণো তাৰেই অংশ।” কবীৰে এই আমন্ত্ৰণক দুয়োখন দেশৰ মাজত উন্নত সম্পৰ্ক গঢ়ি তোলাৰ সদিচ্ছাৰ চিন বুলি অভিহিত কৰে। লগতে কয় যে তেওঁলোকে মোদী উপস্থিত থাকিব বুলি আশা কৰিছে।
উল্লেখ্য যে ২০২৪ চনৰ আগষ্ট মাহত শ্বেখ হাছিনা চৰকাৰৰ পতনৰ পিছত বাংলাদেশ আৰু ভাৰতৰ দ্বিপাক্ষিক সম্পৰ্ক অৱনতি ঘটিবলৈ ধৰে। মহম্মদ ইউনুছৰ নেতৃত্বত অন্তৱৰ্তীকালীন চৰকাৰখনে কাৰ্যভাৰ গ্ৰহণ কৰাৰ পিছত সম্পৰ্ক আৰু অধিক অৱনতি ঘটে। বাংলাদেশত স্থায়ী চৰকাৰ গঠন হ’লে চুবুৰীয়া দেশ দুখনৰ মাজৰ সম্পৰ্ক উন্নত হ’ব বুলি ধাৰণা কৰা হৈছে।
অৱশ্যে বাংলাদেশৰ প্ৰধানমন্ত্ৰী হিচাপে তাৰিক ৰহমানৰ শপত গ্ৰহণৰ তাৰিখ এতিয়াও চূড়ান্ত হোৱা নাই। ইউনুছৰ কাৰ্যালয়ৰ সূত্ৰৰ উদ্ধৃতি দি বাংলাদেশৰ সংবাদ মাধ্যম প্ৰথম আলোৱে অহা সোমবাৰ বা মঙলবাৰে নতুন চৰকাৰ গঠন হ’ব পাৰে বুলি প্ৰকাশ কৰিছে। প্ৰধানমন্ত্ৰী আৰু সংসদ সদস্যসকলৰ শপত গ্ৰহণৰ তাৰিখ এতিয়াও ঘোষণা কৰা হোৱা নাই।
