কেৰিবিয়ান সাগৰ (Caribbean Sea)ত এখন জাহাজত পুনৰ আক্ৰমণ আমেৰিকান সেনা (Attack by the American army)ৰ। এই আক্ৰমণত তিনিজন লোক নিহত হয়। আমেৰিকাই দাবী কৰিছে যে এই অভিযানৰ লক্ষ্য আছিল ড্ৰাগছ সৰবৰাহকাৰী (Drug supplier Ship) জাহাজ। বিগত কেইমাহমানৰ পৰা কেৰিবিয়ান সাগৰ আৰু পূব প্ৰশান্ত মহাসাগৰত ইখনৰ পিছত সিখন জাহাজ আক্ৰমণ কৰি আহিছে আমেৰিকাই। আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰিছে যে এই পদক্ষেপ ড্ৰাগছৰ সৰবৰাহ ৰোধৰ বাবে প্ৰয়োজনীয় আছিল। কিন্তু প্ৰশাসনে জাহাজখনত ‘ড্ৰাগছ সৰবৰাহকাৰী’ কঢ়িয়াই অনা বুলি সঠিক প্ৰমাণ দিব নোৱাৰিলে। তেওঁলোক কোন সেই সন্দৰ্ভত কোনো সবিশেষ প্ৰকাশ কৰা নাই আমেৰিকাৰ সেনাই।
আমেৰিকাৰ দক্ষিণ কমাণ্ডে ছ’চিয়েল মিডিয়াত দাবী কৰিছে, “কেৰিবিয়ানত ড্ৰাগছ সৰবৰাহৰ বাবে জনাজাত পথেৰে যাত্ৰা কৰি আছিল জাহাজখন। ই ড্ৰাগছ সৰবৰাহৰ কামত নিয়োজিত আছিল।” আমেৰিকাৰ সামৰিক আক্রমণত তিনিজন লোক নিহত হোৱাৰ কথাও জানিবলৈ দিয়ে৷ ছচিয়েল মিডিয়াত এটা ভিডিঅ’ও প্ৰকাশ কৰা হয়। তাত এখন জাহাজ সাগৰত ওপঙি থকা দেখা গৈছে। হঠাৎ বিস্ফোৰণ ঘটি তাত জুই লাগে।
পৰিসংখ্যাত কোৱা হৈছে যে যোৱা ছেপ্টেম্বৰৰ পৰা আমেৰিকাৰ সেনাই কেৰিবিয়ান সাগৰ আৰু পূব প্ৰশান্ত মহাসাগৰীয় অঞ্চলত জাহাজক লক্ষ্য কৰি ৩৮টা আক্ৰমণ চলাইছে। ইয়াৰ মাজতে ১৩৩ জন লোকে প্ৰাণ হেৰুৱায়। আমেৰিকাই দাবী কৰিছে যে সেই ভেচেল বা জাহাজে ড্ৰাগছ সৰবৰাহ কৰিছিল।
যোৱা সপ্তাহত আমেৰিকাৰ প্ৰতিৰক্ষা মন্ত্ৰী পিট হেগচিটে দাবী কৰিছিল যে কেৰিবিয়ান অঞ্চলত শেহতীয়াকৈ সংঘটিত আক্ৰমণৰ বাবে একাংশ বৃহৎ ড্ৰাগছ সৰবৰাহকাৰীয়ে অনিৰ্দিষ্টকালৰ বাবে অঞ্চলটোত চোৰাং ব্যৱসায় বন্ধ কৰাৰ সিদ্ধান্ত লৈছে। ছ’চিয়েল মিডিয়াত হেগচিটে এই দাবী কৰে। অৱশ্যে তেওঁ এই দাবীৰ সমৰ্থনত কোনো প্ৰমাণ দাঙি ধৰা নাই।
আমেৰিকাৰ ৰাষ্ট্ৰপতি ট্ৰাম্পে কয় যে লেটিন আমেৰিকাৰ ড্ৰাগছ সৰবৰাহকাৰীৰ সৈতে আমেৰিকা ‘সশস্ত্ৰ সংঘাত’ত আছে। তেওঁ দাবী কৰে যে ড্ৰাগছৰ সৰবৰাহ ৰোধৰ বাবে এই আক্ৰমণৰ প্ৰয়োজন আছিল। কিন্তু ট্ৰাম্প প্ৰশাসনে এতিয়াও উক্ত জাহাজখনত ড্ৰাগছ সৰবৰাহ হৈছিল বুলি পৰ্যাপ্ত প্ৰমাণ দিব পৰা নাই।
