বুধবাৰে মহাৰাষ্ট্ৰৰ উপ-মুখ্যমন্ত্ৰী অজিত পাৱাৰ (Ajit Pawar)ৰ বিমান দুৰ্ঘটনাত মৃত্যু (Death in Plane Crash) হয়। বুধবাৰে পুৱা তেওঁৰ বিমানখন বাৰামতী বিমানবন্দৰত অৱতৰণ কৰাৰ সময়তে দুৰ্ঘটনাগ্ৰস্ত হয়। দুৰ্ঘটনা সংঘটিত হোৱাৰ পিছতে অগ্নিকাণ্ড সংঘটিত হয় ব্যক্তিগত বিমানখনত। অজিত পাৱাৰ আৰু বিমানখনত থকা আন চাৰিজন লোকৰ মৃত্যু হয়। পোনতে জ্বলি যোৱা মৃতদেহ কাৰ আছিল সেয়া তৎক্ষণাত স্পষ্ট হোৱা নাছিল। অৱশেষত হাতঘড়ী আৰু কাপোৰ (Wristwatch and clothes) চাই অজিত পাৱাৰৰ মৃতদেহটো চিনাক্ত (Identify the dead body) কৰা হয়।
বুধবাৰে মুম্বাইৰ পৰা বাৰামতীলৈ গৈ আছিল অজিত পাৱাৰ। লিয়াৰজেট ৪৫ মডেলৰ বিমান ‘ভিটি-এছএছকে’ত যাত্ৰা কৰিছিল তেওঁ। বাৰামতী বিমানবন্দৰত অৱতৰণ কৰাৰ সময়তে দুৰ্ঘটনাগ্ৰস্ত হয় বিমানখন। ইয়াৰ কিছু সময়ৰ পিছতে জুই লাগে।
বিমানৰ পথ অনুসৰণ কৰা ফ্লাইট্ৰাডাৰ ২৪ নামৰ ৱেবছাইটটোৱে জনোৱা মতে, মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ বিমানখন দুৰ্ঘটনাগ্ৰস্ত হোৱাৰ পূৰ্বে দুবাৰ অৱতৰণ কৰিবলৈ চেষ্টা কৰিছিল। দ্বিতীয় প্ৰচেষ্টাৰ সময়ত দুৰ্ঘটনাগ্ৰস্ত হয় লিয়াৰজেট ৪৫। বাৰামতী বিমানবন্দৰৰ পৰিচালক শিৱাজী টাৱাড়ে জনোৱা মতে, লিয়াৰজেট ৪৫ বিমানখন অৱতৰণৰ সময়ত ৰাণৱেৰ দাঁতিত দুৰ্ঘটনাগ্ৰস্ত হয়। মাটিত খুন্দা মৰাৰ লগে লগে জুই লাগে।
দুৰ্ঘটনাৰ কাৰণ এতিয়াও স্পষ্ট হোৱা নাই। অনুমান কৰা হৈছে যে সেই সময়ত বাৰামতী বিমানবন্দৰ আৰু কাষৰীয়া অঞ্চলত ঘন কুঁৱলী আছিল। ফলত দৃশ্যমানতাও কম আছিল। একাংশৰ মতে এইটোৱে দুৰ্ঘটনাৰ কাৰণ হ’ব পাৰে। কেন্দ্ৰীয় অসামৰিক বিমান পৰিবহণ মন্ত্ৰী কে ৰামমোহন নাইডুৱেও দৃশ্যমানতা কম বুলি কয়। তেওঁ কয়, ‘ডি জি চি এ (দেশৰ বিমান নিয়ন্ত্ৰক) আৰু এ এ আই বিয়ে (এয়াৰ এক্সিডেণ্ট ইনভেষ্টিগেচন ব’ৰ্ড) দুৰ্ঘটনাটোৰ তদন্ত আৰম্ভ কৰিছে। প্ৰাথমিক তদন্তত দেখা গৈছে যে বিমানখন অৱতৰণ কৰাৰ সময়ত দৃশ্যমানতা কম আছিল।
