বৰফৰ তলত আবদ্ধ হৈ আছে এটা মৃতদেহ। শৰীৰৰ কিছু অংশ বৰফ গলি ওলাই আছে। মৃতদেহটোৰ ঠিক কাষতে বহি থকা দেখা গ’ল এটা পোহনীয়া পিটবুল (Pitbull)। প্ৰচণ্ড বৰফ পৰিছিল। হাড় কপোৱা ঠাণ্ডা আছিল। তাৰ মাজতে পোহনীয়া জন্তুটোৱে মালিকৰ মৃতদেহটোৰ ওচৰতে চাৰিদিন ধৰি বহি থাকিল। এনে এক হৃদয়বিদাৰক ঘটনা পোহৰলৈ আহিছে হিমাচল (Himachal)ৰ চাম্বা জিলাৰ পৰা। শেহতীয়াকৈ পিটবুলৰ হিংসা আৰু আক্ৰমণৰ বহু বাতৰি পোহৰলৈ আহিছে। আনকি ২০২৪ চনত কেন্দ্ৰই ২৩টা জাতৰ কুকুৰৰ প্ৰজনন আৰু বিক্ৰীত নিষেধাজ্ঞা আৰোপ কৰে। তাৰ ভিতৰত পিটবুলো আছিল। কিন্তু হিমাচলৰ এই ঘটনাই পিটবুলৰ বিষয়ে সম্পূৰ্ণ বিপৰীত ছবি দাঙি ধৰিছে। ভৰমৌৰত সংঘটিত হৈছে এই ঘটনা। এই ঠাইখন পাহাৰৰ মাজত যথেষ্ট ওখ ঠাইত অৱস্থিত। জানিব পৰা মতে, যুৱকজনে আগতে নিজৰ পোহনীয়া জন্তুটোৰ সৈতে তাতেই বাস কৰিছিল।
উল্লেখ্য যে বিগত কিছুদিন ধৰি হিমাচলত বৰফ পৰি আছে। পাহাৰৰ ওখ অঞ্চলত বৰফৰ পৰিমাণ বেছি। যোৱা কেইদিনমানৰ পৰা চলি থকা এই হিমশীতল বতৰত যুৱকজন ঘৰৰ পৰা ওলাই গৈছিল। অত্যন্ত ঠাণ্ডাৰ বাবে তেওঁৰ মৃত্যু হোৱা বুলি সন্দেহ কৰা হৈছে। কিন্তু প্ৰাকৃতিক দুৰ্যোগৰ বাবে ঘৰৰ পৰা ওলাই অহা নাই কোনো মানুহ। ফলত গাঁৱৰ কোনেও তেওঁৰ মৃত্যুৰ খবৰ পোৱা নাই।
চাৰিদিন পিছত বতৰ অলপ ভাল হোৱাৰ লগে লগে গাঁৱৰ ৰাইজে দেখিলে যে যুৱকজন ঘৰৰ পৰা কিছু দূৰৈত পৰি আছে। তেওঁৰ মৃতদেহটো বৰফৰ তলত আবদ্ধ হৈ আছিল। কেৱল তেওঁৰ কাপোৰ আৰু শৰীৰৰ কিছু অংশহে দেখা গৈছিল। অৱশ্যে সকলোকে স্তম্ভিত কৰা কথাটো হ’ল, যুৱকজনৰ পোহনীয়া পিটবুলটো মৃতদেহটোৰ কাষতে বহি আছিল। চাৰিদিন ধৰি প্ৰচণ্ড ঠাণ্ডা আৰু ভোকৰ মাজতো পোহনীয়া জন্তুটোৱে মালিকৰ মৃতদেহৰ কাষতে বহি থাকিল। এই খবৰ পোৱাৰ পিছতে ভৰমৌৰত উপস্থিত হয় উদ্ধাৰকাৰী দল। কিন্তু যেতিয়া তেওঁলোকে মৃতদেহটো উদ্ধাৰ কৰিবলৈ চেষ্টা কৰে, তেতিয়া পোহনীয়া জন্তুটোৱে প্ৰথমে আক্ৰমণাত্মক হৈ পৰে। বহু সময়ৰ মূৰত পোহনীয়া জন্তুটোক শান্ত কৰি মৃতদেহটো উদ্ধাৰ কৰিবলৈ সক্ষম হয়। গাঁৱৰ এজন বাসিন্দাই কয়, “পোহনীয়া পিটবুলটোৱে মালিকৰ মৃতদেহটো একেবাৰেই স্পৰ্শ কৰিবলৈ দিয়া নাছিল। ইয়াৰ পিছত বিভিন্ন ধৰণে শান্ত কৰা হয়। পোহনীয়া জন্তুটোক উদ্ধাৰ কৰি লৈ যোৱা হৈছে।”
হিমাচল প্ৰদেশত বিগত কিছুদিন ধৰি প্ৰচণ্ড বৰফ পৰি আছে। সমগ্ৰ ৰাজ্যৰ ১০০০ৰো অধিক পথ বন্ধ কৰি দিয়া হৈছে। বৃহৎ যান-জঁটৰ সন্মুখীন হৈছে পৰ্যটকসকল। ৰাজপথত ৰৈ থাকিবলৈ বাধ্য হৈছে মানুহ। আনকি কিছুমানে খোজকাঢ়িও গৈ আছে গন্তব্যস্থানলৈ। অৱশ্যে আগন্তুক দিনত বৰফৰ পৰিমাণ আৰু অধিক বৃদ্ধি পোৱাৰ আশংকা কৰা হৈছে।
