ভাৰতীয় উচ্চায়ুক্ত আৰু বাংলাদেশৰ অন্যান্য কেন্দ্ৰৰ (India Bangladesh) কৰ্মচাৰীৰ পৰিয়ালক দেশলৈ পঠিয়াবলৈ পৰামৰ্শ দিছে কেন্দ্ৰীয় চৰকাৰে। সূত্ৰৰ উদ্ধৃতি দি এই কথা প্ৰকাশ কৰিছে সংবাদ সংস্থা পি টি আয়ে। সূত্ৰ অনুসৰি, বৈদেশিক পৰিক্ৰমা মন্ত্ৰালয়ে নিৰ্বাচনমুখী বাংলাদেশৰ পৰিস্থিতি বিবেচনা কৰি এই পৰামৰ্শ দিছে।
অৱশ্যে ভাৰতীয় উচ্চায়ুক্ত আৰু বাংলাদেশৰ অন্যান্য কেন্দ্ৰসমূহ খোলা থাকিব বুলিও অৱগত কৰা হৈছে। তাত কামো অব্যাহত থাকিব।বাংলাদেশত ১২ ফেব্ৰুৱাৰীত ভোটদান। তাৰ মাজতে সময়ে সময়ে হিংসাত্মক ঘটনা সংঘটিত হৈ আহিছে।
এনে পৰিস্থিতিত বৈদেশিক পৰিক্ৰমা মন্ত্ৰালয়ে তাত থকা উচ্চায়ুক্ত, সহকাৰী উচ্চায়ুক্ত আৰু অন্যান্য কেন্দ্ৰসমূহৰ কৰ্মচাৰীসকলক পৰামৰ্শ দিছে বুলি সূত্ৰই প্ৰকাশ কৰিছে। বৈদেশিক পৰিক্ৰমা মন্ত্ৰালয়ৰ এক সূত্ৰই জনোৱা মতে, নতুন দিল্লীয়ে কৰ্মচাৰীসকলৰ পৰিয়ালক ঘৰলৈ ঘূৰাই পঠিয়াবলৈ কৈছে। এই সিদ্ধান্তক সতৰ্কতামূলক ব্যৱস্থা হিচাপে গণ্য কৰা হৈছে।
ঢাকাত ভাৰতৰ উচ্চ আয়োগ আছে। ইয়াৰ উপৰি নতুন দিল্লীৰ বাংলাদেশত আৰু চাৰিটা সহকাৰী উচ্চায়ুক্ত আছে। এইকেইটা চট্টগং, ৰাজশাহী, চিলেট আৰু খুলনাত অৱস্থিত। সূত্ৰ অনুসৰি, তাত কৰ্মৰত ভাৰতীয় কৰ্মচাৰীসকলৰ পৰিয়ালকহে ঘৰলৈ ঘূৰাই পঠিয়াবলৈ কোৱা হৈছে।
অৱশ্যে বৈদেশিক পৰিক্ৰমা মন্ত্ৰালয়েও স্পষ্ট কৰি দিছে যে বাংলাদেশৰ সৈতে দূতাবাস আৰু উপ-দূতাবাসৰ কাম পূৰ্বৰ দৰেই চলি থাকিব। এই পৰামৰ্শ কেৱল কৰ্মচাৰী আৰু তেওঁলোকৰ পৰিয়ালৰ সুৰক্ষাৰ স্বাৰ্থত দিয়া হৈছে।
বাংলাদেশত ১২ ফেব্ৰুৱাৰীত নিৰ্বাচনৰ সমান্তৰালকৈ জুলাই চাৰ্টাৰৰ গণভোট অনুষ্ঠিত হ’ব। ১২ ডিচেম্বৰৰ পৰা ২৯ ডিচেম্বৰলৈ মনোনয়ন দাখিল কৰা হৈছে । ৩০ ডিচেম্বৰৰ পৰা ৪ জানুৱাৰীলৈ মনোনয়ন পৰীক্ষাৰ কাম কৰা হৈছে। প্ৰাৰ্থীসকলে ১১ জানুৱাৰীলৈকে মনোনয়ন বাতিল কৰাৰ সিদ্ধান্তৰ বিৰুদ্ধে আবেদন জনাইছে। সেই আবেদনসমূহৰ বৈধতা পৰীক্ষাৰ কাম জানুৱাৰী ১২-১৮ৰ পৰা আৰম্ভ হয়।
বুধবাৰে (২১ জানুৱাৰী) প্ৰকাশ পাব প্ৰাৰ্থীৰ চূড়ান্ত তালিকা আৰু নিৰ্বাচনী চিহ্ন। ২২ জানুৱাৰীৰ পৰা আৰম্ভ হ’ব আনুষ্ঠানিক নিৰ্বাচনী প্ৰচাৰ। ১০ ফেব্ৰুৱাৰীৰ পুৱা ৭.৩০ বজালৈকে চলিব।
উল্লেখ্য যে যোৱা মাহত ঢাকাৰ ৰাজপথত যুৱ নেতা ওছমান হাদীক গুলীয়াই হত্যা কৰা হৈছিল। ইয়াৰ পিছতে বাংলাদেশ উত্তপ্ত হৈ পৰে।
দেশখনত সংখ্যালঘু লোকক হত্যাৰ অভিযোগো উত্থাপন হৈছে। ইয়াৰ ভিতৰত বাংলাদেশ আৰক্ষীৰ ৱেবছাইটৰ তথ্য অনুসৰি, মহম্মদ ইউনুছৰ নেতৃত্বত অন্তৱৰ্তীকালীন চৰকাৰৰ কাৰ্যকালত দেশখনত অপৰাধ বৃদ্ধি পাইছে। ২০২৪ চনৰ তুলনাত ২০২৫ চনত অপহৰণৰ অভিযোগ ৭১ শতাংশ বৃদ্ধি পাইছে। ডকাইতিৰ অভিযোগো প্ৰায় ৩৭ শতাংশ বৃদ্ধি পাইছে।
