গণৰাজ্য দিৱস (Republic day) উদযাপনৰ বাবে মাত্ৰ কেইটামান দিন বাকী। শনিবাৰে ভাৰতীয় চোৰাংচোৱা সংস্থাই এক সতৰ্কবাণী জাৰি (Warning issued) কৰিছে যে খালিস্তানী গোট আৰু বাংলাদেশ সমৰ্থিত সন্ত্ৰাসবাদীয়ে নতুন দিল্লীৰ লগতে দেশৰ আন কেইবাখনো চহৰত আক্ৰমণ চলাবলৈ চেষ্টা কৰিব পাৰে। সংবাদ সংস্থা এ এন আয়ে চৰকাৰী সূত্ৰৰ উদ্ধৃতিৰে জনোৱা মতে, চোৰাংচোৱা ব্যুৰোৱে (আই বি) সকীয়াই দিছে যে পঞ্জাৱৰ গেংষ্টাৰসকলে ‘বিদেশৰ পৰা কাম কৰা খালিস্তানী আৰু সন্ত্ৰাসবাদী গোটৰ অপাৰেটিভ হিচাপে কাম কৰি আছে’। সমগ্ৰ দিল্লীত নিৰাপত্তা অধিক শক্তিশালী কৰা হৈছে।
এই সতৰ্কবাণী অনুসৰি সমগ্ৰ হাৰিয়ানা, দিল্লী-এন চি আৰ, উত্তৰ প্ৰদেশ আৰু ৰাজস্থানত এই সন্ত্ৰাসবাদীসকল সক্ৰিয় হৈ আছে। ক্ৰমান্বয়ে খালিস্তানী সন্ত্ৰাসবাদী সংগঠনৰ সৈতে সম্পৰ্ক স্থাপন কৰিছে। ২৬ জানুৱাৰীত গণৰাজ্য দিৱসৰ পেৰেডৰ পূৰ্বে নিৰাপত্তা কটকটীয়া কৰা হৈছে। দিল্লীৰ উত্তৰ জিলা আৰক্ষীয়ে বিপদজনক আৰু জনবহুল স্থানত ধাৰাবাহিকভাৱে অনুশীলন চলাইছে।
জানুৱাৰী মাহত উত্তৰ দিল্লীৰ স্পৰ্শকাতৰ স্থানত প্ৰায় চাৰিটা অনুশীলন কৰা হৈছে, য’ত আছে লালকিল্লা, আই এছ বি টি কাশ্মীৰ গে’ট, চান্দনী চক, খাৰী বাওলি, সদৰ বজাৰ আৰু মেট্ৰ’ ষ্টেচন। এই অনুশীলনৰ লক্ষ্য আছিল সন্ত্ৰাসবাদ বিৰোধী ব্যৱস্থা শক্তিশালী কৰা আৰু সম্ভাৱ্য সন্ত্ৰাসবাদী কাণ্ডৰ ক্ষেত্ৰত জনসাধাৰণ আৰু সংগঠনসমূহক সজাগ হ’বলৈ সংবেদনশীল কৰা।
গণৰাজ্য দিৱস উদযাপনৰ পথত কমেও ৩০টা পেৰেড প্ৰদৰ্শন কৰা হ’ব, যাৰ ফলত ভাৰতৰ চহকী সাংস্কৃতিক ঐতিহ্য আৰু উন্নয়নমূলক সাফল্যৰ এক জীয়া ছবি দাঙি ধৰা হ’ব। অহা ২৫ জানুৱাৰীৰ পৰা ২৭ জানুৱাৰীলৈ ইউৰোপীয় পৰিষদৰ সভাপতি এণ্টনিঅ’ লুইছ ছান্টোছ দা কোষ্টা আৰু ইউৰোপীয় আয়োগৰ সভাপতি উৰ্চুলা ভন ডেৰ লেয়েনে ভাৰত ভ্ৰমণ কৰিব। প্ৰধানমন্ত্ৰী নৰেন্দ্ৰ মোদীৰ আমন্ত্ৰণত এই ভ্ৰমণৰ আয়োজন কৰা বুলি বৈদেশিক পৰিক্ৰমা মন্ত্ৰালয়ে জানিবলৈ দিয়ে। দুয়োগৰাকী নেতাই ৭৭ সংখ্যক গণৰাজ্য দিৱসৰ পেৰেডত অংশগ্ৰহণ কৰিব, যিটো প্ৰথমবাৰৰ বাবে ইউৰোপীয় সংঘৰ শীৰ্ষ ৰাজনৈতিক নেতৃত্বই একেলগে সন্মানীয় অতিথি হিচাপে এই অনুষ্ঠানত উপস্থিত থাকিব। এই পদক্ষেপে ভাৰত-ইউৰোপীয় ইউনিয়নৰ কৌশলগত অংশীদাৰিত্ব গভীৰ হোৱাৰ সংকেত দিছে। আনুষ্ঠানিক কাৰ্যসূচীৰ উপৰি কোষ্টা আৰু ভন ডেৰ লেয়েনে ২৭ জানুৱাৰীত অনুষ্ঠিত হ’বলগীয়া ১৬ সংখ্যক ভাৰত-ইউৰোপীয় ইউনিয়নৰ শীৰ্ষ সন্মিলনৰ সহ-অধ্যক্ষতা কৰিব। এই ভ্ৰমণৰ সময়ত তেওঁলোকে ৰাষ্ট্ৰপতি দ্ৰৌপদী মুৰ্মুক সাক্ষাৎ কৰিব আৰু প্ৰধানমন্ত্ৰী মোদীৰ সৈতে সীমিত, প্ৰতিনিধি পৰ্যায়ৰ আলোচনাত মিলিত হ’ব।
