এটি শিশু সঘনাই অসুস্থ হৈ পৰিছিল। তেওঁৰ অসুস্থতাৰ বাবে চুবুৰীয়া পৰিয়ালৰ তিনিগৰাকী মহিলাক দোষাৰোপ কৰি মাৰপিট কৰে। গণপ্ৰহাৰৰ ফলত এগৰাকীৰ মৃত্যু হয় আৰু আন দুগৰাকীৰ অৱস্থা সংকটজনক। বিহাৰৰ নৱাড়া জিলা (Navada district of Bihar)ত সংঘটিত হৈছে এই ঘটনা।
আৰক্ষীয়ে জনোৱা মতে, মৃত মহিলাগৰাকীৰ নাম কিৰণ দেৱী (Kiran Devi)। চুবুৰীটোৰ এটা শিশু বাৰে বাৰে অসুস্থ হৈ পৰিছিল। ইয়াৰ বাবে তেওঁৰ পৰিয়ালৰ বিৰুদ্ধে অভিযোগ উত্থাপন হয়। শিশুটিৰ পৰিয়ালে কিৰণ দেৱী আৰু তেওঁৰ দুই আত্মীয়ৰ বিৰুদ্ধে এজাহাৰ দাখিল কৰে। শিশুটিৰ পিতৃ-মাতৃয়ে দাবী কৰা মতে, তিনিগৰাকী মহিলাই ‘ক’লা যাদু’ (Black Magic) কৰি থকাৰ বাবে তেওঁলোকৰ সন্তানটো সঘনাই অসুস্থ হৈ পৰে। এই কথা চুবুৰীটোত বনজুইৰ দৰে বিয়পি পৰে। ইয়াৰ পিছত কিৰণ দেৱী আৰু তেওঁৰ দুই আত্মীয়ক ডাইনী সজাই তীব্ৰ প্ৰহাৰ কৰা বুলি অভিযোগ উত্থাপন হৈছে।
কিৰণ দেৱীৰ পৰিয়ালৰ অভিযোগ, মুকেশ চৌধুৰী, মহেন্দ্ৰ চৌধুৰী, নাটৰু চৌধুৰী, শোভা দেৱী আৰু তেওঁলোকৰ আত্মীয়ই একেলগে ইটা, ৰড আৰু লাঠিৰে আক্ৰমণ কৰে। গুৰুতৰভাৱে আহত হয় কিৰণ দেৱী আৰু তেওঁৰ দুই জায়েক। তেওঁলোকক উদ্ধাৰ কৰি চিকিৎসালয়লৈ লৈ যোৱা হয় যদিও তাতে চিকিৎসাৰ সময়ত এগৰাকীৰ মৃত্যু হয়।
কিৰণৰ আত্মীয় ৰেখা দেৱীয়ে কয় যে তেওঁৰ ওচৰ-চুবুৰীয়া মুকেশ চৌধুৰীৰ সন্তান অসুস্থ হৈ পৰিছে। তেওঁক চিকিৎসকৰ ওচৰলৈ লৈ যোৱা হয়। তাৰ পিছত গম পোৱা যায় যে শিশুটিৰ মগজুৰ সমস্যা হৈছে। কিন্তু ক্ষোভ কিৰণ দেৱীৰ ওপৰত পৰে। চুবুৰীয়াই কিৰণ দেৱী আৰু তেওঁৰ দুই জায়েকক ডাইনী বুলি অভিযোগ উত্থাপন কৰি আক্ৰমণ কৰে।
