ডিফু, ৫ জানুৱাৰীঃ কাৰ্বি জনগোষ্ঠীয় লোকসকলৰ অন্যতম পৰম্পৰাগত পূজা হৈছে ‘ৰংকেৰ কাৰক্লি’ অৰ্থাৎ ৰংকেৰ পূজা (Rongker Puja)৷ প্ৰতিবছৰৰ দৰে এইবেলিও কাৰ্বি আংলং আৰু পশ্চিম কাৰ্বি আংলং দুই পাৰ্বত্য জিলাৰ গাঁৱে গাঁৱে আজি ৫ জানুৱাৰীৰ দিনটোত ৰংকেৰ পূজা অনুষ্ঠিত হোৱা পৰিলক্ষিত হৈছে৷ মূলতঃ কৃষিপ্ৰধান কাৰ্বি জনজাতীয় সমাজখনক বিভিন্ন ৰোগ-ব্যধি, অপায়-অমংগল, অপদেৱতাৰ কু-দৃষ্টিৰ পৰা ৰক্ষা কৰাৰ উদ্দেশ্যেৰে আৰু নিজ নিজ গাঁৱক অপায়-অমংগলৰ পৰা ৰক্ষা কৰাৰ বাবে কাৰ্বি জনগোষ্ঠীয়ে অতীজৰে পৰা ৰংকেৰ পূজা আয়োজন কৰি আহিছে৷
পশ্চিম কাৰ্বি আংলঙৰ বৃহত্তৰ খেৰণি অঞ্চলৰ বিভিন্ন গাঁৱতো এক উখল-মাখল পৰিৱেশত পৰম্পৰাগত ধৰ্মীয় ৰীতি-নীতি আৰু বলি-বিধানেৰে ৰংকেৰ পূজা অনুষ্ঠিত কৰা পৰিলক্ষিত হয়৷ ইয়াৰ লগতে ডিফু চহৰতো বিভিন্ন প্ৰান্তত ৰংকেৰ পূজা উদ্যাপন কৰা পৰিলক্ষিত হয়৷ আনহাতে পৱিত্ৰ ৰংকেৰ পূজা উপলক্ষে দুয়োখন পাৰ্বত্য জিলাৰ জনসাধাৰণলৈ নিজৰ শুভেচ্ছা প্ৰদান কৰি মুখ্য কাৰ্যবাহী সদস্য তুলিৰাম ৰংহাঙে আগন্তুক বৰ্ষই দুয়োখন পাৰ্বত্য জিলালৈ শান্তি-সম্প্ৰিতী আৰু উন্নতি কঢ়িয়াই আনিব বুলি আশা প্ৰকাশ কৰে৷
