দ্বিতীয়াদিনাও উত্তপ্ত হৈ আছে কাৰ্বিভূমি । কাৰ্বি আংলঙৰ অগ্নিগৰ্ভা পৰিস্থিতিয়ে দ্বিতীয় দিনতো ভয়ংকৰ ৰূপ লয় । মন্ত্ৰী ৰণোজ পেগুৰ মধ্যস্থতাত প্ৰতিবাদকাৰীসকলে নিজৰ অনশন প্ৰত্যাহাৰ কৰিলেও কাৰ্বি ৰাইজৰ ক্ষোভ কমা নাই। যাৰ বাবে সোমবাৰে চি ই এম তুলিৰাম ৰংহাঙৰ ঘটনাত অগ্নিসংযোগৰ ঘটনাৰ পিছত মঙলবাৰেও সংঘটিত হয় কেইবাটাও বিক্ষিপ্ত ঘটনা।
বাহনত অগ্নিসংযোগৰ পৰা আৰক্ষীৰ ওপৰত আক্ৰমণলৈকে উত্তাল হৈ আছে কাৰ্বি আংলঙৰ পৰিস্থিতি। পৰিস্থিতি যাতে অধিক অৱনতি হোৱাটো ৰোধ কৰিব পৰা যায় তাৰ বাবে মঙলবাৰে সন্ধিয়া জিলাখনত কৰ্তন কৰা হৈছে ইণ্টাৰনেট সেৱা। পৰিস্থিতি উন্নত নোহোৱালৈকে জিলাখনত ব্যাহত থাকিব ইণ্টাৰনেট সেৱা। জিলা প্ৰশাসনৰ তৰফৰ পৰা এই নিৰ্দেশ জাৰি কৰা হৈছে।
আনহাতে, এই উত্তাল পৰিস্থিতিৰ মাজতে কাৰ্বি আংলঙৰ ৰাইজৰ সৈতে বিজেপি সাংসদ-বিধায়কসকলৰ উপস্থিতিত মঙলবাৰে ডংকামোকত এক শান্তিসভা অনুষ্ঠিত হয়। এই শান্তিসভাত জিলাখনত শান্তি পুনৰ প্ৰতিষ্ঠাৰ ওপৰত আলোচনা কৰা হয়। শতাধিক ৰাইজৰ উপস্থিতিত অনুষ্ঠিত শান্তিসভাত বিজেপিৰ সাংসদ-বিধায়কসকলৰ লগতে কাৰ্বি আংলং স্বায়ত্তশাসিত পৰিষদৰ সদস্যসকলেও অংশগ্ৰহণ কৰি ৰাইজলৈ শান্তি-শৃংখলা অটুট ৰখাৰ আহ্বান জনায়।
কাৰ্বি আংলঙৰ বিথু ৰেংথামা পৰিষদীয় সমষ্টিৰ মণ্ডল বিজেপিৰ উদ্যোগত অনুষ্ঠিত শান্তিসভাত উপস্থিত থাকি সাংসদ অমৰছিং তিছ’ৱে সোমবাৰৰ ঘটনাক গৰিহণা দিয়ে। তেওঁ লগতে কয় যে কাৰ্বি আংলঙৰ ইতিহাসত নোহোৱা ঘটনা ঘটিছে। পি জি আৰ-ভি জি আৰ ভূমিত উচ্ছেদ আইন মতে হ’ব বুলি উল্লেখ কৰি তেওঁ কয় যে বিষয়টো যিহেতু ন্যায়ালয়ৰ বিচৰাধীন হৈ আছে সেয়ে কাৰো হেঁচাত ইয়াৰ সমাধান নহয়। কেৱল সংবিধান মতেহে এই সমস্যা সমাধান হ’ব বুলি তেওঁ উল্লেখ কৰে।
লগতে সোমবাৰৰ ঘটনা যাৰ নিৰ্দেশত সংঘটিত হৈছে তেওঁলোকৰ বিৰুদ্ধে অইনী ব্যৱস্থা গ্ৰহণ কৰা হ’ব বুলি উল্লেখ কৰি এই ঘটনাত তৃতীয় পক্ষ জড়িত থকাৰ কথাও উল্লেখ কৰে।
আনহাতে, এই শান্তিসভাৰ মাজতো পশ্চিম কাৰ্বি আংলঙৰ খেৰণিত উত্তেজনা অব্যাহত আছে।
মঙলবাৰে পৰিস্থিতি নিয়ন্ত্ৰণৰ বাবে মোতায়েন কৰা আৰক্ষীৰ ওপৰত প্ৰতিবাদকাৰীয়ে শিলগুটি নিক্ষেপ কৰে। এই ঘটনাত কেইবাগৰাকীও আৰক্ষী বেয়াকৈ আঘাতপ্ৰাপ্ত হয়। ইয়াৰ ভিতৰত মহিলা আৰক্ষীও আছে। ইফালে পৰিস্থিতি অধিক উত্তপ্ত হৈ পৰাত আৰক্ষীয়ে শূন্যলৈ গুলীচালনা কৰিবলৈ বাধ্য হয়। আঘাতপ্ৰাপ্ত আৰক্ষী জোৱানসকলক চিকিৎসাৰ ব্যৱস্থা কৰা হৈছে। ইয়াৰ লগতে পৰিস্থিতি নিয়ন্ত্ৰণৰ বাবে প্ৰথমে কন্দুৱা গেছ নিক্ষেপ কৰি ব্যৰ্থ হোৱাত শূন্যলৈ গুলীচালনা কৰিবলগা হয়। গুলীচালনাৰ ফলত কেইবাগৰাকী প্ৰতিবাদকাৰী আহত হোৱা বুলিও জানিব পৰা গৈছে।
তেনে পৰিস্থিতিত অসম আৰক্ষীৰ সঞ্চালকপ্ৰধান হৰমিত সিঙে নিজে পৰিস্থিতি নিয়ন্ত্ৰণত নামি পৰিবলগীয়া হয়। ইয়াৰ মাজতে কেইবাগৰাকী সাংবাদিকো আবদ্ধ হৈ পৰা বুলি জানিব পৰা গৈছে।
