ছত্তীশগড়ৰ বস্তাৰ সংমণ্ডলত নিৰাপত্তাৰক্ষীৰ সৈতে হোৱা সংঘৰ্ষত কমেও ১২ জন মাওবাদী নিহত হয়। এই সংঘৰ্ষত ছত্তীশগড় আৰক্ষীৰ জিলা ৰিজাৰ্ভ গাৰ্ড (ডি আৰ জি) বাহিনীৰ তিনিজন সদস্যও নিহত হয়। আন দুজন গুৰুতৰভাৱে আহত হয়। আৰক্ষীয়ে জনোৱা মতে, অতিৰিক্ত বাহিনী দন্তেৱাড়া জিলাৰ সীমান্তৱৰ্তী অঞ্চলত উপস্থিত হৈ ওৰে নিশা অনুসন্ধান অভিযান চলায়।
বুধবাৰে বিয়লি ছত্তীশগড় আৰক্ষীৰ আই জি (বস্তাৰ ৰেঞ্জ) সুন্দৰৰাজ পাটিলিংগমে কয়, “দন্তেৱাড়া আৰু বিজাপুৰৰ ডি আৰ জি, ৰাজ্যিক আৰক্ষীৰ বিশেষ টাস্ক ফ’ৰ্চ আৰু কোব্ৰা (চি আৰ পি এফৰ কমাণ্ডো বাহিনী) সদস্যসকলে এই অভিযানত অংশগ্ৰহণ কৰে।”
নিষিদ্ধ সংগঠন চি পি আই-মাওবাদীৰ সশস্ত্ৰ শাখা পি এল জি এ (পিপ’লছ লিবাৰেচন গেৰিলা আৰ্মী)ৰ আন্দোলনৰ তথ্য লাভ কৰি যৌথ বাহিনীটোৱে অঞ্চলটোত তালাচী অভিযান চলায়। তেওঁ কয় যে এনকাউণ্টাৰ স্থানৰ পৰা ১২ জন মাওবাদীৰ মৃতদেহৰ লগতে এটা ছেল্ফ লোডিং ৰাইফল (এছ এল আৰ), ইনছাছ, .৩০৩ ৰাইফল আৰু বৃহৎ পৰিমাণৰ বিস্ফোৰক উদ্ধাৰ কৰা হৈছে।
