স্মাৰ্টফোনত প্ৰি-ইনষ্টলেচনৰ বাবে ‘সঞ্চাৰ সাথী’ (Sanchar Sathi) এপটো বাধ্যতামূলক কৰাৰ বাবে চৰকাৰে দিয়া নিৰ্দেশনা সম্পৰ্কে আলোচনা কৰিবলৈ এপ’ল আৰু ছেমছাঙে কেন্দ্ৰীয় চৰকাৰক সাক্ষাৎ কৰিবলৈ সাজু হৈছে। চৰকাৰী সূত্ৰই জনোৱা মতে, নৰেন্দ্ৰ মোদী চৰকাৰৰ নিৰ্দেশৰ কিছু পৰিৱৰ্তন সন্দৰ্ভত তাতেই আলোচনা হ’ব পাৰে।
সংবাদ সংস্থা পি টি আয়ে প্ৰকাশ কৰা এক প্ৰতিবেদন অনুসৰি, এপ’লে সঞ্চাৰ সাথী এপটোৰ প্ৰি-ইনষ্টলেচনৰ নিৰ্দেশনাৰ বিষয়ে আলোচনা কৰি ‘মধ্যম পন্থা’ বিচাৰি উলিয়াবলৈ চেষ্টা কৰিব। এপ’লে এই নিৰ্দেশনা বৰ্তমানৰ ৰূপত কাৰ্যকৰী কৰিবলৈ সন্মত নহ’বও পাৰে বুলি প্ৰতিবেদনত দাবী কৰা হৈছে।
কেন্দ্ৰীয় নিৰ্দেশনা অনুসৰি, অহা ৯০ দিনৰ ভিতৰত ভাৰতত নিৰ্মিত বা আমদানি কৰা সকলো মোবাইল ফোনত ‘সঞ্চাৰ সাথী’ এপটো প্ৰি-ইনষ্টলেচন বাধ্যতামূলক হ’ব। প্ৰতিটো মোবাইল ফোন নিৰ্মাতা বা আমদানিকাৰীয়ে আগন্তুক ১০০ দিনৰ ভিতৰত কেন্দ্ৰলৈ প্ৰতিবেদন প্ৰেৰণ কৰিব লাগিব।
কিন্তু এই নিৰ্দেশনা কাৰ্যকৰী কৰাত এপ’ল কৰ্তৃপক্ষৰ আপত্তি আছে বুলি মঙলবাৰে সংবাদ সংস্থা ৰয়টাৰে প্ৰকাশ কৰা এক প্ৰতিবেদনত প্ৰকাশ পাইছে। উল্লেখ্য যে ২৮ নৱেম্বৰত কেন্দ্ৰীয় টেলিকম মন্ত্ৰালয়ে সকলো ফোন নিৰ্মাতাক ভাৰতত বিক্ৰী হোৱা সকলো ফোনতে ‘সঞ্চাৰ সাথী’ এপ প্ৰি-ইনষ্টল কৰিবলৈ নিৰ্দেশ দিছিল। ইয়াৰ পিছতে বিতৰ্ক আৰম্ভ হয়। বিষয়টোক লৈ বিৰোধীয়ে প্ৰশ্ন উত্থাপন কৰিবলৈ আৰম্ভ কৰে। এই এপটোৰ জৰিয়তে নাগৰিকৰ ‘ব্যক্তিগত অৱস্থান’ নিৰীক্ষণ কৰা হ’ব বুলিও অভিযোগ উত্থাপন হয়।
কংগ্ৰেছ সাংসদ প্ৰিয়ংকা গান্ধীয়ে সঞ্চাৰ সাথীক ‘স্নুপিং এপ’ বুলি অভিহিত কৰি এপ ব্যৱহাৰ কৰিলে ব্যৱহাৰকাৰীৰ গোপনীয়তা খৰ্ব হ’ব বুলি অভিযোগ উত্থাপন কৰে। এনে পৰিপ্ৰেক্ষিতত তথ্য আৰু সম্প্ৰচাৰ মন্ত্ৰী জ্যোতিৰাদিত্য সিন্ধিয়াই মঙলবাৰে কয় যে যদি ফোনটোৰ ব্যৱহাৰকাৰীয়ে এই এপটো ব্যৱহাৰ কৰিব নিবিচাৰে তেন্তে তেওঁলোকে ইয়াক ডিলিট কৰিব পাৰে।
তেওঁ কয়, “এক্টিভেট নকৰিব। যদি আপুনি ফোনত ৰাখিব বিচাৰে তেন্তে ৰাখক। ডিলিট কৰিব বিচাৰিলে কৰক।” সঞ্চাৰ সাথী এপ সন্দৰ্ভত বিৰোধীয়ে উত্থাপন কৰা চোৰাংচোৱাগিৰিৰ অভিযোগ নাকচ কৰি জ্যোতিৰাদিত্যই কয় যে এয়া সম্পূৰ্ণৰূপে গ্ৰাহক সুৰক্ষাৰ বিষয়। কোনো বাধ্যতামূলক কথা নাই।
