ৰাজা ৰঘুবংশী হত্যাকাণ্ডৰ (Raja Raghuvansi murder) নতুন তথ্য পোহৰলৈ আহিছে। আৰক্ষীয়ে জনোৱা মতে, প্ৰমাণ আঁতৰাবলৈ ৰাজাক হত্যা কৰিবলৈ ব্যৱহাৰ কৰা অস্ত্ৰৰ তেজৰ দাগ মচিবলৈ সোণম আৰু আন অভিযুক্তই কোনো কাপোৰ বা কাগজ ব্যৱহাৰ কৰা নাছিল।
যাতে আৰক্ষীয়ে কোনো সূত্ৰ নাপায়, তাৰ বাবে গছৰ পাত আৰু বনৰীয়া ঘাঁহেৰে অস্ত্ৰৰ পৰা তেজৰ দাগ মচি পেলোৱা হৈছিল। আৰু এই কামটো অতি সচেতনভাৱে আৰু সাৱধানে কৰা হৈছিল।
আৰক্ষীৰ এক সূত্ৰই জনোৱা মতে, ষড়যন্ত্ৰত ৰাজাক সম্পূৰ্ণৰূপে হত্যা কৰা হৈছে। কিন্তু তদন্তৰ সময়ত আৰক্ষীক যিটোৱে স্তম্ভিত কৰি তুলিছিল সেয়া হ’ল, হত্যাকাণ্ডৰ পিছত সোণমে নিজেই হত্যাৰ অস্ত্ৰৰ তেজ মচি পেলাইছিল।
লগতে আৰক্ষীয়ে গম পায় যে হত্যাকাণ্ডৰ পিছত সোণমে ৰাজাৰ মোবাইল ফোনটো একেটা অস্ত্ৰৰে ধ্বংস কৰিছিল, যাতে তেওঁৰ অৱস্থান চিনাক্ত কৰিব পৰা নাযায়। আৰক্ষীৰ সূত্ৰৰ পৰা জানিব পৰা মতে, আকাশ নামৰ আন এজন অভিযুক্তই নিজৰ তেজৰ দাগ পৰা কাপোৰবোৰ খাৱৈত পেলাই দিয়ে। ভাড়াতীয়া হত্যাকাৰী বিকিক ২০ হাজাৰ টকা দিয়ে সোণমে। ইয়াৰ পিছত তেওঁ বোৰ্খা পিন্ধি শ্বিলঙৰ পৰা পলায়ন কৰে।
আৰক্ষীয়ে জনোৱা মতে, শ্বিলঙৰ পৰা কেইবাটাও পথ সলনি কৰি সোণম ইন্দোৰ পায়গৈ। তাতেই তেওঁ প্ৰেমিক ৰাজ কুশৱাহাৰ ঘৰত ৩-৪ দিন আছিল। কাৰণ সেই সময়ত ৰাজৰ মাতৃ আৰু ভনীয়েক ঘৰত নাছিল। ৩-৪ দিনৰ মূৰত ৰাজে সোণমক লৈ যায় ইন্দোৰৰ দেৱাছৰ এটা ফ্লেটলৈ।
তাত উপস্থিত হোৱাৰ লগে লগে সোণমে মোবাইলৰ ছিম খুলি ৰাজক দিয়ে। ৰাজে তেওঁৰ বাবে নতুন ছিম কাৰ্ডৰ ব্যৱস্থা কৰি দিয়ে। সোণমক লৈ যোৱা ইন্দোৰৰ ফ্লেটটো আন এজন অভিযুক্ত বিকিৰ। তেওঁ বাহিৰলৈ ওলাই গ’লে ফ্লেটটোত তলা মাৰি থৈছিল যাতে কোনেও গম নাপায় যে ভিতৰত কোনোবা আছে।
উল্লেখ্য যে সোণম, ৰাজ, বিশাল, আকাশ আৰু আনন্দ এই পাঁচজন অভিযুক্তৰ বিৰুদ্ধে আৰক্ষীয়ে আদালতত ৭৯০ পৃষ্ঠাৰ অভিযোগনামা দাখিল কৰিছে। আৰক্ষী সূত্ৰই জনোৱা মতে, আন তিনিজন অভিযুক্ত ছিলাম জেমছ, লোকেন্দ্ৰ টোমাৰ আৰু বলবীৰ আহিৰৱাৰৰ বিৰুদ্ধে অভিযোগনামা প্ৰস্তুত কৰি দাখিল কৰাৰ প্ৰস্তুতি চলি আছে।
উল্লেখ্য, যোৱা মে’ মাহত ৰাজৰ পত্নী সোণমৰ বিৰুদ্ধে হত্যাৰ অভিযোগ উত্থাপন হৈছিল। অভিযোগ অনুসৰি, সোণম আৰু তেওঁৰ প্ৰেমিকে ৰাজক হত্যা কৰিবলৈ ভাড়াতীয়া হত্যাকাৰী নিয়োগ কৰিছিল। ইয়াৰ পিছতে তেওঁৰ মৃতদেহ এটা খাৱৈত পেলাই দিয়ে।
