আৰু মাত্ৰ কেইটামান ঘণ্টাৰ পিছতে অৰ্থাৎ শুকুৰবাৰে সমগ্ৰ দেশজুৰি মুক্তিলাভ কৰিব জুবিন গাৰ্গৰ সপোনৰ ছবি ‘ৰৈ ৰৈ বিনালে’ (Roi Roi Binale) ।
অসমৰ প্ৰতিটো ছবিগৃহৰ উপৰি দেশৰ আন আন প্ৰান্ততো মুক্তিলাভ কৰিব জুবিন গাৰ্বৰ অন্তিমখন তথা মুক্তিৰ পূৰ্বেই অভিলেখ গঢ়া ছবিখনে। অসমীয়া ছবিৰ ইতিহাসত প্ৰথমবাৰৰ বাবে পুৱা ৫ বজাৰ পৰা আৰম্ভ হ’ব ৰৈ ৰৈ বিনালেৰ দৰ্শনী।
ইতিমধ্যে প্ৰায় এসপ্তাহৰ বাবে ছবিখনৰ প্ৰতিটো দৰ্শনীৰ টিকট বুকিং শেষ হৈছে। ইফালে চলচ্চিত্ৰ বিতৰক সংস্থা ইউ এফ অ’ৰ পূব মণ্ডলৰ মুৰব্বী সৌৰভ দত্তই জনোৱা মতে, বুধবাৰৰ সন্ধিয়ালৈ প্ৰাপ্ত তথ্য মতে, উত্তৰ-পূৰ্বাঞ্চলৰ প্ৰায় ৯১ খন আৰু বাহিৰৰ প্ৰায় ৮৫ খন স্ক্ৰীণত ছবিখনে শুকুৰবাৰে মুক্তিলাভ কৰিব।
এই সংখ্যা বৃদ্ধি হোৱাৰ সম্ভাৱনা থকা বুলি উল্লেখ কৰি তেওঁ লগতে কয় যে প্ৰতিদিনে প্ৰায় ডেৰ লাখ দৰ্শকে ৰৈ ৰৈ বিনালে ছবিখন উপভোগ কৰিব। ইয়াৰ উপৰি ছবিখন তিনি-চাৰি মাহলৈ ছবিগৃহত চলি থকাৰ সম্ভাৱনীয়তাৰ কথাও তেওঁ প্ৰকাশ কৰে।
