দশমীৰ (Vijaya Dashami) দিনা মূৰ্তি বিসৰ্জনৰ সময়ত সংঘটিত দুৰ্ঘটনাত ট্ৰেক্টৰ-ট্ৰলী এখন পুখুৰীত বাগৰি পৰে। তাত মূৰ্তি বিসৰ্জন দিবলৈ অহা কেইবাজনো লোক আছিল। এই দুৰ্ঘটনাত ১০ জন লোকৰ মৃত্যু হয়।
এতিয়াও সন্ধানহীন হৈ আছে কেইবাজনো। মৃতকৰ অধিকাংশই শিশু।
বৃহস্পতিবাৰে মধ্যপ্ৰদেশৰ খাণ্ডোৱা জিলাৰ পান্ধনা অঞ্চলত সংঘটিত হয় এই দুৰ্ঘটনা। সংবাদ মাধ্যমৰ সূত্ৰ অনুসৰি, একেখন জিলাৰ দুখন গাঁৱৰ বাসিন্দাৰ এটা অংশই স্থানীয় পুখুৰীত দুৰ্গা মূৰ্তি বিসৰ্জন দিবলৈ গৈছিল।
ট্ৰেক্টৰ-ট্ৰলীত লৈ যোৱা হৈছিল মূৰ্তিটো। লগত আছিল বহু গাঁওবাসী। আনহাতে, ট্ৰেক্টৰ-ট্ৰলীখনত কমেও ২০-২৫জন লোক আছিল। বিসৰ্জনৰ পথত চালকে এটা পুখুৰীৰ এটা কালভাৰ্টত ট্ৰেক্টৰখন ৰখায়। কিন্তু ট্ৰেক্টৰ-ট্ৰলীখনে বোজা সহ্য কৰিব নোৱাৰি হঠাতে পুখুৰীত বাগৰি পৰে।
ঘটনা সংঘটিত হোৱাৰ লগে লগে স্থানীয় ৰাইজে প্ৰথমে উদ্ধাৰৰ কাম আৰম্ভ কৰে। আৰক্ষীকো খবৰ দিয়া হয়। আৰক্ষীৰ সূত্ৰ মতে, এই পৰ্যন্ত ১০ জন লোকৰ পানীত ডুব যোৱাৰ ফলত মৃত্যু হৈছে। আৰক্ষী বিষয়াসকলে আশংকা কৰিছে যে এতিয়াও কিছু লোক ট্ৰেক্টৰ-ট্ৰলীত আবদ্ধ হৈ আছে।
ফলত মৃত্যুৰ সংখ্যা বৃদ্ধি পাব পাৰে। আনহাতে, উজ্জয়িনী জিলাৰ ইংগোৰিয়া থানা এলেকাত অনুৰূপ দুৰ্ঘটনা সংঘটিত হয়। জানিব পৰা মতে, চাম্বাল নদীত মূৰ্তি কঢ়িয়াই নিয়া ট্ৰেক্টৰ-ট্ৰলীখন বাগৰি পৰাত দুজন লোকৰ মৃত্যু হয়।
আন কেইবাজনো আহত হয়। মধ্যপ্ৰদেশৰ মুখ্যমন্ত্ৰী মোহন যাদৱে এই দুটা ঘটনাক লৈ শোক প্ৰকাশ কৰে। তেওঁ নিজৰ এক্স হেণ্ডেলত সংঘটিত হোৱা দুটা দুৰ্ঘটনাৰ কথা উল্লেখ কৰি মৃতকৰ পৰিয়াললৈ চাৰি লাখ টকাকৈ আৰ্থিক সাহায্য দিয়াৰ কথা ঘোষণা কৰে।
