দক্ষিণ ভাৰতৰ অন্যতম পবিত্ৰ ধৰ্মীয় স্থান কৰ্ণাটকৰ (Karnataka Temple Controversy) ধৰ্মস্থল মন্দিৰ এতিয়া তীব্ৰ উত্তেজনাৰ কেন্দ্ৰবিন্দু। এগৰাকী প্ৰাক্তন অনাময় কৰ্মীৰ বিস্ফোৰক অভিযোগে উদঙাই দিছে সম্ভাৱ্য ভয়ানক হত্যাকাণ্ড।
বৰ্তমান আদালতত সুৰক্ষিত সাক্ষী হিচাপে পৰিগণিত হোৱা দলিত লোকজনে কয় যে ১৯৯৫ চনৰ পৰা ২০১৪ চনলৈকে প্ৰায় দুটা দশকৰ সময়ছোৱাত তেওঁ বহু মহিলা, ছোৱালী আৰু কিছুমান দুখীয়া পুৰুষকে ধৰি শ শ মৃতদেহ সমাধিস্থ কৰিছিল। ইয়াৰে বহুতকে ধৰ্ষণ আৰু হত্যা কৰা হৈছিল।
৪৮ বছৰীয়া যুৱকজনে ১২ বছৰ আত্মগোপন কৰি থকাৰ পিছত ৩ জুলাইত কৰ্ণাটক আৰক্ষীৰ ওচৰত আত্মসমৰ্পণ কৰে। তেওঁ এক বিবৃতিত কয়, “এই হত্যাকাণ্ডৰ স্মৃতি, মোক দিয়া মৃত্যুৰ ভাবুকি আৰু মোক কৰা নৃশংস প্ৰহাৰৰ বাবে মই আৰু মৌন হৈ থাকিব নোৱাৰো। এতিয়া মই এই সমাধিস্থলীবোৰৰ সন্ধান দিব বিচাৰিছো।”
নদীৰ পাৰত, হাবিত আনকি মন্দিৰৰ ওচৰৰ নিৰ্জন স্থানতো মৃতদেহ সমাধিস্থ কৰিবলৈ নিৰ্দেশ দিয়া বুলিও তেওঁ কয়। কেতিয়াবা পেট্ৰ’ল বা ডিজেল ঢালি মৃতদেহবোৰ জুই লগাবলৈ হেঁচা দিয়া হৈছিল। কিছুমান মৃতদেহত এচিডৰ জ্বলা চিন আছিল আৰু বহু ছোৱালীৰ অন্তৰ্বাস বা কাপোৰ নাছিল। তেওঁ কয়, “মৃতদেহবোৰত ধৰ্ষণ আৰু হিংসাৰ স্পষ্ট চিন আছিল।”
সাক্ষ্য অনুসৰি, ২০১০ চনত তেওঁ স্কুলৰ ইউনিফৰ্ম পৰিহিত এগৰাকী ছোৱালীৰ মৃতদেহ সমাধিস্থ কৰিবলৈ বাধ্য হৈছিল। ছোৱালীজনীৰ ডিঙিত চেপি ধৰাৰ চিন আছিল আৰু তেওঁৰ বেগটোও পুতি থোৱা হৈছিল। আন এটা ঘটনাত এগৰাকী যুৱতীৰ মুখত এচিড ঢালি দিয়াৰ ফলত বিকৃতি ঘটিছিল, যিটো আছিল এক ভয়ংকৰ স্মৃতি।
ইফালে এই ঘটনাৰ পিছতে কৰ্ণাটকৰ কংগ্ৰেছ চৰকাৰে জনসাধাৰণৰ দাবীৰ সন্মুখত বিশেষ তদন্তকাৰী দল (SIT) গঠন কৰিছে। ২০০৩ চনত নিৰুদ্দেশ হোৱা চিকিৎসা বিজ্ঞানৰ ছাত্ৰী অনন্যা ভাটৰ মাতৃ সুজাতা ভাটে ইতিমধ্যে নতুনকৈ এজাহাৰ দাখিল কৰিছে।
দীৰ্ঘদিন ধৰি তেওঁ দাবী কৰি আহিছিল যে তেওঁৰ কন্যাক মন্দিৰৰ ওচৰৰ কোনোবাই ধৰ্ষণ কৰি হত্যা কৰিছিল। তেওঁৰ কাতৰ অনুৰোধ আছিল, “যদি ছোৱালীজনীৰ অৱশিষ্ট পোৱা যায়, তেতিয়া অন্ততঃ মই তেওঁক এটা মৰ্যাদাপূৰ্ণ শেষ ৰীতি-নীতি দিব পাৰিম।”
ইতিহাসলৈ উভতি গ’লে এটা কথা দেখা যায় যে মন্দিৰটোক কেন্দ্ৰ কৰি ধৰ্ষণ আৰু হত্যাৰ অভিযোগ নতুন নহয়। ১৯৮৭ চনত পদ্মলতা নামৰ কিশোৰী এগৰাকীক ধৰ্ষণ আৰু হত্যাৰ ঘটনাক কেন্দ্ৰ কৰি আন্দোলন আৰম্ভ হৈছিল, যাৰ বিচাৰ এতিয়াও আধৰুৱা হৈ আছে।
২০১২ চনত ১৭ বছৰীয়া সৌজন্যাক ধৰ্ষণ কৰি হত্যা কৰা হৈছিল, যাৰ তদন্ত এতিয়াও বিতৰ্কিত হৈ আছে। সেই সময়তো মন্দিৰ কৰ্তৃপক্ষৰ ভূমিকাক লৈ প্ৰশ্ন উত্থাপন হৈছিল।
উল্লেখ্য যে পদ্ম বিভূষণ তথা ৰাজ্যসভাৰ মনোনীত সাংসদ বীৰেন্দ্ৰ হেগ্গাৰ নেতৃত্বত হেগ্গা পৰিয়ালে এই মন্দিৰটো পৰিচালনা কৰে। বিজেপিৰ সমৰ্থিত এই প্ৰভাৱশালী পৰিয়ালটোৱে মন্দিৰ আৰু ইয়াৰ আশেপাশে থকা অঞ্চলত অপৰিসীম প্ৰভাৱ পেলাইছে। ২০১২ চনত সৌজন্যাৰ হত্যাকাণ্ডতো তেওঁলোকৰ নাম আহিছিল যদিও কোনো প্ৰমাণ পোৱা নগ’ল।
ইফালে ২০ জুলাইত মন্দিৰ কৰ্তৃপক্ষই এক বিবৃতিত কয়, “আমি এটা স্বচ্ছ আৰু নিৰপেক্ষ তদন্ত বিচাৰো। সমাজৰ নৈতিক ভেটি সত্য আৰু বিশ্বাসৰ ওপৰত ভিত্তি কৰি গঢ় লৈ উঠিছে। আমাৰ আন্তৰিক আশা যে প্ৰকৃত সত্য এছ আই টিৰ জৰিয়তে প্ৰকাশ পাব।”
এই ভয়াৱহ অভিযোগে সমগ্ৰ দেশতে শোক আৰু ক্ষোভৰ প্ৰতিক্ৰিয়াৰ সৃষ্টি কৰিছে যদিও কৰ্ণাটকৰ এই পবিত্ৰ তীৰ্থস্থানক আগুৰি থকা দলবদ্ধ ধৰ্ষণ, হত্যা আৰু মৃতদেহ নিৰুদ্দেশ কৰাৰ অভিযোগে ইতিহাসৰ এক ভয়ানক অধ্যায় উন্মোচন কৰাৰ দিশত আগবাঢ়িছে।
বহু বছৰ ধৰি লুকাই থকা ভয়ংকৰ সত্য যদি সঁচাকৈয়ে পোহৰলৈ আহে, তেন্তে সেয়া হ’ব ভাৰতৰ স্বাধীনোত্তৰ যুগৰ অন্যতম নৃশংস অপৰাধ বুলি মানৱ অধিকাৰ কৰ্মীসকলে উল্লেখ কৰে।
