সীমান্ত একেটা, কিন্তু ‘শত্ৰু’ তিনিটা। ‘অপাৰেচন সিন্দুৰ’(Operation Sindoor)ৰ সময়ত ভাৰতে তিনি প্ৰতিপক্ষৰ সন্মুখীন হ’বলগীয়া হৈছিল। এই কথা প্ৰকাশ কৰিছে ভাৰতীয় সেনাৰ উপ-সেনা প্ৰধান লেফটেনেণ্ট জেনেৰেল ৰাহুল আৰ সিঙে। তেওঁ কয় যে ভাৰতৰ সৈতে সংঘাতৰ সময়ত দুখন দেশে পাকিস্তানক সহায় কৰি আছিল। ইয়াৰ বাবেই ভাৰতৰ প্ৰতিবন্ধকতা বৃদ্ধি পায়।
সেনা বিষয়াসকলে পাকিস্তানৰ ভিতৰত ৯টা সন্ত্ৰাসবাদী শিবিৰ কেনেদৰে চিনাক্ত কৰিছিল আৰু তাত আক্ৰমণৰ পৰিকল্পনা কেনেদৰে কৰা হৈছিল সেই সন্দৰ্ভত ৰাহুলে বিতংভাৱে প্ৰকাশ কৰে। ফেডাৰেচন অব ইণ্ডিয়ান চেম্বাৰ্ছ অব কমাৰ্চ এণ্ড ইণ্ডাষ্ট্ৰিজে আয়োজন কৰা এক অনুষ্ঠানত অংশগ্ৰহণ কৰি তেওঁ এই মন্তব্য কৰে।
তেওঁ কয়, “আমাৰ সন্মুখত সীমান্ত এটা আছিল। কিন্তু প্ৰতিপক্ষ আছিল দুটা, আচলতে তিনিটা। সমুখত পাকিস্তান আছিল। চীনে তেওঁলোকক সকলো দিশতে সহায় কৰি আছিল। পাকিস্তানৰ সামৰিক হাৰ্ডৱেৰৰ ৮১ শতাংশ চীনৰ পৰা আহে। অস্ত্ৰও চীনৰ পৰা আহিছে। আচলতে চীনে পাকিস্তানৰ জৰিয়তে নিজৰ অস্ত্ৰৰ শক্তি পৰীক্ষা কৰে। তেওঁলোকে পাকিস্তানক ‘লাইভ লেব’ হিচাপে ব্যৱহাৰ কৰে।” এতিয়া কথা হ’ল পাকিস্তান আৰু চীন যদি দুই শত্ৰু হয়, তেন্তে তৃতীয় বিৰোধী কোন?
ইয়াৰ উত্তৰত তেওঁ কয় যে চীনৰ বাহিৰেও তুৰস্কই পাকিস্তানক সহায় কৰিছিল। সেনাধ্যক্ষগৰাকীয়ে কয়, “পাকিস্তানক সহায় কৰাত তুৰস্কয়ো গুৰুত্বপূৰ্ণ ভূমিকা পালন কৰিছিল। যেতিয়া ডি জি এম অ’ পৰ্যায়ৰ আলোচনা চলি আছিল, তেতিয়া পাকিস্তানে চীনৰ পৰা বহু তথ্য লাভ কৰিছিল। আমাক অধিক শক্তিশালী বায়ু প্ৰতিৰক্ষা ব্যৱস্থাৰ প্ৰয়োজন।”
পাকিস্তানত লক্ষ্য চিনাক্ত কৰা সন্দৰ্ভত সেনা বিষয়াগৰাকীয়ে কয়, “অপাৰেচন সিন্দুৰৰ পৰা আমি বহু কথা শিকিছো। আমাৰ প্ৰযুক্তি আৰু চোৰাংচোৱাৰ উৎসৰ জৰিয়তে সংগ্ৰহ কৰা তথ্যৰ ভিত্তিত লক্ষ্য নিৰ্বাচন কৰা হৈছিল। আমি প্ৰথমে ২১ টা স্থান চিনাক্ত কৰিছিলো। ইয়াৰে ৯ টা স্থানত আক্ৰমণ কৰা উচিত যেন লাগিছিল। শেষ মুহূৰ্তত সিদ্ধান্ত চূড়ান্ত কৰা হৈছিল।”
পৰিসংখ্যা অনুসৰি, ২০১৫ চনৰ পৰা চীনে পাকিস্তানক ৮০০ কোটি ডলাৰৰ অস্ত্ৰ বিক্ৰী কৰিছে। ২০২০ চনৰ পৰা ২০২৪ চনৰ ভিতৰত চীন বিশ্বৰ চতুৰ্থ বৃহত্তম অস্ত্ৰ ৰপ্তানিকাৰক দেশ আছিল।
ইয়াৰে ৬৩ শতাংশ ৰপ্তানি পাকিস্তানলৈ গৈছিল। চীনৰ অস্ত্ৰৰ সৰ্বাধিক ক্ৰেতা দেশ পাকিস্তান। পাকিস্তানে ব্যৱহাৰ কৰা যুদ্ধ বিমানসমূহৰ অধিকাংশই আৰু ভাৰতৰ সৈতে সংঘাতৰ সময়ত ব্যৱহাৰ কৰা বিমানসমূহো চীনৰ পৰা আহিছিল।
