মেঘালয়ত মধুচন্দ্ৰিকাৰ সময়ত হত্যাকাণ্ডৰ তদন্তত সোণম ৰঘুবংশীৰ তথাকথিত ‘প্ৰেমিক’কো গ্ৰেপ্তাৰ আৰক্ষীৰ। মধ্যপ্ৰদেশৰ ইন্দোৰৰ পৰা ৰাজ সিং কুশৱাহাক গ্ৰেপ্তাৰ কৰা হৈছে (Indore Couple Case)। দেওবাৰে নিশা ইন্দোৰত মেঘালয় আৰক্ষী আৰু মধ্যপ্ৰদেশ আৰক্ষীৰ এটা দলে যৌথ অভিযান চলাই কুশৱাহাক গ্ৰেপ্তাৰ কৰে।
এই কথা সোমবাৰে বিয়লি মেঘালয়ৰ পূব খাচি জিলাৰ আৰক্ষী অধীক্ষক বিবেক ছিয়েমে ঘোষণা কৰে। সোমবাৰে পুৱা উত্তৰ প্ৰদেশৰ গাজীপুৰ থানাত আত্মসমৰ্পণ কৰে সোণমে। ইতিমধ্যে তেওঁক গ্ৰেপ্তাৰ কৰা হৈছে। সেই সময়ত তিনিজন লোকক গ্ৰেপ্তাৰ কৰাৰ প্ৰাৰম্ভিক খবৰ পোৱা গৈছিল। কিন্তু সেই সময়ত তেওঁলোকৰ পৰিচয় ৰাজহুৱা কৰা হোৱা নাছিল।
বিয়লি পূব খাচি জিলা আৰক্ষী অধীক্ষকে জনোৱা মতে, ২১ বছৰীয়া কুশৱাহাৰ উপৰি ইন্দোৰৰ পৰা বিশাল সিং চৌহান নামৰ ২২ বছৰীয়া এজন যুৱককো গ্ৰেপ্তাৰ কৰা হৈছে। তদুপৰি, উত্তৰ প্ৰদেশৰ ললিতপুৰত অভিযান চলাই আকাশ ৰাজপুত নামৰ এজন ১৯ বছৰীয়া অভিযুক্তক গ্ৰেপ্তাৰ কৰে।
আৰক্ষী অধীক্ষকে জনোৱা মতে, আকাশক প্ৰথমে ললিতপুৰৰ পৰা গ্ৰেপ্তাৰ কৰা হৈছিল। ইয়াৰ পিছত কুশৱাহা আৰু বিশালক ইন্দোৰৰ পৰা গ্ৰেপ্তাৰ কৰা হয়। আৰক্ষীৰ অভিযান আৰম্ভ হোৱাৰ পিছতে উত্তৰ প্ৰদেশৰ গাজীপুৰ থানাত আত্মসমৰ্পণ কৰে সোণমে।
পিছত এই ঘটনাত সোমবাৰে বিয়লি মধ্যপ্ৰদেশৰ সাগৰ জিলাৰ পৰা আন এজন অভিযুক্তক গ্ৰেপ্তাৰ কৰা হয়। ইয়াৰ লগে লগে মধুচন্দ্ৰিকাত হত্যাকাণ্ডৰ তদন্তত মুঠ ৫ জন লোকক গ্ৰেপ্তাৰ কৰা হৈছে। ইতিমধ্যে সোণমক নিজৰ জিম্মাত ল’বলৈ উত্তৰ প্ৰদেশলৈ ৰাওনা হৈছে মেঘালয় আৰক্ষীৰ এটা সুকীয়া দল।
যোৱা ২৩ মে’ত অভিযুক্তই ৰাজা ৰঘুবংশীক হত্যা কৰা বুলি মেঘালয় আৰক্ষীয়ে সন্দেহ প্ৰকাশ কৰিছে। আৰক্ষীয়ে প্ৰথমে সন্দেহ কৰিছিল যে সেইদিনা তেওঁলোকে অঞ্চলটো এৰিছিল। পূব খাচি জিলাৰ আৰক্ষী অধীক্ষকে জনোৱা মতে, প্ৰথম অৱস্থাত বিষয়টো হত্যাৰ ঘটনাৰ দৰে লগা নাছিল।
এনে লাগিছিল যেন এজন পৰ্যটক নিৰুদ্দেশ হৈছে আৰু সেইদৰেই অনুসন্ধান চলি আছিল। কিন্তু যুৱকজনৰ মৃতদেহ উদ্ধাৰ হোৱাৰ পিছত আৰক্ষীৰ আগত স্পষ্ট হৈ পৰে যে ঘটনাটো হত্যাকাণ্ড। ইয়াৰ পিছতে এটা বিশেষ তদন্তকাৰী দল (SIT) গঠন কৰা হয়।
ইন্দোৰৰ পৰা গ্ৰেপ্তাৰ হোৱা কুশৱাহা সোণমৰ প্ৰেমিক নেকি? ৰাজাক হত্যাৰ পৰিকল্পনা কৰিছিল নেকি? এই বিষয়ে সোধাত আৰক্ষী অধীক্ষকগৰাকীয়ে কয় যে যদি ঘটনাৰ ক্ৰমবোৰ একত্ৰিত কৰা হয় তেন্তে তেনেকুৱা যেনে লাগে।
প্ৰাথমিক তদন্তৰ পৰা জানিব পৰা গৈছে যে ঘটনাৰ সময়ত কুশৱাহা সোণমৰ লগত আছিল। আৰক্ষী অধীক্ষকে তেওঁলোকক মেঘালয়লৈ আনি জেৰা কৰিলে বিষয়টো অধিক স্পষ্ট হৈ পৰিব বুলিও জানিবলৈ দিয়ে।
