মঙলবাৰে অসম প্ৰদেশ কংগ্ৰেছৰ নতুন সভাপতি হিচাপে আনুষ্ঠানিকভাৱে দায়িত্ব গ্ৰহণ কৰে গৌৰৱ গগৈয়ে (Gaurav Gogoi)। সদ্য নিৰ্বাচিত সভাপতি তথা সাংসদ গৌৰৱ গগৈক গায়ন-বায়নেৰে ৰাজীৱ ভৱনলৈ আদৰি অনা হয়। ইয়াৰ পূৰ্বে মঙলবাৰে পুৱা গৌৰৱ গগৈয়ে কামাখ্যা মন্দিৰত পূজা-অৰ্চনা আগবঢ়াই আগন্তুক দিনৰ বাবে মা কামাখ্যাৰ আশীৰ্বাদ গ্ৰহণ কৰে।
ইয়াৰ পিছত ৰাজীৱ ভৱনত উপস্থিত হোৱা গৌৰৱ গগৈক দলীয় নেতা-কৰ্মীসকলে বিপুল আদৰণি জনায়। আনহাতে, ৰাজীৱ ভৱনত গৌৰৱ গগৈক প্ৰদেশ কংগ্ৰেছৰ নতুন সভাপতি হিচাপে আনুষ্ঠানিকভাৱে দায়িত্ব অৰ্পণ কৰে বিদায়ী সভাপতি ভূপেন বৰাই।
আনহাতে, সভাপতি হিচাপে দায়িত্বৰ গ্ৰহণ কৰি সংবাদমেল সম্বোধন কৰি গৌৰৱ গগৈয়ে প্ৰাক্তন সভাপতি ভূপেন বৰাক ধন্যবাদ জনাই তেওঁৰ আশীৰ্বাদ কামনা কৰাৰ লগতে দলৰ প্ৰতি তেওঁ আগবঢ়োৱা ত্যাগৰ বাবে কৃতজ্ঞতা জ্ঞাপন কৰে। লগতে দলত সকলোকে সমান অধিকাৰ আৰু ন্যায় প্ৰদানৰ কংগ্ৰেছৰ আদৰ্শৰে আগন্তুক দিনত আগবাঢ়ি যাব বুলি উল্লেখ কৰে।
উল্লেখ্য যে গৌৰৱ গগৈৰ প্ৰদেশ কংগ্ৰেছৰ সভাপতিৰ কাৰ্যভাৰ গ্ৰহণ অনুষ্ঠানত এ আই চি চিৰ সাধাৰণ সম্পাদক তথা অসমৰ তত্ত্বাৱধায়ক জিতেন্দ্ৰ সিং, এ আই চি চিৰ সম্পাদক তথা অসমৰ সহ-তত্ত্বাৱধায়ক মনোজ চৌহান, এ আই চি চিৰ সম্পাদক তথা অসম কংগ্ৰেছৰ পৰ্যবেক্ষক বিকাশ উপাধ্যায়, কংগ্ৰেছ বিধায়িনী দলৰ নেতা দেৱব্ৰত শইকীয়া, সাংসদ ৰকিবুল হুছেইন আদি নেতা-কৰ্মীসকল উপস্থিত থাকে।
