যুৱ প্ৰজন্মক ক্ৰমান্বয়ে মৃত্যুৰ গৰাহলৈ ঠেলি নিয়া বৰবিহ সদৃশ মাৰাত্মক ড্ৰাগছ বিৰুদ্ধে ডিফু সত্ৰ ন্য়াধীশৰ আদালতে এক ঐতিহাসিক ৰায় প্ৰদান কৰে ৷ শুকুৰবাৰে ডিফুস্থিত জিলা ও সত্ৰ ন্যায়াধীশ আদালতৰ লোক অধিবক্তা দিলীক কুমাৰ ডেকাই জানিবলৈ দিয়া অনুসৰি আজি আদালতে তিনিজন ড্ৰাগছ সৰবৰাহকাৰীক ২০ বছৰকৈ সশ্ৰম কাৰাদণ্ড আৰু ২ লাখ টকাকৈ আদায় দিয়াৰ ৰায়দান কৰে ৷
শাস্তিপ্ৰাপ্ত তিনি অভিযুক্ত ক্ৰমে,ৰাজেশ লাখান্দ্ৰী, কুমাৰ গাজিমেৰ আৰু টাংগামবৌ মাৰিয়ানমাই ৷ ২০২২ চনৰ ২ আগষ্টত পুৱা প্ৰায় ৬ বাজি ৩০ বজাত এক গোপন খবৰৰ ভিত্তিত ডিলাই তিনি আলিক আৰক্ষীৰ নাকা তালাচীত তিনিওজন অভিযুক্তৰ পৰা উদ্ধাৰ হৈছিল প্ৰায় ১০ কোটি টকাৰ মাৰাত্মক ড্ৰাগছ ৷ বোকাজান মহকুমা আৰক্ষী বিষয়া জন দাসৰ নেতৃত্বত চিআৰপিএফ আৰু আৰক্ষীৰ সহযোগত চলিছিল অভিযান ৷
ডিমাপুৰৰ পৰা ডিলাই অভিমুখে আহি থকা অৱস্থাত এছ আৰ 03 পি 1143 নম্বৰৰ এখন বলেৰ’ বাহনৰ ডেছ বৰ্ডত এখন কাপোৰৰ বেগত থকা 383 গ্ৰাম হেৰইন, আৰু গিয়াৰ বক্সত গোপন চেম্বাৰৰ পৰা 2 কেজি ২৮ গ্ৰাম ক্ৰিষ্টল আৰু ১ কেজি মৰফিন উদ্ধাৰ কৰিবলৈ সক্ষম হৈছিল আৰক্ষীয়ে ৷ সমুদায় ড্ৰাগছখিনিৰ বজাৰ মূল্য প্ৰায় ১০ কোটি টকা ৷ এই সন্দৰ্ভত ডিলাই থানা এনডিপিএছ এক্ট ২১ চি আৰু ২২ চিত ধাৰাত ২৩ /২০২২ আৰু ডিফু আদালতৰ ৯৪/২২ মোকৰ্দমা চলে ৷
মোকৰ্দমাৰ অন্তত আজি ডিফু জিলা ও সত্ৰ ন্যায়াধীশৰ আদালতে অভিযুক্ত তিনিও জনকে এনডিপিএছএক্টত দোষী সাব্যস্ত কৰি ২০ বছৰকৈ সশ্ৰম কাৰাদণ্ড বিহাৰ লগতে ২ লাখ টকাকৈ জৰিমনা বিহে ৷ আদালতে কাৰ্বি আংলঙত সাংঘাতিক ভাবে বৃদ্ধি পাই অহা ড্ৰাগছৰ প্ৰচলনত উদ্বিগ্নতা প্ৰকাশ কৰি অসম চৰকাৰ, কাৰ্বি আংলং স্বায়ত্ত পৰিষদক ডিফুত এটা ড্ৰাগছ মুক্তি কেন্দ্ৰ খুলিবলৈ আহ্বান জনায় ৷ গোচৰটোত চৰকাৰী পক্ষৰ হৈ উকালতি কৰিছিল দিলীপ কুমাৰ ডেকাই ৷
