সেনাবাহিনীত স্থায়ী আয়োগত মহিলা বিষয়া নিযুক্তিৰ গোচৰ যেতিয়া উচ্চতম ন্যায়ালয়ত উপনীত হয়, তেতিয়া কৰ্ণেল ছফিয়া কুৰেশ্বিৰ (Sofia Qureshi) নামটো উদাহৰণ হিচাপে আহে। এই উদাহৰণ উচ্চতম ন্যায়ালয়ে নিজেই উত্থাপন কৰে।
সেনাবাহিনীত কৰ্ণেল ছফিয়াৰ সাফল্য আৰু সফলতাৰ উদ্ধৃতি দি উচ্চতম ন্যায়ালয়ে মহিলা বিষয়াক কিয় স্থায়ী কমিছনত নিযুক্তি দিব লাগে সেই সম্পৰ্কে বাৰ্তা প্ৰদান কৰে। শীৰ্ষ আদালতে কয় যে কৰ্ণেল ছফিয়াই ২০০৬ চনত কংগোত ৰাষ্ট্ৰসংঘৰ শান্তিৰক্ষী বাহিনীৰ সামৰিক পৰ্যবেক্ষক হিচাপে কাম কৰিছিল। তেওঁ দক্ষতাৰে কামো কৰে।
উল্লেখ্য যে উচ্চতম ন্যায়ালয়ত প্ৰশংসা লাভ কৰা একেগৰাকী মহিলা বিষয়াই বুধবাৰে এক ডাঙৰ ভূমিকা গ্ৰহণ কৰা দেখা গ’ল। মঙলবাৰে মাজনিশা পাকিস্তানৰ মাটিত ভাৰতৰ ‘অপাৰেচন সিন্দুৰ’ৰ পিছতে সেনাৰ সংবাদমেলত প্ৰতিশোধমূলক কার্যৰ ব্যাখ্যা দিয়াৰ দায়িত্ব দিয়া হৈছিল ছফিয়া নামৰ মহিলা বিষয়াগৰাকীক।
তেওঁৰ লগত আছিল বায়ুসেনাৰ উইং কমাণ্ডাৰ ভৌমিকা সিং নামৰ আন এগৰাকী মহিলা বিষয়া। পাকিস্তানৰ ভূমিত প্ৰতিশোধমূলক আক্ৰমণৰ পিছত বুধবাৰে সেনাৰ সংবাদমেলত কৰ্ণেল ছফিয়া আৰু বায়ুসেনাৰ উইং কমাণ্ডাৰ ভৌমিকাই কেনেকৈ আৰু কিয় ‘অপাৰেচন সিন্দুৰ’ সংঘটিত হ’ল সেই বিষয়ে ব্যাখ্যা কৰে।
তেতিয়াৰে পৰাই দুয়োটা বাহিনীৰ এই দুগৰাকী মহিলা বিষয়া চৰ্চাত আহিছে। বহুতে কৈছে, মহিলা সবলীকৰণৰ বাৰ্তা প্ৰেৰণৰ বাবে সেনাৰ সংবাদমেলত পাকিস্তানত সংঘটিত প্ৰতিশোধমূলক আক্ৰমণৰ বাতৰি প্ৰকাশৰ দায়িত্ব কৰ্ণেল ছফিয়া আৰু উইং কমাণ্ডাৰ ভৌমিকাক দিয়া হৈছিল।
ছফিয়া ভাৰতীয় সেনাৰ সামৰিক যোগাযোগ আৰু ইলেক্ট্ৰনিকছ অপাৰেচন সহায়ক শাখা ছিগনেল ক’ৰ্পছৰ অন্যতম শীৰ্ষ বিষয়া। ৩৫ বছৰীয়া এইগৰাকী বিষয়া সেনাৰ কেইবাটাও যুগান্তকাৰী সফলতাৰ সৈতে জড়িত।
২০১৬ চনত প্ৰথমবাৰৰ বাবে শিৰোনাম দখল কৰিছিল তেওঁ। সেই বছৰত ১৮খন দেশৰ সন্মুখত ভাৰতৰ সামৰিক অনুশীলনৰ নেতৃত্ব দিছিল ছফিয়াই। প্ৰথম মহিলা হিচাপে এই কৃতিত্ব অৰ্জন কৰিছিল তেওঁ। সেই সময়ত ছফিয়া লেফটেনেণ্ট কৰ্ণেল আছিল। পুনেত অনুষ্ঠিত সামৰিক অনুশীলন ভাৰতত অনুষ্ঠিত সৰ্ববৃহৎ বিদেশী সামৰিক অনুশীলন আছিল।
জাপান, চীন, আমেৰিকা, ৰাছিয়াৰ দৰে দেশসমূহে ২ মাৰ্চৰ পৰা ৮ মাৰ্চলৈকে এই অনুশীলনত অংশগ্ৰহণ কৰিছিল। আন কোনো দেশৰ এই অনুশীলনৰ নেতৃত্ব দিয়া কোনো মহিলা নাছিল। ১৯৭৪ চনত গুজৰাটৰ বডোদৰাত জন্মগ্ৰহণ কৰা ছফিয়াই ১৯৯৭ চনত জৈৱ ৰসায়ন বিজ্ঞানত স্নাতক ডিগ্ৰী লাভ কৰে।
