ৱাকফ (সংশোধনী) আইনৰ (Waqf bill) সাংবিধানিক বৈধতাক প্ৰত্যাহ্বান জনাই উচ্চতম ন্যায়ালয়ত কেইবাখনো আবেদন দাখিল কৰা হৈছে। এই সকলোবোৰ আবেদনৰ বুধবাৰে একেলগে শুনানি গ্ৰহণ কৰা হ’ব।
ৱাকফ (সংশোধনী) বিধেয়ক আইনত পৰিণত হোৱাৰ পিছৰে পৰা সমগ্ৰ দেশতে ব্যাপক প্ৰতিবাদৰ সূত্ৰপাত ঘটিছে। বিৰোধীৰ যুক্তি, এই আইনখনে মৌলিক অধিকাৰ খৰ্ব কৰে আৰু ই সম্পত্তি বেদখল কৰাৰ প্ৰয়াস।
অৱশ্যে চৰকাৰে দাবী কৰে যে ৱাকফৰ সম্পত্তি পৰিচালনাৰ স্বচ্ছতা নিশ্চিত কৰিবলৈ এই সংশোধনী অতি প্ৰয়োজনীয়। বুধবাৰে মুঠ ৭৩টা গোচৰৰ শুনানি গ্ৰহণ কৰা হ’ব। মুখ্য ন্যায়াধীশ সঞ্জীৱ খান্না, ন্যায়াধীশ সঞ্জয় কুমাৰ আৰু ন্যায়াধীশ কে ভি বিশ্বনাথনে আৱেদনসমূহৰ শুনানি বুধবাৰে দুপৰীয়া ২ বজাৰ পৰা কৰাৰ কথা।
এই গোচৰটোত ১৯৯৫ চনৰ মূল ৱাকফ আইনখনৰ বিৰুদ্ধে হিন্দুসকলে দাখিল কৰা দুখন আবেদনো সন্নিবিষ্ট কৰা হৈছে। আন কিছুমানে শেহতীয়া সংশোধনীৰ বৈধতাক লৈ প্ৰশ্ন উত্থাপন কৰিছে। আদালতে গোচৰটো নিষ্পত্তি কৰাৰ সময়ত আইনখনৰ ওপৰত অন্তৱৰ্তীকালীন স্থগিতাদেশো বিচাৰিছে একাংশ আবেদনকাৰীয়ে।
আবেদনকাৰীসকলৰ ভিতৰত আছে কংগ্ৰেছ, তৃণমূল কংগ্ৰেছ, চিপিআই, জগন মোহন ৰেড্ডীৰ ৱাই এছ আৰ চি পি, সমাজবাদী পাৰ্টি, অভিনেতা বিজয়ৰ টিভিকে, আৰ জে ডি, জে ডি ইউ, আছাদুদ্দিন ওৱেচিৰ এ আই এম আই এম, আপ আৰু ইণ্ডিয়ান ইউনিয়ন মুছলিম লীগকে ধৰি বিভিন্ন দলৰ নেতা।
এই আইনখনক প্ৰত্যাহ্বান জনোৱা আবেদনকাৰীসকলে যুক্তি আগবঢ়ায় যে ই মুছলমানৰ বিৰুদ্ধে বৈষম্যমূলক আৰু তেওঁলোকৰ মৌলিক ধৰ্মীয় অধিকাৰ খৰ্ব কৰে।
আনহাতে, আইনখনৰ সমৰ্থনত ৭খন ৰাজ্যই উচ্চতম ন্যায়ালয়ৰ কাষ চাপিছে গোচৰটোত হস্তক্ষেপ কৰিবলৈ। তেওঁলোকৰ যুক্তি হ’ল এই আইনখন সাংবিধানিকভাৱে সুস্থ, বৈষম্যহীন আৰু ৱাকফৰ সম্পত্তি পৰিচালনা কৰিবলৈ দক্ষ প্ৰশাসনৰ প্ৰয়োজন।
এই গোচৰত কেন্দ্ৰীয় চৰকাৰে সতৰ্কবাণী দাখিল কৰিছে। সতৰ্কবাণী হ’ল, কোনো পক্ষই দাখিল কৰা আইনী জাননী আৰু আদেশ গৃহীত হোৱাৰ আগতে যাতে কেন্দ্ৰীয় চৰকাৰৰ পৰা শুনানি গ্ৰহণ কৰা হয়।
