দেশ আৰু দেশবাসীৰ স্বাৰ্থত আমি খৰখেদাকৈ কোনো সিদ্ধান্ত নলওঁ। ভাৰত কেতিয়াও বন্দুক দেখুৱাই কোনো আপোচত নাযায়। ভাৰত-আমেৰিকাৰ দ্বিপাক্ষিক বাণিজ্য চুক্তি (Indo US Trade Deal) সন্দৰ্ভত এই মন্তব্য কেন্দ্ৰীয় বাণিজ্য মন্ত্ৰী পীয়ুষ গোৱেলৰ।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ ওপৰত আৰোপ কৰা শুল্ক ৯০ দিনৰ বাবে স্থগিত ৰখাৰ কথা ঘোষণা কৰাৰ কিছুদিন পিছতে তেওঁৰ এই মন্তব্য। ট্ৰাম্পৰ এই পদক্ষেপে দুয়োখন দেশৰ মাজত দ্বিপাক্ষিক বাণিজ্যিক চুক্তিৰ দুৱাৰ মুকলি কৰিছে বুলিও উল্লেখ কৰে। ভাৰত-আমেৰিকা দ্বিপাক্ষিক চুক্তি সন্দৰ্ভত প্ৰশ্নৰ সন্মুখীন হৈ তেওঁ এই মন্তব্য কৰে।
ইটালী-ভাৰত ব্যৱসায়, বিজ্ঞান আৰু প্ৰযুক্তি মঞ্চত ভাষণ দি গোৱেলে আমেৰিকা, ব্ৰিটেইন, ইউৰোপীয় সংঘ আৰু বিশ্বৰ আন কেইবাখনো দেশৰ সৈতে ভাৰতৰ বাণিজ্যিক আলোচনা কেনেদৰে আগবাঢ়িছে সেই সম্পৰ্কে তথ্য প্ৰদান কৰে। চুক্তিখনৰ সবিশেষ নিদিয়াকৈ গোৱেলে কয় যে আমাৰ সকলো বাণিজ্যিক আলোচনা ভালদৰে আগবাঢ়িছে।
আমি অমৃতকালত ‘উন্নত ভাৰত ২০৪৭’ লক্ষ্যৰ দিশত আমাৰ পথ সুনিশ্চিত কৰিব লাগিব। আনহাতে, কাৰ্নেগী গ্ল’বেল টেকন’লজি ছামিটত বৈদেশিক পৰিক্ৰমা মন্ত্ৰী এছ জয়শংকৰেও কয় যে ভাৰতৰ বাণিজ্য নীতিৰ বিষয়ে আমেৰিকাকে ধৰি কেইবাখনো দেশৰ সৈতে আলোচনা চলি আছে।
ইতিমধ্যে দুয়োখন দেশৰ মাজত শুল্ক আৰু অনা শুল্কযুক্ত বাণিজ্য সন্দৰ্ভত আলোচনা আৰম্ভ হৈছে। নতুন দিল্লীত কম্প্ৰেহেন্সিভ টাৰ্মছ অৱ ৰেফাৰেন্স (TOR) চূড়ান্ত হোৱাৰ পিছত ভাৰত আৰু আমেৰিকাই ক্ষেত্ৰভিত্তিক আলোচনা তীব্ৰতৰ কৰি তোলে।
এই চৰ্তসমূহৰ লক্ষ্য হৈছে “পাৰস্পৰিকভাৱে লাভজনক, বহুপক্ষীয়” দ্বিপাক্ষিক বাণিজ্য চুক্তিৰ (বি টি এ) সুবিধা প্ৰদান কৰা। ইয়াৰ উপৰি বজাৰত প্ৰৱেশ সম্প্ৰসাৰণ আৰু যোগান বৃদ্ধিৰ ভেটি স্থাপনৰ বাবে শুল্ক আৰু অনা শুল্ক বাধা আঁতৰোৱা।
