কেন্দ্ৰীয় মাধ্যমিক শিক্ষা ব’ৰ্ড চমুকৈ চিবিএছচিয়ে (CBSE) দ্বাদশ শ্ৰেণীৰ পৰীক্ষাৰ্থীৰ ফলাফলৰ পিছৰ সময়সূচীত বৃহৎ পৰিৱৰ্তনৰ কথা ঘোষণা কৰিছে। উত্তৰ বহীৰ পৰীক্ষণ আৰু পুনৰ মূল্যায়নৰ বাবে অনলাইন পৰ্টেল এতিয়া ১ জুন, ২০২৬ৰ পৰা মুকলি কৰা হ’ব বুলি জানিবলৈ দিয়ে৷
চিবিএছইয়ে জাৰি কৰা অধিসূচনাত কোৱা হৈছে যে ছাত্ৰ-ছাত্ৰীসকলৰ বাবে অধিক স্বচ্ছ, সঠিক আৰু কাৰিকৰীভাৱে নিৰৱচ্ছিন্ন সেৱা নিশ্চিত কৰাৰ বাবে এই পদক্ষেপ গ্ৰহণ কৰা হৈছে।
ব’ৰ্ডৰ দাবী যে বহু ছাত্ৰ-ছাত্ৰীয়ে ফলাফলৰ পিছৰ কাৰ্যকলাপ পৰ্টেলৰ জৰিয়তে আবেদন কৰে। সেয়েহে কোনো ধৰণৰ প্ৰযুক্তিগত ত্ৰুটি বা ছাৰ্ভাৰৰ সমস্যাৰ পৰা হাত সাৰিবলৈ বিশেষ গুৰুত্ব দিয়া হৈছে।
ব’ৰ্ডে লগতে কয় যে পৰ্টেলটোৰ মুকলিৰ তাৰিখ পিছুৱাই দিয়াৰ মূল উদ্দেশ্য হৈছে বেকএণ্ড ছিষ্টেম শক্তিশালী কৰা আৰু আবেদন প্ৰক্ৰিয়া মসৃণ কৰা। ইয়াৰ উপৰি এই সময়ছোৱাত প্ৰযুক্তিগত আন্তঃগাঁথনি উন্নত কৰা হ’ব, যাতে বৃহৎসংখ্যক ছাত্ৰ-ছাত্ৰীয়ে সহজে লগ-ইন কৰি একে সময়তে আবেদন কৰিব পাৰে।
যিসকল ছাত্ৰ-ছাত্ৰীয়ে লাভ কৰা নম্বৰত সন্তুষ্ট নহয় বা উত্তৰবহীৰ পুনৰ মূল্যায়নৰ বাবে আবেদন কৰিব বিচাৰে, তেওঁলোকে ১ জুনৰ পৰা অফিচিয়েল প’ষ্ট-ৰিজাল্ট এক্টিভিটি পৰ্টেলত গৈ আবেদন কৰিব পাৰিব। ভুল তথ্য দিলে আবেদন নাকচ হোৱাৰ সম্ভাৱনা আছে।
ছাত্ৰ-ছাত্ৰীৰ সুবিধাৰ্থে ব’ৰ্ডে এক বিশেষ সহায়ক সেৱাও আৰম্ভ কৰিছে। কোনো ধৰণৰ প্ৰশ্ন বা সমস্যাৰ ক্ষেত্ৰত প্ৰাৰ্থীসকলে চিবিএছইৰ টেলি কাউন্সেলিং হেল্পলাইন নম্বৰ ১৮০০ ১১ ৮০০৪ত যোগাযোগ কৰিব পাৰে।
ব’ৰ্ডে কয় যে ফলাফলৰ পিছৰ সেৱাত যাতে কোনো ধৰণৰ খেলিমেলি নহয় আৰু ছাত্ৰ-ছাত্ৰীসকলে দ্ৰুত সহায় লাভ কৰে তাৰ বাবে হেল্পলাইন আৰু ইমেইল সমৰ্থন আৰম্ভ কৰা হৈছে। বিশেষজ্ঞসকলৰ মতে, প্ৰতি বছৰে ফলাফল প্ৰকাশৰ পিছত পৰীক্ষণ আৰু পুনৰ মূল্যায়নৰ বাবে বৃহৎসংখ্যক আবেদন লাভ কৰা হয়। গতিকে শক্তিশালী প্ৰযুক্তিগত ব্যৱস্থা অতি গুৰুত্বপূৰ্ণ।
উল্লেখ্য যে শেহতীয়াকৈ চিবিএছইয়ে ২০২৬ চনৰ দ্বাদশ শ্ৰেণীৰ ফলাফল প্ৰকাশ কৰিছে। তেতিয়াৰে পৰা বহু ছাত্ৰ-ছাত্ৰীয়ে নম্বৰৰ পুনৰ মূল্যায়নৰ প্ৰতি আগ্ৰহ প্ৰকাশ কৰি আহিছে। এনে পৰিস্থিতিত ব’ৰ্ডৰ এই নতুন সিদ্ধান্তই প্ৰাৰ্থীসকলৰ বাবে অধিক সংগঠিত আৰু স্বচ্ছ সেৱা নিশ্চিত কৰিব বুলি বিশ্বাস কৰা হৈছে।
