ভূপালৰ বোৱাৰী ত্বিশা শৰ্মাৰ (Twisha Sharma death case) মৃত্যু ৰহস্য উদঘাটন কৰিবলৈ কেন্দ্ৰীয় তদন্তকাৰী সংস্থাই তিনিটা মূল বিষয়ত গুৰুত্ব আৰোপ কৰিছে। ২০ লাখ টকাৰ বিবাদ, তেওঁৰ মৃত্যুৰ আগৰ মুহূৰ্তবোৰৰ পুনৰ চিত্ৰায়ন আৰু নথি-পত্ৰৰ অমিল।
এনডিটিভিৰ এক প্ৰতিবেদন অনুসৰি, ২০ লাখ টকাৰ শ্বেয়াৰৰ তদন্ত কৰি আছে চিবিআয়ে। পৰিয়ালৰ অভিযোগ অনুসৰি, এই শ্বেয়াৰ ত্বিশাৰ নামত আছিল আৰু শাহুৱেক গিৰিবালা আৰু স্বামী সমৰ্থ সিঙে সেয়া তেওঁলোকৰ নামত বদলি কৰিবলৈ হেঁচা প্ৰয়োগ কৰিছিল। ভূপাল আৰক্ষীৰ পৰা তদন্তৰ দায়িত্ব লোৱাৰ পিছত চিবিআয়ে নতুনকৈ এফআইআৰ ৰুজু কৰিছে।
উক্ত এফআইআৰ অনুসৰি বিয়াৰ পিছত ত্বিশাৰ বিদায় অনুষ্ঠানৰ সময়ত গিৰিবালাই ২ লাখ টকা দাবী কৰিছিল বুলি পৰিয়ালৰ লোকে অভিযোগ কৰে। চিবিআয়ে উদ্ধাৰ কৰা ডিজিটেল প্ৰমাণৰ পৰা পোহৰলৈ আহিছে যে ত্বিশা গৰ্ভৱতী হোৱাৰ পিছত শহুৰেকে পিতৃত্বক লৈ প্ৰশ্ন উত্থাপন কৰিছিল।
কেৱল সেয়াই নহয়, পৰিকল্পিতভাৱে গৰ্ভপাত কৰিবলৈ তেওঁক হেঁচা দিয়া হৈছিল। অৱশ্যে গিৰিবালাই দাবী কৰিছিল যে ত্বিশা গৰ্ভৱতী হোৱাত সুখী নাছিল। তেওঁ গৰ্ভপাত কৰিব বিচাৰিছিল। চিবিআয়ে ‘টানেল ভিউ’ৰ জৰিয়তে ত্বিশাৰ মৃত্যুৰ পূৰ্বে ঘটা ঘটনাক পুনৰ নিৰ্মাণৰ চেষ্টা চলাইছে।
এই প্ৰক্ৰিয়াৰ জৰিয়তে বহু কথা স্পষ্ট হ’ব আৰু বহু গুৰুত্বপূৰ্ণ তথ্য পোৱা যাব বুলি তদন্তকাৰীয়ে আশা কৰিছে। কেৱল সেয়াই নহয়, সূত্ৰ মতে, ত্বিশাৰ লগত কোনো ধৰণৰ জোৰ-জবৰদস্তি হৈছিল নেকি এই ঘটনাৰ আঁৰত কোনো পৰিকল্পিত ষড়যন্ত্ৰ আছিল, সেই কথা ঘটনাৰ ডিজিটেল পুনৰ্গঠনৰ জৰিয়তে তদন্তকাৰীৰ আগত স্পষ্ট হৈ পৰিব। ডিজিটেল পুনৰ্গঠনৰ এই পদ্ধতিটো হ’ল ‘টানেল ভিউ’।
এই প্ৰক্ৰিয়াত চিচিটিভি ফুটেজ, ৱাইফাই লগ, মোবাইল টাৱাৰৰ স্থান, স্মাৰ্ট ডিভাইচৰ ডাটা, কল ৰেকৰ্ড পৰীক্ষা কৰা হয়। তদন্তকাৰীয়ে ইয়াৰ পৰা লাভ কৰা তথ্যসমূহ ভালদৰে পৰ্যালোচনা কৰি ১২ মে’ৰ সময়সীমা নিৰ্ধাৰণ কৰাৰ চেষ্টা চলাইছে।
আটাইতকৈ গুৰুত্বপূৰ্ণ কথাটো হ’ল ত্বিশাৰ শেষ ফোনটো আছিল তেওঁৰ পিতৃ আৰু পৰিয়াললৈ। তেওঁৰ পিতৃয়ে কয় যে ত্বিশাই ফোনত কৈছিল যে তেওঁ আবদ্ধ হৈ আছে। ত্বিশাৰ পিতৃয়েও ফোনত সমৰ্থৰ মাত শুনে। ইয়াৰ পিছত লাইনটো বিচ্ছিন্ন হৈ পৰে।
স্থানীয় আৰক্ষীৰ প্ৰাথমিক নথি-পত্ৰত থকা কিছু অনিয়ম চিবিআয়ে তীক্ষ্ণভাৱে পৰীক্ষা কৰি আছে। প্ৰতিবেদন অনুসৰি, ত্বিশাৰ প্ৰকৃত উচ্চতা সন্দৰ্ভত চৰকাৰী নথি-পত্ৰত স্পষ্ট অমিল দেখা গৈছে। তদন্তকাৰীয়ে তদন্ত কৰি আছে যে এইটো ‘ক্লাৰিকেল এৰ’ৰ’ নে লিখাৰ ত্ৰুটি, নে হেঁচাত এই কাম কৰা হৈছে।
প্ৰাথমিক মৰণোত্তৰ পৰীক্ষাৰ প্ৰতিবেদনত মৃত্যুৰ কাৰণ ফাঁচি বুলি উল্লেখ কৰা হৈছে। অৱশ্যে ত্বিশাৰ শৰীৰত একাধিক আঘাতৰ চিন আছিল। অনুমান কৰা হৈছে যে তেওঁক এক ভোতা অস্ত্ৰৰে আঘাত কৰা হৈছিল। সেই বিষয়টোও চিবিআইৰ তদাৰকত আছে।
