মণিপুৰ (Manipur)ত শান্তি ঘূৰাই অনাৰ বাবে এইবাৰ কেন্দ্ৰীয় চৰকাৰে মেইটেই আৰু কুকি জনগোষ্ঠীৰ প্ৰতিনিধিৰ সৈতে বৈঠক (Meeting of representatives of Meitei-Kuki)ত মিলিত হয়। ২০২৩ চনৰ মে’ মাহৰ পৰা দুয়োটা জাতিৰ সংঘাতৰ বাবে মণিপুৰ উত্তপ্ত হৈ আহিছে। উত্তৰ-পূৰ্বাঞ্চলৰ ৰাজ্যখন বৰ্তমান ৰাষ্ট্ৰপতিৰ শাসনৰ অধীনত আছে। মণিপুৰৰ প্ৰশাসনিক কাম-কাজ চম্ভালি আছে ৰাজ্যপাল অজয় কুমাৰ ভাল্লাই। শেহতীয়াকৈ উচ্চতম ন্যায়ালয়ৰ ন্যায়াধীশৰ এটা প্ৰতিনিধি দলে মণিপুৰ ভ্ৰমণ কৰি পৰিস্থিতি অধ্যয়ন কৰে। ইয়াৰ মাজতে শনিবাৰে কেন্দ্ৰই দুই জনজাতিৰ প্ৰতিনিধিৰ সৈতে এক বৈঠকত মিলিত হয়। পি টি আইৰ সূত্ৰ অনুসৰি, দুয়োটা গোটৰ মাজত ‘সৌহাৰ্দ্যপূৰ্ণ সমাধান’ বিচাৰি এই বৈঠক আহ্বান কৰা হয়। উল্লেখ্য যে ২৩ মাহৰ এই সংঘাতত প্ৰথমবাৰৰ বাবে মেইটেই আৰু কুকি সম্প্ৰদায় দুটা মুখামুখি হয়।
সংবাদ সংস্থা পি টি আইৰ মতে, অশান্ত ৰাজ্যখনত কেনেদৰে শান্তি ঘূৰাই আনিব পাৰি সেই সন্দৰ্ভত এক সিদ্ধান্ত গ্ৰহণৰ প্ৰয়াস কৰা হয়। শনিবাৰৰ বৈঠকত কুকি আৰু মেইটেই জনগোষ্ঠীৰ মাজত আস্থা আৰু পাৰস্পৰিক সহযোগিতা বৃদ্ধিৰ উপায়ৰ বিষয়েও আলোচনা কৰা হয়। বৈঠকত মেইটেই জনগোষ্ঠীৰ ৬ জন প্ৰতিনিধি আৰু কুকি জনগোষ্ঠীৰ ৯ জন প্ৰতিনিধি উপস্থিত থাকে। কেন্দ্ৰীয় প্ৰতিনিধি দলটোত থাকে চোৰাংচোৱা ব্যুৰোৰ অৱসৰপ্ৰাপ্ত বিশেষ সঞ্চালক এ কে মিশ্ৰ। অৱশ্যে বৈঠকত কি আলোচনা হয় সেই সন্দৰ্ভত বিতং তথ্য এতিয়ালৈকে ৰাজহুৱা কৰা হোৱা নাই।
