নতুন বছৰৰ প্ৰথমদিনাই মণিপুৰত হিংসাত্মক ঘটনা (Manipur Violence)। মঙলবাৰে উত্তৰ-পূৰ্বাঞ্চলৰ ৰাজ্যখনত সৃষ্টি হোৱা অশান্তিৰ বাবে মুখ্যমন্ত্ৰী বীৰেন সিঙে ৰাজ্যবাসীৰ ওচৰত ক্ষমা বিচাৰিছিল। ৰাজ্যখনৰ সকলো সম্প্ৰদায়কে পূৰ্বৰ ঘটনা পাহৰি যাবলৈ অনুৰোধ কৰে।
নতুন বছৰত শান্তি ঘূৰি আহিব বুলি তেওঁ আশা দিয়ে। কিন্তু বুধবাৰে সংঘটিত হোৱা ঘটনাই মুখ্যমন্ত্ৰীৰ এই আবেদন কিমান ফলপ্ৰসূ হ’ব তাৰ ওপৰত প্ৰশ্ন উত্থাপন কৰিছে।
মঙলবাৰে গভীৰ নিশা মণিপুৰৰ পশ্চিম ইম্ফল জিলাৰ কদংবন্দ অঞ্চলত কেইবাজনো উগ্ৰপন্থীয়ে আক্ৰমণ কৰে।
সূত্ৰ অনুসৰি, তেওঁলোকৰ লগত আছিল আধুনিক আগ্নেয়াস্ত্ৰ। উগ্ৰপন্থীয়ে কেইবাটাও গুলীচালনা কৰে। বোমা বিস্ফোৰণো কৰে। এই আকস্মিক আক্ৰমণৰ বাবে আতংকিত হৈ পৰে গাঁওবাসী। আৰক্ষীৰ সূত্ৰ অনুসৰি, বহু লোকে ঘৰ এৰি নিৰাপদ আশ্ৰয় বিচাৰি পলায়ন কৰে।
আৰক্ষীৰ মতে, মঙলবাৰে নিশা ১ মান বজাত পাহাৰৰ ওপৰৰ পৰা উগ্ৰপন্থীয়ে কদংবন্দত আক্ৰমণ কৰিবলৈ আৰম্ভ কৰে। পাহাৰৰ তলৰ গাঁওখনলৈ গুলী-বোমা নিক্ষেপ কৰিবলৈ ধৰে।
লগে লগে গাঁওখনত নিয়োজিত স্বেচ্ছাসেৱী দলটোৱে প্ৰত্যুত্তৰ দিবলৈ আৰম্ভ কৰে। নিৰাপত্তা বাহিনীকো অৱগত কৰা হয়। আৰক্ষীয়ে জনোৱা মতে, বাহিনীটো ক্ষিপ্ৰতাৰে উপস্থিত হৈ পৰিস্থিতি নিয়ন্ত্ৰণ কৰে। এই আক্ৰমণত অৱশ্যে কোনো লোক হতাহতি হোৱাৰ খবৰ পোৱা হোৱা নাই।
উল্লেখ্য যে মঙলবাৰে মণিপুৰৰ মুখ্যমন্ত্ৰীয়ে ২০২৩ চনৰ মে’ মাহৰ পৰা চলি থকা অশান্তিৰ বাবে ৰাজ্যবাসীৰ ওচৰত ক্ষমা বিচাৰিছিল। সমগ্ৰ বছৰটো দুৰ্ভাগ্যজনক আছিল বুলিও তেওঁ কয়। যোৱা বছৰৰ ৩ মে’ৰ পৰা আজিলৈ যি ঘটিছে তাৰ বাবে ৰাজ্যবাসীৰ ওচৰত ক্ষমা বিচাৰিছিল।
লগতে বিগত তিনি-চাৰি মাহৰ পৰিস্থিতি লক্ষ্য কৰি ২০২৫ চনত ৰাজ্যখনৰ পৰিস্থিতি স্বাভাৱিক হ’ব বুলি তেওঁৰ বিশ্বাস হোৱাৰ কথাও উল্লেখ কৰিছিল৷ কিন্তু মুখ্যমন্ত্রীৰ আশাৰ বিপৰীতে বাস্তৱতাই দেখুৱাইছে যে নতুন বছৰতো মণিপুৰত অশান্তি আৰু আতঙ্ক অব্যাহত আছে৷
মঙলবাৰে কংপোকোপি জিলাৰ ছাইকুলত স্থানীয় লোক আৰু নিৰাপত্তাৰক্ষীৰ মাজত ব্যাপক সংঘৰ্ষৰ পিছত জাৰি কৰা হয় সান্ধ্য আইন। ইয়াৰ পিছত মঙলবাৰে গভীৰ নিশা পশ্চিম ইম্ফলত অশান্তি বিয়পি পৰে। উগ্ৰপন্থীয়ে পাহাৰৰ ওপৰৰ পৰা গাঁওখনত গোলাবৰ্ষণ আৰু গুলীচালনা কৰাৰ অভিযোগ উত্থাপন হয়।
