কার্বি আংলং জিলাৰ ২৭টা জাতি-জনগোষ্ঠীক লৈ গঠন হোৱা হিল পিপুলচ কালচাৰেল ফ’ৰামৰ নৱম প্রতিষ্ঠা দিৱস আজি ডিফু ক্লাৱত উদযাপন কৰা হয়। কার্বি আংলং স্বায়ত্ত শাসিত পৰিষদৰ মুখ্য কার্যবাহী সদস্য ড০ তুলিৰাম ৰংহাং মুখ্য অতিথিৰূপে উপস্থিত থকা অনুষ্ঠানত জিলাখনৰ বিভিন্ন জাতি-জনগোষ্ঠীৰ প্রতিনিধিয়ে অংশ গ্রহণ কৰে। অনুষ্ঠানত উপস্থিত থাকি মুখ্য কার্যবাহী সদস্য ৰংহাঙে এইচপিচিএফৰ এই উদ্যোগৰ ভূয়সী প্রশংসা কৰে।
জিলাখনৰ সকলো জাতি-জনগোষ্ঠী একগোট হৈ ঐক্যবদ্ধভাবে জিলা দুখনৰ উন্নয়ন সমভাগী হ’বলৈ আহ্বান জনাই ৰংহাঙে। পূর্বে জিলাখনত বসবাস কৰা জাতি-জনগোষ্ঠীসমূহৰ মাজত সংঘাতৰ কথা উল্লেখ কৰি এতিয়া সেই পৰিৱেশ নাই বুলি ৰংহাঙে দাবী কৰি বিজেপি চৰকাৰৰ নেতৃত্বত পাহাৰত এতিয়া শান্তি বিৰাজ কৰিছে উল্লেখ কৰে। ৰংহাঙে অহা বছৰত গুৱাহাটীৰ কলাক্ষেত্ৰত জিলাখনৰ সকলোকেইটা জাতি-জনগোষ্ঠীৰ বর্ণিল কৃষ্টি-সংস্কৃতি প্রদর্শনৰ এক কার্যসূচী গ্রহণ কৰাৰো ঘোষণা কৰে ।
সংবাদমাধ্যমৰ আগত এইচপিচিএফৰ অধ্যক্ষ লাইচান ইংলেঙে কয় যে, আমি পূর্বে জিলাখনত এক বিভীষিকাময় পৰিস্থিতিৰ সম্মুখীন হৈছিলো। কেতিয়াবা উগ্রপন্থীজনিত সমস্যা, কেতিয়াবা গোষ্ঠী সংঘাতে পাহাৰক জোকাৰি গৈছে। এইবোৰ পৰিস্থিতিয়ে জিলাখনত বসবাস কৰা জাতি-জনগোষ্ঠীসমূহৰ মাজত এটা দূৰত্বৰ সৃষ্টি কৰিছিল। এই দূৰত্ব হ্রাস কৰাৰ লক্ষ্যৰে আমি এই অনুষ্ঠানৰ জন্ম দিছিলো। এইক্ষেত্রত আমি সফলতা লাভ কৰিছো যদিও এতিয়াও বহু কৰিবলগীয়া আছে বুলি ইংলেঙে মন্তব্য কৰে ৷
