দেওবাৰে প্ৰাতঃপুৱাৰে পৰা ডিফু থানা পথৰ বৰ নামঘৰত শংকৰী কৃষ্টি বিকাশ সংঘৰ উদ্যোগত ৩ নৱেম্বৰৰ পৰা ৭ নৱেম্বৰলৈ শুভাৰম্ভ হৈছে অবিৰত ভাগৱত পাঠ কাৰ্যসূচী ৷ আজিৰে পৰা কৃষ্ণ ৰসেৰে উদ্বুদ্ধ হৈ পৰিব ভকত- বৈষ্ণৱ সকল ৷ ৫ দিনীয়া কাৰ্যসূচীৰে প্ৰভূৰ শ্ৰীচৰণত আশিষ বিচাৰি এই ভাগৱত পাঠৰ আয়োজন কৰা হৈছে ৷
কাৰ্যসূচী অনুসৰি পুৱা ৫ বজাত প্ৰাতঃ প্ৰসংগ, ৮ বজাত ধ্বৰ্ম ধ্বজা উত্তোলন কৰে শংকৰী কৃষ্টি বিকাশ সংঘৰ সভাপতি দেৱ কুমাৰ গগৈ, ইয়াৰ পিছতে ক্ৰমান্বয়ে বৰগীত পৰিৱেশন, ৯ বজাত ৩২ গছি বন্তি প্ৰজ্বলনৰ উন্মোচন কৰে মুখ্য প্ৰৌজ্বলক উপেন দত্তই ৷
ইয়াৰোপৰি বৈকুণ্ঠ পট উদ্ধোধন, ভাগৱত প্ৰতিষ্ঠা আৰু নাম প্ৰসংগ অনুষ্ঠিত হয় ৷ কাৰবি আংলঙৰ লগতে অসমৰ বিভিন্ন প্ৰান্তৰ পাঠক সকলে অবিৰত ভাগৱত পাঠ কৰি ডিফু লগতে বিশ্বৰ মানৱ জাতিৰ সম্প্ৰীতি, সমন্বয় আৰু বিশ্ব শান্তিৰ বাবে ভগৱন্তৰ শ্ৰী চৰণত প্ৰাৰ্থনা জনাব বুলি জানিব পৰা গৈছে ৷ ভাগৱত পাঠৰ শুভাৰম্ভ কৰে ক্ৰমে, দিগন্ত লষ্কৰ,প্ৰফুল্ল মহন্তই ৷ নাম প্ৰসংগৰ নামাচাৰ্যৰ ৰূপে দায়িত্ব নিৰ্বাহ কৰে শংকৰী কৃষ্টি বিকাশ সংঘ ডিফু বৰনামঘৰৰ নামাচাৰ্য দিলীপ কুমাৰ ফুকন৷
