অসম চুক্তি মতে বিদেশী চিনাক্তকৰণৰ ভিত্তি বৰ্ষ হ’ব ১৯৭১ চন। উচ্চতম ন্যায়ালয়ৰ গুৰুত্বপূৰ্ণ ৰায়। উচ্চতম ন্যায়ালয়ৰ পাঁচজনীয়া বিচাৰপীঠৰ এই গুৰুত্বপূৰ্ণ ৰায়।
মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত গঠিত পাঁচজনীয়া বিচাৰপীঠৰ চাৰিগৰাকী ন্যায়াধীশে এই ভিত্তি বৰ্ষৰ সপক্ষে ৰায়দান কৰাৰ বিপৰীতে এগৰাকীয়ে ১৯৫১ চনৰ ভিত্তি বৰ্ষৰ সপক্ষে ৰায়দান কৰে।
মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ সূৰ্য কান্ত, এম এম সুন্দৰেশ আৰু মনোজ মিশ্ৰই ১৯৭১ চনৰ ভিত্তি বৰ্ষৰ সপক্ষে ৰায়দান কৰে। আনহাতে, ন্যায়াধীশ জে ডি পাৰদিৱালাই ইয়াৰ বিপক্ষে ৰায়দান কৰে।
উল্লেখ্য যে ২০২৩ চনৰ ১২ ডিচেম্বৰত মুখ্য ন্যায়াধীশৰ নেতৃত্বত সাংবিধানিক বিচাৰপীঠে বিষয়টোৰ ৰায় সংৰক্ষিত ৰাখিছিল। 6A ধাৰা অনুযায়ী ১৯৬৬ চনৰ ১ জানুৱাৰী বা তাৰ পিচত আৰু ১৯৭১ চনৰ ২৫ মাৰ্চৰ পূৰ্বে বাংলাদেশকে ধৰি বিভিন্ন ভূখণ্ডৰ পৰা অসমলৈ প্ৰব্ৰজন কৰা লোকসকলক ভাৰতীয় নাগৰিকত্ব প্ৰদান কৰা হ’ব। ১৯৮৫ চনৰ সংশোধিত নাগৰিকত্ব আইন অনুসৰি সেইসকল লোকে ধাৰা ১৮ৰ অধীনত নাগৰিকত্ব লাভৰ বাবে পঞ্জীয়ন কৰিব লাগিব।
১৯৮৫ চনৰ ১৫ আগষ্টত তদানীন্তন ৰাজীৱ গান্ধী চৰকাৰ আৰু অসম আন্দোলনৰ নেতৃবৃন্দৰ মাজত স্বাক্ষৰিত ‘অসম চুক্তি’ কাৰ্যকৰী কৰাৰ বাবে ১৯৫৫ চনৰ নাগৰিকত্ব আইন সংশোধন কৰি 6A ধাৰাটো অন্তৰ্ভুক্ত কৰা হৈছিল। ৰায় ঘোষণা কৰি মুখ্য ন্যায়াধীশ ডি ৱাই চন্দ্ৰচূড়ে কয় যে অসম চুক্তি হৈছে অসমৰ অবৈধ প্ৰব্ৰজন সমস্যাৰ এটা ৰাজনৈতিক সমাধান।
আনহাতে, ধাৰা 6A আছিল ইয়াৰ আইনী সমাধান। স্থানীয় জনসাধাৰণক সুৰক্ষা দিয়াৰ প্ৰয়োজনীয়তাৰ লগতে মানৱীয় উদ্বেগৰ ভাৰসাম্য ৰক্ষাৰ বাবেই ধাৰা 6A প্ৰণয়ন কৰা হৈছিল বুলিও মুখ্য ন্যায়াধীশে ৰায়টোত কয়।
