পৰ্যটক তথা দৰ্শনাৰ্থীৰ বাবে আজিৰে পৰা পুনৰ মুকলি হ’ল কাজিৰঙা ৰাষ্ট্ৰীয় উদ্যান। উল্লেখযোগ্য যে সোমবাৰে পৰ্যটকৰ বাবে মুকলি কৰা হৈছিল মানাহ ৰাষ্ট্ৰীয় উদ্যান। আজি মন্ত্ৰী অতুল বৰা আৰু কেশৱ মহন্তৰ লগতে সাংসদ কামাখ্যা প্ৰসাদ তাছাৰ উপস্থিতিত আগন্তুক পৰ্যটন বৰ্ষৰ বাবে কাজিৰঙা ৰাষ্ট্ৰীয় উদ্যান (Kaziranga National Park) আনুষ্ঠানিকভাৱে মুকলি কৰে বন মন্ত্ৰী চন্দ্ৰ মোহন পাটোৱাৰীয়ে।
উল্লেখযোগ্য যে বিগত বৰ্ষত দর্শনাৰ্থী তথা ৰাজহ সংগ্ৰহৰ ক্ষেত্ৰত কাজিৰঙা ৰাষ্ট্ৰীয় উদ্যানে এক অভিলেখ সৃষ্টি কৰিছিল। আনহাতে, যথেষ্ট সংখ্যক দেশী-বিদেশী পৰ্যটককো আকৰ্ষণ কৰিবলৈ সক্ষম হৈছিল।
উল্লেখযোগ্য যে কোভিডৰ বাবে ২০১৯-২০২০ বৰ্ষত দৰ্শনাৰ্থীৰ সংখ্যা কিছু হ্ৰাস পায়। যাৰ বাবে উক্ত বৰ্ষত দর্শনাৰ্থীৰ সংখ্যা আছিল মাত্ৰ ১,৪২,৮৫৯ জন।
আনহাতে, ২০২০-২০২১ বৰ্ষত ১,৬৭,৬৪৪, ২০২১-২০২২ বৰ্ষত ২,৭৫,০০০, ২০২২-২০২৩ বৰ্ষত ৩,১৪,৭৯৬ আৰু ২০২৩-২০২৪ বৰ্ষত ৩,২৭,৪৯৩ গৰাকী দর্শনাৰ্থীয়ে কাজিৰঙা দৰ্শন কৰে। ইয়াৰে ১৩,৯১৯ গৰাকী আছিল বিদেশী পৰ্যটক।
ইয়াৰ দ্বাৰা ৫০ বছৰীয়া ইতিহাসত কাজিৰঙাই সৰ্বকালৰ অভিলেখ ভংগ কৰে। আনহাতে, যোৱা বছৰ কাজিৰঙাৰ পৰা প্ৰায় ৮,৮১,৮৪,১৬১ টকা ৰাজহ সংগ্ৰহ হয়।
