প্রধানমন্ত্রী নৰেন্দ্র মোডীয়ে (PM Modi) প্রতিবছৰৰ দৰে এইবাৰো তেওঁ লাভ কৰা স্মাৰকসমূহ নিলাম কৰিছে ৷ বৃহস্পতিবাৰে প্ৰধানমন্ত্ৰীয়ে ঘোষণা কৰে যে নিলামৰ পৰা পোৱা ধন নমামি গংগা প্ৰকল্পৰ পুঁজিলৈ যাব।
বৃহস্পতিবাৰে নৰেন্দ্ৰ মোডীয়ে কয়, “প্ৰতিবছৰে বিভিন্ন অনুষ্ঠান আৰু সভাত পোৱা স্মাৰকবোৰ নিলাম কৰা হয়। উক্ত ধন নমামি গংগা প্ৰকল্পৰ বাবে দান কৰা হয়। মই আপোনালোকক জনাওঁ যে এইবাৰো নিলাম আৰম্ভ হৈছে। আপুনি ভাল পোৱা স্মাৰকটো বাছি লওক ।”
উল্লেখ্য যে এই অনলাইন নিলামত ৬০০ৰো অধিক স্মাৰক আছে, যিবোৰ প্ৰধানমন্ত্ৰীয়ে বিভিন্ন সভা-সমিতিত উপহাৰ হিচাপে লাভ কৰিছিল। ইয়াৰ ভিতৰত আছে বিভিন্ন ভাস্কৰ্য, চিত্ৰকলা, থলুৱা শিল্প আৰু ২০২৪ চনৰ পেৰালিম্পিকৰ বিভিন্ন স্মাৰক। যিকোনো ব্যক্তিয়ে নিজ নিজ ৱেবছাইটত পঞ্জীয়ন কৰি ইয়াক সংগ্ৰহ কৰিব পাৰিব। কেন্দ্ৰীয় মন্ত্ৰী গজেন্দ্ৰ সিং শ্বেখাৱাটেও এই পদক্ষেপক আদৰণি জনায়।
তেওঁ কয়, “এই পদক্ষেপে মানুহক ইতিহাসক অধিক আঁকোৱালি ল’বলৈ উৎসাহিত কৰিব। তাৰ লগতে তেওঁলোকেও এই মহান পদক্ষেপত অংশগ্ৰহণ কৰিব পাৰে।” তেওঁ লগতে জনায় যে এই নিলাম ১৭ ছেপ্টেম্বৰৰ পৰা আৰম্ভ হৈছে আৰু ২ অক্টোবৰলৈকে চলিব।
উল্লেখ্য যে নৰেন্দ্ৰ মোডীয়ে ২০০৯ চনত ইউ পি এ চৰকাৰে আৰম্ভ কৰা ‘মিছন গংগা’ প্ৰকল্পৰ নাম সলনি কৰি দহবছৰ পূৰ্বে ‘নমামি গংগা’ কৰিছিল। মিছন গংগাৰ দুটা উদ্দেশ্য আছিল। কোনো প্ৰদূষণ নথকা ‘নিৰ্মল গংগা’ আৰু বাধাহীন প্ৰবাহৰ সৈতে ‘অবিৰত গংগা’।
‘নমামি গংগা’ প্ৰকল্পৰ পৰা অবিৰত গংগাৰ লক্ষ্য বাদ পৰে। লগতে মোডীয়ে জলসম্পদ মন্ত্ৰালয়ত গংগা পুনৰুজ্জীৱন নামৰ এটা বিভাগ সংযোজন কৰে। এই পৰ্যন্ত মুঠ ২০ হাজাৰ কোটি টকা আবণ্টনৰ আধাতকৈ অধিক ব্যয় হৈছে। নিলামৰ পৰা সংগ্ৰহ কৰা ধনো এইবাৰ উক্ত খণ্ডত সংযোজন কৰা হ’ব।
