যোৱা মাৰ্চ মাহত ভাৰতীয় মহাকাশ গৱেষণা সংস্থা (Indian Space Research Organisation)ই দিয়া এক প্ৰস্তাৱৰ বাৰ্তাত বুধবাৰে নৰেন্দ্ৰ মোডী চৰকাৰে অনুমতি প্ৰদান কৰে। কেন্দ্ৰীয় কেবিনেটৰ বৈঠকত ইছৰোৰ প্ৰস্তাৱ অনুসৰি চন্দ্ৰযান-৪ কাৰ্যসূচী (Chandrayaan-4 programme)ক অনুমতি প্ৰদান (Grant of Permission) কৰা হয়। লগতে শুক্ৰগ্ৰহলৈ মহাকাশযান প্ৰেৰণ আৰু মহাকাশ কেন্দ্ৰ নিৰ্মাণৰ প্ৰস্তাৱতো অনুমোদন জনোৱা হয়।
ইয়াৰ নাম হৈছে চন্দ্ৰ মেৰু অন্বেষণ অভিযান বা LUPEX। দৰাচলতে ই হৈছে ইছৰোৰ চতুৰ্থ পৰ্যায়ৰ চন্দ্ৰ অভিযান। চন্দ্ৰযান-৩ৰ সফলতাৰ পিছত ইছৰোৱে চন্দ্ৰ অভিযানক পৰৱৰ্তী পৰ্যায়লৈ লৈ যাবলৈ আগ্ৰহী আৰু ইতিমধ্যে জাপান এৰ’স্পেচ এক্সপ্ল’ৰেচন এজেন্সীৰ (JAXA) সৈতে চুক্তিত স্বাক্ষৰ কৰিছে। চন্দ্ৰপৃষ্ঠত সফলতাৰে অৱতৰণ কৰাৰ পিছত এই অভিযানৰ ‘লক্ষ্য’ হ’ব মেৰু অঞ্চলকে ধৰি বিভিন্ন অঞ্চলত পানী আৰু বিভিন্ন খনিজ পদাৰ্থৰ সন্ধান কৰা।
চন্দ্ৰযান-৪ দুটা পৰ্যায়ত উৎক্ষেপণ কৰা হ’ব। প্ৰথমবাৰৰ বাবে এলভিএম-৩ আৰু দ্বিতীয়বাৰৰ বাবে পিএছএলভি ব্যৱহাৰ কৰা হ’ব। ইছৰোৰ সূত্ৰ অনুসৰি, চন্দ্ৰযান-৪ত পাঁচখন পৃথক বাহন (ৰ’ভাৰ আৰু ৰেঞ্জাৰ) থাকিব। যদিহে এই অভিযান সফল হয় তেন্তে লুপেক্সক আমেৰিকাৰ এপ’ল’ মিছন, পূৰ্বৰ ছোভিয়েট ইউনিয়নৰ লুনা আৰু চীনৰ চাং’ই অভিযানৰ শাৰীত ৰখা হ’ব।
উল্লেখ্য, ২০১৮ চনত ইছৰোৱে ভেনাছ মিছনৰ পৰিকল্পনা ঘোষণা কৰিছিল। সিদ্ধান্ত লোৱা হৈছিল যে ২০২৩ চনৰ ভিতৰত এই মহাকাশযানখন পৃথিৱীৰ দ্বিতীয় নিকটতম গ্ৰহটোলৈ প্ৰেৰণ কৰা হ’ব। কিন্তু পিছলৈ ইছৰোৰ বিজ্ঞানীসকল চন্দ্ৰযান অভিযানত ব্যস্ত হৈ পৰে। বুধবাৰে ‘ভেনাছ অৰ্বিটাৰ’ কাৰ্যসূচীয়ে নতুনকৈ কেবিনেটৰ অনুমতি লাভ কৰে। ইয়াৰ উপৰি প্ৰথমখন থলুৱাভাৱে নিৰ্মিত ভাৰতীয় মহাকাশযান উৎক্ষেপণৰ গগনযান প্ৰকল্প আৰু ‘ভাৰতীয় মহাকাশ কেন্দ্ৰ’ নিৰ্মাণৰ প্ৰস্তাৱতো অনুমোদন জনোৱা হৈছে।
চন্দ্ৰযান-৪ৰ অভিযান সফল হ’লে ইছৰোৱে আমেৰিকা, ৰাছিয়া আৰু চীনক অতিক্ৰম কৰিব। উক্ত দেশসমূহে ইতিমধ্যে যি কাম কৰিছে ভাৰতেও সেয়া কৰিবলৈ ওলাইছে। ইছৰোৰ মুৰব্বী এছ সোমনাথে শেহতীয়াকৈ এক অনুষ্ঠানত কয় যে ইছৰোৱে চন্দ্ৰযান-৪ৰ পৰা মাটি আৰু শিলৰ নমুনা সংগ্ৰহ কৰি দেশলৈ ঘূৰাই আনিব বিচাৰে। তাৰেই পৰিকল্পনা কৰা হৈছে। আনহাতে, ইছৰোৰ সূত্ৰ অনুসৰি ২০৩৫ চনৰ ভিতৰত ভাৰতৰ মহাকাশ কেন্দ্ৰটো পৃথিৱীৰ পৰা ৪০০ কিলোমিটাৰ উচ্চতাত কক্ষপথত স্থাপন কৰা হ’ব। উক্ত মহাকাশ কেন্দ্ৰত ‘এষ্ট্ৰ’বায়’লজী’ আৰু ‘মাইক্ৰ’গ্ৰেভিটি’ৰ সৈতে জড়িত বিভিন্ন গৱেষণা কৰা হ’ব।
